كورمەگە قويىلعان جۇمىستار الماتى مەن اسقاق الاتاۋ باۋرايىنىڭ تۇمسا تابيعاتىن كوز الدىڭىزعا اكەلەدى. ولاردىڭ دەنى ساياباقتاعى سەرۋەندەردەن تۋىنداعان اسەرلەر نەگىزىندە دۇنيەگە كەلگەن. كۇن ساۋلەسى, جاپىراق سىبدىرى مەن تابيعاتتىڭ تاڭعاجايىپ بوياۋلارىنان شابىت العان سۋرەتشى بۇل كورمەنى جاي عانا كارتينالار توپتاماسى ەمەس, ءوز سەزىمدەرىنىڭ كۇندەلىگىنە اينالدىرعان. ءاربىر كەنەپ – بەلگىلى ءبىر ءساتتىڭ كورىنىسى ىسپەتتى. وزەن ءۇستىن جاپقان تاڭعى تۇمان, باتىپ بارا جاتقان كۇننەن توگىلگەن التىن شاپاق, ءشوپ اراسىنداعى كولەڭكەنىڭ ويىنى تىنىمسىز پلەنەرلەردىڭ جەمىسى.
«سۋرەتشىنىڭ «يمپرەسسيونيزم» باعىتىنا دەگەن قۇشتارلىعى ايقىن كورىنەدى. تابيعاتتان العان شابىتى ارقىلى ول تۋىندىلارىندا ەركىندىككە ۇمتىلادى. بۇل كورمە – سۋرەتشىنىڭ شەبەرحاناسىندا, شىعارماشىلىق ساپارلار اياسىندا جاساعان ۇزدىكسىز ەڭبەگىنىڭ ناتيجەسى. ول پلەنەرلەردى ەرەكشە جاقسى كورەدى. قورشاعان ورتانىڭ ەشقانداي بايلىققا ساتىپ الا المايتىن كوركەم سۇلۋلىعى اۆتوردى تەرەڭ تولعانىسقا جەتەلەپ, تابيعاتپەن ۇندەسكەن اسەرلى تۋىندىلارعا شابىتتاندىرعان. سەزىمتال جاندى جازعى تاۋلارداعى سەرۋەندەر, قالا كوشەلەرى مەن قىسقى بەينەلەر ەشقاشان بەيجاي قالدىرمايدى. وسى اسەرلەر ونىڭ تۋىندىلارىندا جاڭعىرىپ, ءتىپتى گۇلدەردىڭ نازىك سۇلۋلىعىن بەينەلەيتىن ناتيۋرمورتتاردا دا ايقىن سەزىلەدى», دەيدى ونەرتانۋشى ايسۇلۋ ۇسەنتاەۆا.
تالعامى بيىك كورەرمەندى سەرۋەن سيقىرىنا بويلاتىپ, كۇننىڭ جىلۋىن سەزىنۋگە, گۇل جايناعان دالانىڭ حوش يىسىنە ەلىتىپ, تابيعات اۋەنىن تىڭداۋعا شاقىرعان سۆەتلانا كاكوتكينا الماتى قالاسىندا دۇنيەگە كەلگەن. ءبىلىمى بويىنشا – ديزاينەر, ساۋلەتشى. باستاپقى كوركەمدىك ءبىلىمىن «كلاسسيكالىق ونەر گيمنازياسىندا» العان. 2002 جىلى قازاق باس ساۋلەت-قۇرىلىس اكادەمياسىن «ديزاين» ماماندىعى بويىنشا تامامداعان. ستۋدەنتتىك جىلدارىنان باستاپ ءتۇرلى بايقاۋلار مەن كورمەلەرگە قاتىسىپ, شىعارماشىلىق ىزدەنىستە كەلە جاتقان شەبەر ادام رۋحىنا كەرەك بارلىق يگىلىك تابيعاتتا جاتقانىن ايتادى.
«سۋرەتشىنىڭ قالامگەرلەردەن ايىرماشىلىعى سالعان سۋرەتىن وزگە تىلدەرگە اۋدارىپ اۋرەلەنبەيدى. سەبەبى ونەردىڭ ءتىلى تۇتاس ادامزاتقا ورتاق. ونى اركىم ءوز ورەسىندە تۇسىنەدى. تابيعات – تۇنىپ تۇرعان سۋرەت. سول سۋرەتتى سەزىنىپ, كوڭىلىڭە كوشىرىپ الۋ بولەك تە, كەنەپكە ءتۇسىرۋ مۇلدە بولەك. بوياۋ گارمونياسىن سەزىنبەسەڭ ءبارى بەكەر», دەيدى كورمە اۆتورى.
الماتى
