ءىس-شاراعا قوستاناي وبلىسى اكىمىنىڭ ورىنباسارى باقىتجان نارىمبەتوۆ, وبلىستىق, قالالىق ارداگەرلەر كەڭەسىنىڭ, قازاقستان حالقى اسسامبلەياسىنىڭ وكىلدەرى, عۇمىرىنىڭ عاسىرلىق بەلەسىنە كوتەرىلگەن قارت مايدانگەردى الىس-جاقىننان ارنايى قۇتتىقتاي كەلگەن مەيماندار, قالا تۇرعىندارى قاتىستى.
سالتاناتتى كەشتە وبلىس اكىمىنىڭ ورىنباسارى باقىتجان نارىمبەتوۆ ارداگەرگە مادەنيەت جانە اقپارات ءمينيسترىنىڭ قۇتتىقتاۋ حاتىن تابىس ەتتى.
«جۇيرىك ۋاقىتتىڭ ۇشقىر قاناتى ءسىزدى ادام عۇمىرىنىڭ بيىك بەلەسى ءبىر عاسىرعا الىپ كەلدى. ءسىز وسى كەمەل جاسىڭىزعا تىڭ جىگەرمەن, جارقىن كوڭىلمەن كەلىپ وتىرسىز. سوعىس جىلدارى قولىڭىزعا قارۋ الساڭىز, بەيبىت زاماندا قالام ۇستاپ, قازاقتىڭ رۋحىن, ءتىلىن, ءدىلىن كوتەردىڭىز. بۇگىندە ءبىر اۋلەتتىڭ التىن تامىرى بولىپ وتىرسىز. كەيىنگى بەيبىت زاماندا ايانباي ەڭبەك ەتكەن, قاجىرلى, جۇرەكتى, جەڭىمپازدار بۋىنىنىڭ جارقىن وكىلىسىز. ءسىزدىڭ جەڭىس جولىنداعى ەرلىگىڭىز بەن عيبراتتى عۇمىرىڭىز – رۋحتىڭ بەرىكتىگى مەن وتانعا دەگەن شەكسىز سۇيىسپەنشىلىكتىڭ ۇلگىسى», دەدى ب.نارىمبەتوۆ.
قاسىمحان الدابەرگەنوۆ اسكەر قاتارىنا 17 جاسىندا, 1943 جىلى 10 قاڭتاردا الىندى. الدىمەن زلاتوۋستاعى 6 ايلىق پۋلەمەتشىلەر ۋچيليششەسىندە وقۋ-جاتتىعۋدان ءوتتى. كەيىن جاڭا قۇرىلعان 14-اۋە دەسانتى بريگاداسىنا قابىلداندى. مايدانگەر جەتى جارىم جىل اسكەري بورىشىن وتەپ, ەلگە 50-جىلدارى عانا ورالادى. 30 جىل ۇستازدىق ەتتى. اۋداندىق گازەتتە قىزمەت اتقاردى. وبلىستىق ايتىستارعا قاتىسىپ, ومار شيپين, نۇرقان احمەتبەكوۆ سىندى ساڭلاق اقىندارمەن ءسوز قاعىستىرىپ كوردى.
1959–1979 جىلدار ارالىعىندا قوستاناي وڭىرىندە التى رەت اقىندار ايتىسى وتكەن ەكەن. ق.الدابەرگەنوۆ وسى ايتىستاردا ءتورت رەت جۇلدەلى بولىپتى.
كەزدەسۋ بارىسىندا وبلىستىق ارداگەرلەر كەڭەسىنىڭ توراعاسى باتىربەك احمەتوۆ قۇتتىقتاۋ ءسوز سويلەپ, قارت مايدانگەرگە رەسپۋبليكالىق ارداگەرلەر ۇيىمىنىڭ توراعاسى, ءماجىلىس دەپۋتاتى باقتىقوجا ىزمۇحامبەتوۆتىڭ قۇتتىقتاۋ حاتى مەن «قۇرمەت بەلگىسى» توسبەلگىسىن تابىس ەتتى.
«وسى تويدىڭ باسى-قاسىندا ءجۇرىپ, ءساتتى وتۋىنە ۇلەسىن قوسقان وبلىس اكىمدىگىنە العىس ايتامىن. قوستاناي وبلىسىندا سەگىز مايدانگەر بار. بيىل ەكىنشى ارداگەرىمىز جۇزگە كەلىپ وتىر. ءسىزدىڭ جاسىڭىزدى بارىمىزگە بەرسىن. وزىڭىزگە سەنىپ تاپسىرىلعان قاي ىسكە دە اسقان ۇقىپتىلىقپەن قاراپ, بىلىكتىلىكپەن اتقارا الدىڭىز. كوپ ءىس تىڭدىردىڭىز. بۇگىندە ەل اعاسى رەتىندە ارداگەرلەر اراسىندا تۇشىمدى ويلارىڭىزدى ورتاعا سالىپ ءجۇرسىز. بۇل جەتىستىكتىڭ بارلىعى – باياندى جۇمىسىڭىزدىڭ لايىقتى ناتيجەسى», دەدى ب.احمەتوۆ.
مايدانگەردى كەزىندە «قوستاناي تاڭى» گازەتىندە بىرگە قىزمەت ەتكەن ارىپتەس ءىنىسى, بەلگىلى جۋرناليست قايسار ءالىم استانادان ارنايى كەلىپ قۇتتىقتاپ, اقجارما تىلەك ارنادى.
«بۇگىن نەتكەن كەرەمەت, باقىتتى, شاتتىقتى كۇن. سەبەبى ۇلى ءامىرشى ۋاقىتتىڭ نۇسقاۋىمەن كەز كەلگەن ادام 100-گە كەلە بەرمەيدى. بۇل – ءومىر شىندىعى. ءبىزدىڭ ۇستازىمىز عاسىر جاساپ, الدىمىزدا وتىر. قاسىمحان اعا – قازاق جۋرناليستيكاسىنىڭ, ادەبيەتى مەن ونەرىنىڭ الىپ تۇلعاسى. وسىنشا ومىردە بۇل كىسىنىڭ كورمەگەن قيىندىعى, سەزبەگەن باقىت سەزىمى بولماعان شىعار. باسىنا تۇسكەن قيىندىقتى دا, قۋانىشتى دا وتكەردى. ءبىزدىڭ الدىمىزدا عاسىر جاساعان ۋاقىتتىڭ ەمەنى تۇر. ەمەن يىلمەيدى. ەمەننىڭ جاپىراعى ءتورت ماۋسىمدا دا ءوزىنىڭ جاسىل قاسيەتىن جوعالتپايدى. سوندىقتان بۇگىندە اعامنىڭ 100 جىلدىعىندا سويلەپ تۇرعانىمنىڭ ءوزى – قۇرمەت. گازەتتە بىرگە ەڭبەك ەتتىك. قاسىمحان اعا, ءسىزدىڭ ونەگەلى عۇمىرىڭىز كۇللى قازاق ەلىنە ماقتانىشپەن ايتۋعا تۇرارلىق», دەدى قالامگەر.
كەش بارىسىندا وبلىس ونەرپازدارى جىردان شاشۋ شاشتى. جاس كۇيشى مارك لي مەرەيتوي يەسىنىڭ «نۇرحان سازى» كۇيىن ورىندادى. قامىستى, جىتىقارا, ناۋىرزىم اۋدانى اكىمدەرىنىڭ ورىنباسارلى دا قاريانىڭ يىعىنا شاپان جاۋىپ, قۇرمەت كورسەتتى.
مەرەكەلىك ءىس-شارا اياسىندا قاسىمحان الدابەرگەنوۆتىڭ ءومىر جولىنان سىر شەرتەتىن كورمە اشىلدى. كەزدەسۋ سوڭىندا مايدانگەر وبلىس باسشىلىعىنا, كوپشىلىككە راحمەتىن ايتىپ, باتاسىن بەردى.
قوستاناي وبلىسى
