پاترۋلدىك پوليتسيا باتالونىنىڭ كومانديرى مەدەت نۇرمۇحانوۆتىڭ ايتۋىنشا, مۇنداي جۇرگىزۋشىلەر ءماجبۇرلى تۇردە توقتاتىلىپ, دەمالىپ الۋىنا جاعداي جاسالادى.
— سوندىقتان دا شارشاعان, ۇيقىلى جۇرگىزۋشىلەردى ۋاقىتىلى توقتاتۋ — ادام ءومىرىن ساقتاپ قالۋعا ىقپال ەتەتىن باستى شارالاردىڭ ءبىرى, — دەدى ول.
ستاتيستيكالىق مالىمەتتەرگە سايكەس, جىل باسىنان بەرى وبلىستا 482 جول-كولىك وقيعاسى تىركەلىپ, 96 ادام قازا تاپقان. ونىڭ ىشىندە 50-دەن استامى جۇرگىزۋشىلەردىڭ ۇيىقتاپ كەتۋىنەن بولعان.
رەيد بارىسىندا قاراعاندى — بالقاش باعىتىندا 15 كولىك توقتاتىلىپ, جۇرگىزۋشىلەردىڭ ءارى قاراي جولعا شىعۋىنا ۋاقىتشا شەكتەۋ قويىلدى.
— قازاقستاندا ءبىزدى پوليتسيا قىزمەتكەرلەرى توقتاتىپ, شارشاساق دەمالۋىمىزدى ءوتىندى. بۇل وتە دۇرىس. ويتكەنى كوپتەگەن جول-كولىك وقيعاسىن كورىپ ءجۇرمىز. پوليتسيا ءتۇن ىشىندە ءبىزدىڭ قاۋىپسىزدىگىمىزدى ويلاپ, جولعا شىقپاۋدى سۇراپ جاتىر. پوليتسيانىڭ بارىنا راقمەت, — دەدى وزبەكستان ازاماتى احروربەك كامباروۆ.
قاراعاندى وبلىسى پوليتسيا دەپارتامەنتى باستىعىنىڭ ورىنباسارى جاسقايرات قايىروۆتىڭ ايتۋىنشا, ەندى جۇرگىزۋشىلەردىڭ قاۋىپسىزدىگىن قامتاماسىز ەتۋ ءۇشىن جاڭا جۇيە ەنگىزىلمەك.
— جۇرگىزۋشىلەردىڭ قاۋىپسىزدىگىن قامتاماسىز ەتۋ ماقساتىندا ءبىز وبلىس پروكۋراتۋراسىمەن بىرلەسىپ, جاڭا جۇيەنى ەنگىزبەكپىز. ياعني 8 ساعاتتان ارتىق جول جۇرگەن جۇرگىزۋشىلەر تۋرالى اقپارات اۆتوماتتى تۇردە پوليتسيا قىزمەتكەرلەرىنىڭ پلانشەتتەرىنە تۇسەدى. ۋاقىتىنان ارتىق جۇرگەن جاعدايدا, ءبىز ولاردى توقتاتىپ, ءارى قاراي دەمالعانعا دەيىن جولعا شىعارمايمىز. قاراعاندى توعىز جولدىڭ تورابى بولعاندىقتان, كولىكتەر كوبىنە ءتۇن ورتاسى نەمەسە تاڭعى ۋاقىتتا كەلەدى. ءدال وسى مەزگىلدە ۇيىقتاپ كەتۋ قاۋپى جوعارى بولادى. ەگەر جۇيە تولىق ىسكە قوسىلسا, جول-كولىك وقيعالارىنىڭ ەداۋىر ازاياتىنىنا سەنەمىز, — دەدى ول.
پوليتسيا جۇرگىزۋشىلەردى ۇزاق جولدا مىندەتتى تۇردە دەمالۋعا, جول ەرەجەلەرىن قاتاڭ ساقتاۋعا جانە ءوز ءومىرى مەن جولاۋشىلاردىڭ قاۋىپسىزدىگىنە جاۋاپكەرشىلىكپەن قاراۋعا شاقىرادى.
