«بارشاڭىزدى وتباسى كۇنىمەن شىن جۇرەكتەن قۇتتىقتايمىن! بۇل — ۇلتىمىزدى مەيىرىم مەن قامقورلىق, ءوزارا قولداۋ مەن ازاماتتىق جاۋاپكەرشىلىك سياقتى مىزعىماس قۇندىلىقتار اياسىندا ۇيىستىراتىن تاماشا مەرەكە. وتباسى — حالقىمىز ءۇشىن قاسيەتتى ۇعىم. ءار ادام, ەڭ الدىمەن, ءوزىنىڭ قاستەرلى شاڭىراعىندا تۇلعا رەتىندە قالىپتاسادى, ۇلگى-ونەگە الىپ, ناعىز ازاماتقا ءتان يگى قاسيەتتەردى بويىنا سىڭىرەدى», – دەدى توقاەۆ.
ونىڭ سوزىنشە, وتباسىندا كورگەن ءتالىم-تاربيەنىڭ ارقاسىندا ەلىمىزدە وتانشىل, ەڭبەكقور, ءبىلىمدى جانە مادەنيەتتى ۇرپاق ءوسىپ شىعادى.
«سوندىقتان ءبىز ءبارىمىز ءبىر ەل بولىپ حالقىمىزدىڭ سالت-ءداستۇرى مەن قازىرگى زامانداعى وزىق كوزقاراسى ۇيلەسىم تاپقان وتباسى قۇندىلىقتارىن ساقتاپ, ونى نىعايتىپ, جان-جاقتى ناسيحاتتاۋىمىز كەرەك. جارىق ءومىر سىيلاعان اتا-انالارىمىزعا زور قۇرمەتپەن قاراۋ — قاستەرلى پارىز. اسىرەسە, ايالى الاقانىمەن, اقىل-پاراساتىمەن ءاربىر ءۇيدى شۋاققا بولەيتىن انالاردىڭ ورنى ەرەكشە. «انا — جەر-انا» — ادامزات وركەنيەتىنىڭ وزەگى. ءبىز اسقار تاۋ اكەلەرىمىزدىڭ تاباندى ەڭبەگى مەن ەرەن ەرلىگىنە باس ءيىپ, قادىر تۇتۋىمىز كەرەك», – دەلىنگەن قۇتتىقتاۋدا.
ول ءار شاڭىراقتا ىرىس-ىنتىماق بولسا, ەلىمىز دە قارقىندى داميتىنىن ايتتى.
«بۇل — ادىلەتتى جانە قۋاتتى قازاقستان قۇرۋدىڭ اسا ماڭىزدى شارتى. سوندىقتان مەملەكەت وتباسى قۇندىلىقتارىن كەڭىنەن دارىپتەپ, انا مەن بالا قۇقىعىن قورعاۋعا ايرىقشا ءمان بەرەدى. ءار شاڭىراق باق-بەرەكەگە تولسىن! بارشا وتانداستارىمىزعا زور دەنساۋلىق, مول تابىس تىلەيمىن», — دەلىنگەن پرەزيدەنت قۇتتىقتاۋىندا.
