وسى كۇنى زاماناۋي مەكتەپتە ءبىلىم الىپ جاتقان بالالار مەن اتا-انالاردىڭ قۋانىشتارىندا شەك جوق. اپتا سوڭىندا المالىباق اۋىلىنداعى 1500 ورىندىق ورتا مەكتەپتە «اشىق ەسىك» كۇنى ۇيىمداستىرىلدى.
«مۇنداعى ماقسات – قوعام وكىلدەرىن مەكتەپتىڭ وقۋ-تاربيە ۇدەرىسىمەن, ماتەريالدىق-تەحنيكالىق بازاسىمەن, «كەلەشەك مەكتەپتەرى» ۇلتتىق جوباسى اياسىندا جاسالعان مۇمكىندىكتەرمەن تانىستىرۋ, ءبىلىم ساپاسىن ارتتىرۋعا باعىتتالعان اشىق ديالوگ ورناتۋ», دەيدى قازاق ءتىلى مەن ادەبيەتى ءپانىنىڭ مۇعالىمى اينۇر اشىرباەۆا.
المالىباق اۋىلىنداعى جاڭا مەكتەپتىڭ اشىلۋىنا كۋا بولعان اتا-انالار دا قۋانىشىمەن ءبولىستى.
«مەن وسى اۋىلدىڭ تۇرعىنىمىن. ءۇش بالام وسى مەكتەپكە بارادى. ءبىز مەكتەپتىڭ اشىلۋىن ۇزاق كۇتتىك. اتى ايتىپ تۇرعانداي, شىن مانىندە كەلەشەكتىڭ مەكتەبى بولدى. سىنىپتا بارلىق جاعداي جاسالعان. ءار سىنىپ تازا اۋىزسۋمەن قامتاماسىز ەتىلگەن. باستاۋىش سىنىپتىڭ كابينەتتەرى جاس ەرەكشەلىكتەرىنە ساي جاسالعان. ورىندىقتارى, پارتالارى, تاقتالارى زاماناۋي ۇلگىدە ورناتىلعان. بارلىق بالاعا جەكە شكاف بەرىلگەن. اسحاناسى وتە كەڭ. سپورت زالدىڭ باستاۋىش پەن جوعارى سىنىپ وقۋشىلارىنا جەكە-جەكە جاسالعانى, ءتىپتى, قۋانتتى. ەل كەلەشەگى – جاس وسكىنگە وسىنداي مۇمكىندىكتەردى سىيلاعان پرەزيدەنتىمىز قاسىم-جومارت كەمەل ۇلىنا ايتار العىسىمىز شەكسىز», دەيدى اۋىل تۇرعىنى گۇلشات جانعوجاەۆا اعىنان جارىلىپ.
جاڭا مەكتەپتىڭ ىڭعايلى سىنىپتارى مەن كەڭ زالدارى جاس ۇرپاقتىڭ عىلىمعا, ونەرگە, سپورت پەن ادەبيەتكە ەركىن قادام باسۋىنا جول اشاتىنىن العا تارتقان مەكتەپ ديرەكتورىنىڭ تاربيە ءىسى جونىندەگى ورىنباسارى ايجان مەڭلىحوجاەۆا ساۋلەتتى ءبىلىم شاڭىراعىندا وقۋشىلار ءداستۇرلى پاندەردى تەرەڭ مەڭگەرۋمەن قاتار, اقپاراتتىق تەحنولوگيا, ينجەنەريا, بيوتەحنولوگيا, روبوتتەحنيكا, باسقا دا جەتەكشى سالالاردا جان-جاقتى ءبىلىم الىپ, بولاشاق ماماندىقتارىنا العاشقى قادام جاسايتىندىعىن ايتتى. وسىنداي يگى باستامالاردى قولداعان ەل باسشىلىعىنا, ءبىلىم باسقارماسىنا العىسىن بىلدىرە كەلە, ءبىلىم مەن تاربيە ۇشتاسىپ, بولاشاق ءبىلىمدار تۇلعالاردىڭ قالىپتاسۋىنا نەگىز بولاتىن مەكتەپ ۇجىمىنا شىعارماشىلىق تابىس, وقۋشىلارعا شابىت پەن ساتتىلىك تىلەدى.
«اشىق ەسىك» كۇنىنە قاتىسقان قوعامدىق بىرلەستىك وكىلدەرى مەن اتا-انالار مەكتەپ ءىشىن ارالاپ, ماتەريالدىق بازاسىمەن تانىستى.
الماتى وبلىسى
