فوتو: ەڭبەك جانە حالىقتى الەۋمەتتىك قورعاۋ مينيسترلىگى
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە, الماتى قالاسىنىڭ وكىلى الشىن التىباەۆ ەڭ كوپ شاكىرت تاربيەلەگەن تالىمگەر رەتىندە ەرەكشەلەندى. ول اۋىل شارۋاشىلىعىن مەحانيكالاندىرۋ جانە تسيفرلاندىرۋ سالاسىندا 50 جىل ەڭبەك ەتىپ, 500-دەن اسا قىزمەتكەردى وقىتقان. ونىڭ كاسىبيلىگى مەن ەڭبەگى سالالىق ۇجىمدا جوعارى باعالانادى.

سونىمەن قاتار قوستاناي وبلىسىنان ەلەكتر جابدىقتارىن جوندەۋ جانە قىزمەت كورسەتۋ جونىندەگى 5-رازريادتى ەلەكترومونتەر ريشات فاستحۋتدينوۆ پەن قىزىلوردا وبلىسىنان كۇرىش ءوسىرۋ بريگاداسىنىڭ جەتەكشىسى گۇلسىم داريباەۆا 100-دەن استام ماماندى وقىتىپ شىعارعان. سونداي-اق اباي وبلىسىنان نۇرلان بايبۋتينوۆ, اقتوبە وبلىسىنان ايدىن قايىربەكوۆ جانە قاراعاندى وبلىسىنان ەرلان سىزدىقوۆ تاۋ-كەن جانە مەتاللۋرگيا سالاسىندا 73 جاڭا كادردى دايىنداعان.

الماتى وبلىسىنان جانات كەرىمباەۆ, جامبىل وبلىسىنان ۇلمەكەن يبراەۆا جانە جەتىسۋ وبلىسىنان راۋشان زايتبەكوۆا ءبىلىم بەرۋ سالاسىندا 98 جاس مامانعا تالىمگەر بولدى. باتىس قازاقستاننان قوبلان مەتەكەسوۆ پەن ۇلىتاۋ وبلىسىنان دۋلات قۇرمانبەكوۆ تەلەكوممۋنيكاتسيا سالاسىندا 32 قىزمەتكەردى دايىندادى.
ونەركاسىپتە پاۆلودار وبلىسىنان جەكسەن اجمانوۆ, سولتۇستىك قازاقستاننان اسىلتاس قابوشەۆا, شىمكەنتتەن الەكساندر چەرنىح بارلىعى 70 مامانعا تالىمگەرلىك جاساسا, ەنەرگەتيكادا شىعىس قازاقستاننان اندرەي ليسيتسىن مەن استانادان ديسەمباي شايكەنوۆ 55 كادردى دايىندادى. ال HR سالاسىندا اقمولادان نەسىبەلدى ءجۇسىپوۆا, ماڭعىستاۋدان الەكسەي ساۆين جانە اتىراۋدان مەيرامگۇل جولاەۆا 104 جاس مامانعا تاجىريبە ۇيرەتتى.

ايتا كەتەيىك, «ەڭبەك جولى» بايقاۋى ەڭبەك اۋلەتتەرىنىڭ ءداستۇرىن دارىپتەۋگە, جاستاردى جۇمىسشى كاسىپتەرىنە باۋلۋعا جانە ۇزدىك قىزمەتكەرلەردى ىنتالاندىرۋعا باعىتتالعان. ول جىل سايىن وڭىرلىك جانە رەسپۋبليكالىق دەڭگەيدە «ۇزدىك ەڭبەك اۋلەتى», «جۇمىسشى جاستاردىڭ ۇزدىك تالىمگەرى» جانە ء«وندىرىستىڭ ۇزدىك جاس قىزمەتكەرى» نوميناتسيالارى بويىنشا وتكىزىلەدى.
بيىلعى بايقاۋدىڭ وڭىرلىك كەزەڭىنە رەسپۋبليكا بويىنشا 505 ءوتىنىم قابىلدانىپ, ءار اتالىمدا 60 جەڭىمپاز انىقتالدى. ولار ەندى رەسپۋبليكالىق كەزەڭدە باق سىنايدى. جەڭىمپازداردى قر ەڭبەك جانە حالىقتى الەۋمەتتىك قورعاۋ مينيسترلىگى جانىنداعى كوميسسيا انىقتايدى. قورىتىندى ماراپاتتاۋ ءراسىمى جۇمىسشى كاسىپتەر جىلىنىڭ جابىلۋىنا وراي جەلتوقسان ايىندا وتەدى.