سولتۇستىك قازاقستان گىر كوتەرۋشىلەرى گيننەستىڭ رەكوردتار كىتابىنا ەندى

پەتروپاۆل. 20 ناۋرىز. رەسەيدىڭ ارحانگەلسك قالاسىندا وتكەن  گىر كوتەرۋدەن حالىقارالىق تۋرنيرگە قاتىسقان سولتۇستىكقازاقستاندىقتاردىڭ ءبارى  الەم چەمپيونى اتانىپ,30 التىن مەدال ولجالادى. بۇل تۋرالى egemen ءتىلشىسى حابارلادى. الەمدىك دەڭگەيدەگى جارىسقا 15 ەلدەن 200-گە  جۋىق گىر  كوتەرۋشى جينالىپ, ءوزارا كۇش سىناستى. قازاقستاننىڭ نامىسىن 8 ساڭلاق قورعاسا,  ۇشەۋى  قىزىلجار وڭىرىنەن كەلدى. جەتىم جانە اتا-انالاردىڭ قامقورلىعىنسىز قالعان بالالار   ينتەرناتىنىڭ تاربيەلەنۋشىسى  ۆيكتوريا روگاچەۆا  دودالى باسەكەگە العاش رەت قاتىسقانىنا قاراماستان جارتى ساعات ىشىندە 10 كيلولىق گىر تاسىن 377 رەت كوتەرىپ,  ءوز سالماق دارەجەسى بويىنشا جەڭىستىڭ ەڭ بيىك تۇعىرىنا كوتەرىلگەن. 63 جاستاعى  ەرىك نۇرپەيىسوۆ ەلگە 10 التىن مەدالدى موينىنا تاعىپ ورالدى. «12 كيلولىق گىر تاسىن ەكى قولمەن كەزەك-مەزەك  440 رەت كوتەرىپ, العاشقى التىن مەدالدى يەلەندىم.  ودان ءارى ءارتۇرلى  اتالىمدار بويىنشا سايىسىپ, ەسە جىبەرگەن جوقپىن»,–دەيدى  سالاماتتى ءومىر سالتىن سەرىك ەتكەن دەنە شىنىقتىرۋ ءپانىنىڭ مۇعالىمى. بيىل الپىستى القىمداپ وتىرعان سپورت ارداگەرى  ۆيكتور سايكو بۇعان دەيىن  الەم چەمپيونى ءتاجىن بىرنەشە مارتە ۇتىپ السا, وسى جولى دا  ناعىز سپورتتىق بابىندا ەكەنىن تانىتقان. وسىلايشا سولتۇستىكقازاقستاندىق ءۇش سپورتشى جالپى جيىنتىعى 30 التىن مەدال يەلەنىپ, ەسىمدەرى  گيننەستىڭ  رەكوردتار كىتابىنا جازىلدى. ءومىر ەسقالي. دەرەك: egemen.kz سۋرەت: egemen.kz