ەتى ءتىرى, تىرلىگى ءىرى ەرنات تىلەك ۇلى اتاسىنىڭ جولىن جالعاۋدى مۇراتى سانايدى. ماحمەت اتاسى اۋىل شارۋاشىلىعى سالاسىنىڭ جەتەكشى مامانى بولىپتى. اتا ونەگەسىن ءسىڭىرىپ وسكەن ۇل دا ءوزىنىڭ شارۋاشىلىعىن اشىپ, كاسىبىن دوڭگەلەتەدى.
قوراداعى كۇندەلىكتى شارۋا جاستايىنان مالساق ەرناتتىڭ ءبىر وزىنەن ارتىلمايتىن كورىنەدى. سودان ەڭبەكپەن شىمىر بولىپ وسكەن ول دەنەشىنىقتىرۋ ءپانى مۇعالىمى ماماندىعىن وقىپ الادى. وقۋىن ويداعىداي تامامداعان ونىڭ ويىنا مال بورداقىلاۋ كاسىبى كەلەدى. جانىپ تۇرعان جاس جىگىتتى وتباسى دا قولداپ, سەنىم ءبىلدىرىپ, اكەسى دەمەپ جىبەرەدى.
ءسويتىپ, اتاسىنىڭ اتىن يەمدەنىپ, «Mahmet Agro Farming» شارۋاشىلىعىن اشادى. ۇكىمەتتىڭ جەڭىلدەتىلگەن نەسيەسىنىڭ دە كوپ كومەگىن كورىپ, 25 ملن قاراجات الىپ, شارۋاشىلىقتىڭ قاجەتىنە جۇمسايدى.
ءوزىنىڭ قوراسىن كەڭەيتىپ, جانىنان تاعى ءبىر مال بورداقىلاۋ الاڭىن سالادى. جىل ون ەكى اي تاي, قۇنان, دونەن, بيە جەمدەيدى. وتىز جىلقىعا ورىن بار. ال جاڭادان سالعان بازىندا 40 سيىر جەمدەيدى. اۋىلداستارىنان, كورشى ەلدى مەكەندەردەن ءبىر جاسار بۇزاۋ ساتىپ الىپ, ءبىر جىل بورداقىعا قويادى. مال ازىعى مول بولسا, ءار بۇقا شامامەن 100 كيلو سالماق قوسادى. ءسويتىپ, ەڭبەك سۇيگەن ەرنات جىلىنا 40–50 توننا ەت ءوندىرىپ وتىر.
«مال بورداقىلاۋ – دالمە-ءدال ۋاقىتتى, ەرىك-جىگەردى تالاپ ەتەتىن شارۋا. كۇندىز-ءتۇنى قورادا بولۋىڭ كەرەك. جەم-ءشوبى, سۋى ۋاقىتىسىمەن بولعان ءجون. مال استىن تازارتىپ وتىرۋ – ءبىرىنشى ماسەلە. وسى ەڭبەگىمىزگە ساي راقاتىن دا كورىپ وتىرمىز. ءۇيىمىزدى كەڭەيتىپ, ۇلكەن قوناق بولمەسى مەن جاتىن بولمەلەردى كوبەيتىپ جاتىرمىز. وسىنىڭ ءبارى – ەڭبەگىمىزدىڭ, مالدىڭ ارقاسى», دەيدى ەرنات.
ەرنات تىلەك ۇلى تەحنيكانىڭ دا ءتىلىن ەرتە مەڭگەرگەن. جاستايىنان ەگىننىڭ, شابىندىقتىڭ قىم-قۋىت تىرشىلىگىن كورىپ وسكەن ازامات. سونىڭ ارقاسىندا مالىنىڭ جەم-ءشوبىن ءوزى دايىندايتىن بەساسپاپ جىگىت. قازىر شارۋاشىلىعىندا تراكتورى, ءشوپ شاباتىن تەحنيكاسى, پرەستەگىش ماشيناسى بار. ەگىن وراتىن «ەنيسەي-1200 1نم» كومباينى, ايگىلى «گاز-53» جۇك كولىگى ساعات تىلىندەي سارتىلداپ تۇر. ولاردىڭ دا ماي-سۋىنا, سايماندارىنا ءبىر ءوزى جاۋاپتى.
ەرناتتىڭ كومەكشىسى – اكەسى تىلەك جانە باۋىرلارى. ەگىن سالۋدى 2018 جىلدان بەرى قولعا الىپ كەلەدى. 2019 جىلى 100 گەكتار جەرگە كوپجىلدىق ەكپە ءشوپ ەگىپ, قازىر سونىڭ جەمىسىن كورىپ وتىر. شارۋاشىلىعىندا شابىندىعىن, ەگىن اۋماعىن, جايىلىمىن قوسا ەسەپتەگەندە 350 گەكتار جەرى بار.
جاس فەرمەر مال سەمىرتۋدىڭ قىزىعىنا ابدەن كىرگەن. 100–110 كيلو بولعان ءبىر جاسار بۇزاۋدى تارازىعا سالعاندا 200 كيلوعا دەيىن تارتقىزادى. سوندا جەم-شوپكە كەتكەن شىعىندى الىپ تاستاعاندا, ەتتەن 80 كيلو پايدا كورەدى. ال جىلقى مالىنا 70–80 كيلوعا دەيىن سالماق قوستىرادى. بورداقى مال ازىعىنىڭ قۇنارى جوعارى بولسا عانا ناتيجە بەرەدى. سول سەبەپتى سيىرىنا تارتىلعان بيدايدى, جىلقىعا كەبەك پەن ەكىنشى سورت ۇنىن ارالاستىرىپ بەرەدى. ەت ءونىمىن قاراعاندىنىڭ «اراي», «شىعىس», «التىن اربا» بازارىنا وتكىزىپ وتىر. ونىمەن قوسا ءوزىنىڭ دە تۇراقتى تۇتىنۋشىلارى بار.
جالىندى جاس جىگىت جيىرما جاسىندا اۋىلىنداعى ارۋ اقبوتامەن وتاۋ قۇرادى. قازىر ەكى جاس – ءتورت بالانىڭ اتا-اناسى, كوپبالالى وتباسى. اياۋلى جارى دا ەرناتتىڭ شارۋاسىنىڭ ءبىر جاعىنان شىعىسادى. اۋىلىنىڭ پىسىق كەلىنى اتانعان اقبوتا ەكەۋىنىڭ ەڭبەكقورلىعىنا سارىوبالى اۋىلىنداعىلار سۇيسىنەدى.
ەرنات تىلەك ۇلى شارۋاشىلىعىنىڭ مۇمكىندىگىن مولايتقىسى كەلىپ وتىر. الايدا شابىندىقتىڭ, جايىلىمنىڭ ازدىعى ازداعان كەدەرگى كەلتىرىپ وتىرعان كورىنەدى. ءۇيىر-ءۇيىر جىلقى ءوسىرىپ, سيىردىڭ دا سانىن كوبەيتۋ ويىندا بار. كەلىنشەگى اقبوتا دا ءسۇت ونىمدەرىن ءوندىرىپ, قۇرت-مايىن ساۋداعا شىعارعىسى كەلەدى. ونىمەن قوسا ەرنات ەگىن سالاتىن جەرىن جاڭارتىپ, جەم-ءشوپ قورىن مولايتۋدى جوسپارلاپ قويعان. قىسقاسى, اتاسىنىڭ اتىنداعى شارۋاشىلىعىن سان سالالى قىلعىسى كەلەدى. وعان ەڭبەكقور ەكى جاستىڭ الەۋەتى دە, ارەكەتى دە جەتەدى.
قاراعاندى وبلىسى,
قارقارالى اۋدانى,
سارىوبالى اۋىلى
