جىلدىڭ باستى ساياسي وقيعاسى – ەل دامۋىنىڭ ستراتەگيالىق باسىم باعىتتارىن ايقىنداعان بيىلعى حالىققا جولداۋدا جاڭا تەحنولوگيالار داۋىرىندەگى مىندەتتەر بەلگىلەنىپ, كەلەلى باستامالار كوتەرىلدى. تالقىلاۋ الاڭىنا جينالعان ساراپشىلار – ءماجىلىس دەپۋتاتتارى اجار ساعىندىقوۆا, ەكاتەرينا سمولياكوۆا, قىرعىز رەسپۋبليكاسى ەلشىلىگىنىڭ كەڭەسشىسى اليم توقتومامبەتوۆ, ەۋرازيالىق ينتەگراتسيا ينستيتۋتى عىلىمي-تەوريالىق تالداۋ جانە ادىسنامالىق قامتاماسىز ەتۋ دەپارتامەنتىنىڭ باسشىسى ارمان ەشمۇراتوۆ پەن وزگە دە ماماندار جولداۋدا ايتىلعان جوسپارلار مەن باستامالار توڭىرەگىندە ويىن ورتاعا سالدى.
«جولداۋدىڭ تۇجىرىمدامالىق قاڭقاسى ەلدى تەرەڭ تسيفرلىق ترانسفورماتسيالاۋ, ەكونوميكانى ءارتاراپتاندىرۋ مەن تسيفرلاندىرۋ, ونىڭ اۋقىمدى قۇرىلىمدىق جاڭعىرتىلۋى, سونداي-اق ەكونوميكالىق جانە ساياسي رەفورمالاردىڭ بەرىك عىلىمي ءارى زاڭنامالىق نەگىزىن قۇرۋعا نەگىزدەلگەن. پرەزيدەنتتىڭ ەڭ ماڭىزدى ستراتەگيالىق مىندەتى – الداعى ءۇش جىل ىشىندە مەملەكەتىمىزدى تولىققاندى تسيفرلىق ەلگە اينالدىرۋ. وسى باعىتتى ۇيلەستىرۋ ءۇشىن ول جاساندى ينتەللەكت جانە تسيفرلىق دامۋ مينيسترلىگىن قۇرۋدى تاپسىردى. سونىمەن قاتار پرەزيدەنت ەلدىڭ ورنىقتى الەۋمەتتىك-ەكونوميكالىق دامۋىنا, ماكروەكونوميكالىق تۇراقتىلىقتى قالىپتاستىرۋعا, ينۆەستيتسيالىق ساياسات پەن بيزنەس جۇرگىزۋ شارتتارىن قايتا قاراۋعا, تسيفرلىق اكتيۆتەر ەكوجۇيەسىن قۇرۋعا, ونەركاسىپتىك الەۋەتتى تولىق اشۋعا, سونداي-اق قوعامدا زاڭ مەن ءتارتىپ يدەولوگياسىن جان-جاقتى ورنىقتىرۋعا باعىتتالعان بىرقاتار مىندەتتى العا قويدى», دەپ اتاپ ءوتتى پرەزيدەنتتىك ورتالىق ديرەكتورى باقىتجان تەمىربولات.
قىرعىز رەسپۋبليكاسى ەلشىلىگىنىڭ كەڭەسشىسى ا.توقتومامبەتوۆ ءوز ەلىنىڭ قازاقستان باسشىلىعى دايەكتى تۇردە جۇرگىزىپ كەلە جاتقان مەملەكەتتىك باسقارۋدى نىعايتۋ مەن ساياسي جاڭعىرتۋعا, ەكونوميكانى جانە الەۋمەتتىك سالانى اۋقىمدى تۇرلەندىرۋگە باعىتتالعان ساياساتتى تولىق قولدايتىنىن جەتكىزدى.
ء«بىز قازاقستاننىڭ ورتالىق ازيانىڭ ەكونوميكالىق دامۋ كوشباسشىسى بولاتىنىنا كامىل سەنەمىز. قىرعىزستان مەن قازاقستان ەكىجاقتى بايلانىستار كەشەنىن ودان ءارى كەڭەيتۋگە باعىتتالعان بىرلەسكەن كۇش-جىگەردى ناقتى تۇسىنەدى, وسىلايشا جەتىستىكتەرگە قول جەتكىزىپ, قازىرگى سىن-قاتەرلەر مەن كەدەرگىلەردى بىرگە ەڭسەرەدى», دەپ ول ويىمەن ءبولىستى.
دەپۋتات ا.ساعىندىقوۆانىڭ ايتۋىنشا, كەز كەلگەن قۇقىقبۇزۋشىلىق پەن زاڭسىزدىققا نولدىك توزىمدىلىك قاعيداتىن ۇستانۋ – ۇران ەمەس, ناقتى ءىس-ارەكەتكە باعىت-باعدار. زاڭعا قۇرمەت تانىتپاي وزىق ۇلت قۇرۋ مۇمكىن ەمەس.
«مەملەكەت باسشىسىنىڭ بيىلعى جولداۋى الدىڭعىلاردان ەلدىڭ وركەنيەتتىك دامۋىنا ەرەكشە نازار اۋدارۋىمەن ەرەكشەلەندى. اسىرەسە كاسپي ماسەلەسى نازارىمدى ەرەكشە اۋداردى. تەڭىز تارتىلىپ بارادى, ەكوجۇيە بۇزىلىپ, تازا سۋعا قولجەتىمدىلىك ازايىپ جاتىر. بۇل ءوڭىردىڭ بولاشاعىنا قاۋىپ توندىرەدى. ءبىز ارەكەت ەتۋىمىز كەرەك: بىرلەسكەن مونيتورينگ ورناتىپ, ونەركاسىپتىك جۇكتەمەنى ازايتۋ, زاماناۋي سۋ پايدالانۋ تەحنولوگيالارىن ەنگىزۋ, عالىمدار مەن جەرگىلىكتى قاۋىمداستىقتاردى تارتۋ قاجەت. پرەزيدەنتتىڭ كاسپي تەڭىزىن قۇتقارۋ جونىندەگى مەملەكەتتىك باعدارلاما قۇرۋ باستاماسى – ۋاقتىلى ءارى اسا ماڭىزدى قادام», دەدى دەپۋتات.
ال ە.سمولياكوۆا ءوزى ءجيى كوتەرىپ جۇرگەن تۋريزم ماسەلەسىنە بيىلعى جولداۋدا دا ايرىقشا نازار اۋدارىلعانىن تىلگە تيەك ەتتى.
«پرەزيدەنتتىڭ ايتۋىنشا, تۋريزم ەل ەكونوميكاسىنىڭ جاڭا ءوسۋ نۇكتەسىنە اينالۋعا ءتيىس. ماسەلەن, ەگەر 2020 جىلى ەلگە نەبارى 2 ملن تۋريست كەلگەن بولسا, 2024 جىلى ولاردىڭ سانى 15 ملن-نان اسىپ, سالانىڭ جىلدىق تابىسى 1,2 ترلن تەڭگەگە جەتتى. بۇل تۋرزيم سالاسىنىڭ ومىرشەڭدىگى مەن تۇراقتىلىعىن, سونداي-اق ەلىمىزدىڭ باي مادەني-رۋحاني مۇراسىنا جوعارى قىزىعۋشىلىق بار ەكەنىن كورسەتەدى. مەملەكەت باسشىسى جەرگىلىكتى اتقارۋشى ورگاندارعا تۋريزم ينفراقۇرىلىمىن دامىتۋعا ەرەكشە كوڭىل ءبولىپ, وسى جۇمىستىڭ ساپاسىنا جاۋاپكەرشىلىكپەن قاراۋدى تاپسىردى. سوندىقتان جەرگىلىكتى جەرلەردە ۆيزيت-ورتالىقتار قۇرۋ – كۇن تارتىبىندەگى وزەكتى ماسەلە», دەدى ول.
