كريپتوۆاليۋتا قورى – قارجىلىق تۇراقتىلىق نەگىزى

بۇل قوردىڭ باستى ماقساتى – كريپ­تو­ۆاليۋتالاردىڭ باعاسى وسكەن كەزدە ەل قازىناسىنا قوسىمشا تابىس ءتۇسىرۋ ءارى قازاقستاننىڭ قارجىلىق تۇراق­تى­لىعىن كۇشەيتۋ. مۇنداي قور جاڭا قارجى قۇرالى رەتىندە ەكونوميكانىڭ دامۋىنا سەرپىن بەرمەك.

الەمدىك تاجىريبەگە قاراساق, مۇن­داي باستامالار قازىردىڭ وزىندە كەڭىنەن دامىپ كەلەدى. اقش, قىتاي, ەۋروپانىڭ بىرقاتار مەم­لەكەت­تەرى كريپتوۆاليۋتا قور­لارىن قالىپتاستىرىپ, ولاردى ەكونوميكالىق ساياساتتىڭ ماڭىزدى بولىگىنە اينالدىردى. بۇل ەلدەردە كريپتوۆاليۋتالاردىڭ قۇنى ارتقان سايىن قورلاردىڭ تابىسى دا كوبەيىپ, بيۋدجەتكە قوسىمشا قارجى تۇسەدى. ءبىزدىڭ ەل دە وسى ۇدەرىستەن شەت قالماۋعا ءتيىس. قوردىڭ كولەمى ازىرگە تالقىلانىپ جاتىر, ءبىر ميلليارد دوللارعا ما, ەكى ميلليارد دول­لارعا ما, ءالى ناقتى شە­شىم قابىل­­دانعان جوق. سونداي-اق قاي كريپ­تو­ۆا­ليۋتاعا باسىمدىق بەرى­لە­تىنى دە ءالى انىقتالادى.

بۇل باستاما Alatau City جوباسىمەن تىكەلەي بايلانىستى. Alatau City  ەلىمىز ءۇشىن يننوۆاتسيالىق سەرپىلىس اكەلەتىن, تەحنولوگيالىق سىناقتار مەن تاجىريبەلەر جۇرگىزۋگە ارنالعان ارنايى ايماق بولادى. مۇندا جاڭا يدەيا­لاردى سىناپ كورۋگە مۇمكىندىك تۋادى: ۇشاتىن تاكسيلەر, پيتستسا جەتكىزەتىن دروندار, جاساندى ينتەللەكتىگە نەگىز­دەل­گەن باسقارۋ جۇيەلەرى, ۇيدەن ۇيگە جال­عاساتىن كانات جولدارى سياقتى شە­شىمدەر وسى جەردە جۇزەگە اسۋى مۇمكىن. الماتى مەن استانادا مۇنداي جوبا­لاردى ىسكە اسىرۋ قيىن, سەبە­بى بۇل قالا­لاردا حالىق تىعىز ورنا­­لاسقان, ينفراقۇرىلىم بۇرىننان قالىپ­تاسقان. ال Alatau City جاڭا كەڭىستىك رەتىندە بارلىق يننوۆاتسيالىق باس­تا­مانى سىناپ كورۋگە جول اشادى.

بولاشاقتا Alatau City تولىق­قاندى «اقىلدى قالاعا» اينالۋى ىقتيمال. مۇندا جاساندى ينتەللەكت نەگىزىندە جۇمىس ىستەيتىن اكىم­شىلىك باسقارۋ جۇيەسى ورناتىلىپ, ين­نوۆاتسيالىق ستارتاپتار مەن تاجىري­بەلىك سىناق الاڭدارى دامۋى مۇمكىن. ارنايى رەتتەۋشىلىك ايماق قۇرىلسا, الەمدىك ستارتاپتار مەن تەحنولوگيالىق ينۆەس­تورلار قازاقستانعا قىزىعۋشىلىق تانىتادى. جوبا جۇزەگە اسقان جاعدايدا ەلىمىزگە ءتۇرلى ينجەنەرلەر, IT-مامان­­دار, عالىمدار كەلىپ, ءوز يدەيالارىن ىسكە اسى­رۋعا مۇمكىندىك الادى. بۇل ەلى­مىز­دى وڭىر­لىك تەحنولوگيالىق حابقا اينال­دىرۋعا جول اشادى.

سونداي-اق پرەزيدەنت جولداۋىندا اتاپ وتىلگەندەي, ەلىمىزدىڭ جاڭا ەكونوميكالىق باعىتى تسيفرلاندىرۋ مەن يننوۆاتسياعا نەگىزدەلۋگە ءتيىس. كريپتوۆاليۋتا قورى مەن Alatau City وسى ستراتەگيانىڭ ءبىر بولىگىنە اينالۋى مۇمكىن. بۇل جوبالار ەل ەكونوميكاسىنا جاڭا ينۆەستيتسيالار تارتۋعا, جاڭا جۇمىس ورىندارىن اشۋعا, تەحنولوگيالىق پروگرەستى جەدەلدەتۋگە جانە قازاقستاننىڭ حالىقارالىق دەڭ­گەي­دەگى بەدەلىن ارتتىرۋعا ىقپال ەتەدى.

مۇنداي قادامدار ەلىمىزدى جاڭا ەكونوميكالىق داۋىرگە جەتەلەيدى. كريپتوۆاليۋتا قورى – قارجىلىق تۇراقتىلىقتى ارتتىراتىن قۇرال عانا ەمەس, سونىمەن قاتار ەلىمىزدى ين­نو­ۆاتسيالىق تەحنولوگيالاردىڭ ورتا­لى­عى­نا اينالدىرۋعا باعىتتالعان ۇلكەن مۇمكىندىك.

ايبار ولجاەۆ,

ەكونوميست