فوتو: قورعانىس مينيسترلىگى
قورعانىس مينيسترلىگىنىڭ حابارلاۋىنشا, جاتتىعۋ بارىسىندا تاكتيكالىق, اتىس, ساپتىق, مەديتسينالىق جانە ينجەنەرلىك دايىندىق قامتىلعان. سونداي-اق اسكەري بولىمشەلەر قۇرامىندا بىرلەسكەن ءىس-قيمىل جاساۋعا, توتەنشە جاعدايلاردا ارەكەت ەتۋگە جانە ستراتەگيالىق نىسانداردى قورعاۋعا باسا نازار اۋدارىلادى.
«اسكەري جيىندار – ۇلتتىق قاۋىپسىزدىك جۇيەسىنىڭ ماڭىزدى ەلەمەنتى. ءبىز اسكەري مىندەتتىلەردىڭ قىزمەت بارىسىندا العان بىلىمدەرى مەن داعدىلارىن وزەكتەندىرىپ قانا قويماي, ولاردى اۋماقتىق قورعانىستىڭ زاماناۋي تالاپتارىنا سايكەس ارەكەت ەتۋگە ۇيرەتەمىز», دەدى استانا قالاسىنىڭ قورعانىس ىستەرى جونىندەگى دەپارتامەنتىنىڭ باستىعى پولكوۆنيك فارحات قۇرمانعاجينوۆ.
جيىنعا قاتىسۋشىلار ءارتۇرلى سالانىڭ وكىلدەرى. اتاپ ايتساق, پەداگوگتار, كاسىپكەرلەر, مەملەكەتتىك قىزمەتكەرلەر, ينجەنەرلەر مەن جۇرگىزۋشىلەر. ولار ۋاقىتشا جۇمىس ورنىنان قول ءۇزىپ, ەلدىڭ قورعانىس قابىلەتىن نىعايتۋعا ءوز ۇلەسىن قوسىپ وتىر.
زاپاستاعى اعا لەيتەنانت, كۆازيمەملەكەتتىك سەكتوردىڭ قىزمەتكەرى باۋىرجان تاتتىمبەكوۆ بۇل جيىنعا ەكىنشى رەت قاتىسۋدا. بۇعان دەيىن ول 2018 جىلى قۇرلىق اسكەرلەرىنىڭ اسكەري ينستيتۋتىندا دايىندىقتان وتكەن.
«مۇنداي جيىندار داعدىلاردى جەتىلدىرۋگە ءارى جاڭا ءبىلىم الۋعا جاقسى مۇمكىندىك بەرەدى. بۇل – وتان قاۋىپسىزدىگىنە ناقتى ۇلەس قوسۋدىڭ جولى. اسكەري مىندەتتىلەر ارقاشان ەلدى قورعاۋعا دايىن بولۋى ءتيىس» دەدى ول.
ايتا كەتەيىك, اسكەري جيىن 17 قىركۇيەككە دەيىن جالعاسادى. قولدانىستاعى زاڭعا سايكەس, بۇل كەزەڭدە اسكەري مىندەتتىلەردىڭ جۇمىس ورنى مەن ورتاشا ەڭبەكاقىسى ساقتالادى.
