«قوعامدا وسى قاعيدانى تۇبەگەيلى ورنىقتىرۋ ءۇشىن بارلىق قۇزىرلى ورگاندار اراسىندا ورتاق كوزقاراس پەن ورتاق ۇستانىم بولۋعا ءتيىس. بۇل – ەڭ الدىمەن, ەشقانداي قۇقىق بۇزۋشىلىققا جول بەرمەۋ قاعيداسى, ياعني كەز كەلگەن زاڭسىزدىققا قارسى تۇرۋ دەگەن ۇستانىم. سوندىقتان مەملەكەتتىك ورگانداردىڭ وسى باعىتتاعى جۇمىسىن بارىنشا قولداۋ قاجەت. سوندا عانا ەلىمىزدە قۇقىق بۇزۋشىلىققا, وزبىرلىق پەن زورلىق-زومبىلىققا قارسى سانا-سەزىم قالىپتاسادى, قوعامعا جات كەز كەلگەن ارەكەتكە توزبەۋشىلىك پايدا بولادى», – دەدى مەملەكەت باسشىسى.
پرەزيدەنت قوعامداعى كەلەڭسىز قۇبىلىستارعا دا نازار اۋداردى.
«اشىعىن ايتۋىمىز كەرەك, قازىرگى تاڭدا ادامداردا دورەكى سويلەپ, ءبىر-بىرىنە ەرەگىسىپ, جاعا جىرتىساتىن ادەت بار. وسىنداي كەلەڭسىز وقيعالاردى, اسىرەسە, قوعامدىق ورىنداردا, جول بويىندا ءجيى كورۋگە بولادى. وكىنىشكە قاراي, سولاردىڭ ىشىندە ايقاي-شۋ شىعاراتىن, بالاعات سوزدەر ايتىپ, قوعامدىق ءتارتىپتى بۇزاتىن ايەلدەر دە بار. بۇل – مادەنيەتتى, وركەنيەتتى قوعامعا جاراسپايتىن قىلىق, ەلىمىزدىڭ حالىقارالىق قوعامداستىقتاعى بەدەلىنە زيان كەلتىرەتىن قۇبىلىس», – دەدى ول.
قاسىم-جومارت توقاەۆ مۇنداي ادەتتەن تۇبەگەيلى ارىلۋ قاجەتتىگىن اتاپ ءوتتى: «وزىق ويلى ۇلت بولۋ ءۇشىن مۇنداي جاعىمسىز ادەتتەن تۇبەگەيلى ارىلۋىمىز كەرەك. ۇلى اباي ء“بىرىڭدى قازاق, ءبىرىڭ دوس, كورمەسەڭ ءىستىڭ ءبارى بوس” دەپ بەكەر ايتپاعان. مادەنيەت پەن ادەپ, تاربيە مەن ءتالىم ءاربىر ازاماتتىڭ, ءاربىر وتباسىنىڭ وزىنەن باستالۋى قاجەت».
مەملەكەت باسشىسى ەلدىڭ تۇراقتىلىعى مەن بىرلىگىن ساقتاۋدىڭ تاريحي ماڭىزىن دا جەتكىزدى.
«قازىرگى ب ۇلىڭعىر زاماندا ەڭ باستى مىندەت – ەلىمىزدىڭ ەگەمەندىگىن, جەرىمىزدىڭ تۇتاستىعىن نىعايتۋ. ول ءۇشىن بىرلىگىمىز بەكەم بولۋى كەرەك. حالقىمىز تاتۋ بولسا, ىشكى احۋال تۇراقتى بولسا, ءبىز بارلىق قيىندىقتى جەڭەمىز. كەز كەلگەن كەدەرگىدەن وتەمىز. سوندىقتان جۇرتىمىزدى ەل تىنىشتىعىن باعالاي بىلۋگە, ساقتاي بىلۋگە شاقىرامىن», – دەدى پرەزيدەنت.
سونداي-اق ول ءپاتريوتيزمنىڭ ءمانى زامان تالابىنا ساي وزگەرىپ جاتقانىن ايتتى.
ء«اربىر ازامات مەملەكەتشىل, وتانشىل بولۋى كەرەك. بۇگىندە پاتريوتيزم دەگەن ءسوزدىڭ سيپاتى, مازمۇنى وزگەرىپ جاتىر. بۇرىن بۇل ۇعىم نەگىزىنەن ءداستۇرلى قۇندىلىقتارمەن ولشەنەتىن, ءتىل, مادەنيەت, رۋحانيات ماسەلەسى ۇلتتىق مۇددەنىڭ وزەگى رەتىندە سانالاتىن. ارينە, بۇل دۇرىس, ارقايسىسى ۇلت بولمىسىنىڭ ارقاۋى. ونى بىزدەن ەشكىم تارتىپ المايدى, وعان الاڭداۋعا ەش نەگىز جوق», – دەدى قاسىم-جومارت توقاەۆ.
