فوتو: اقوردا
«تاعى ءبىر ماڭىزدى ماسەلە, بۇل – تۋريزم. جالپى, بۇل سالادا ءبىراز تۇيتكىلدى ماسەلە بار. شىنىن ايتۋ كەرەك, كاسىبي كادرلار تاپشى. وسى سالاداعى باسەكەگە قابىلەتىمىز ءالى دە شامالى», دەدى پرەزيدەنت.
مەملەكەت باسشىسى شىلدە ايىندا تۋريستىك جەرلەردىڭ بارلىعىن رەتكە كەلتىرۋ تۋرالى تاپسىرما بەرگەن ەدى. جۇرت ءجيى باراتىن دەمالىس ورىندارىنان بولەك, بولاشاعى زور باسقا دا باعىتتاردىڭ الەۋەتىن ارتتىرۋ ماڭىزدى ەكەنى اتاپ ءوتىلدى.
قاسىم-جومارت توقاەۆ مىندەتتەردىڭ ارا-جىگىن اجىراتىپ, جەرگىلىكتى اتقارۋشى ورگانداردىڭ ءاردايىم تۋريزم ينفراقۇرىلىمىن جان-جاقتى دامىتۋعا باسا ءمان بەرىپ, وسى جۇمىسقا جاۋاپتى بولاتىنىن ەسكە سالدى. ال شەتەلدەن تۋريستەر تارتۋ ماسەلەسى جانە وتاندىق تۋريزم ساياساتىن زاڭ تۇرعىسىنان قامتاماسىز ەتۋ ورتالىق ورگانداردىڭ نازارىندا بولادى.
«وسى ورايدا, الماتى قالاسى مەن الماتى وبلىسىنداعى تاۋ ءتۋريزمى مەن تاۋ شاڭعىسى تۋريزمىنە ارنايى توقتالعىم كەلەدى. قازىرگى تاڭدا بۇل باعىتتاعى ەڭ وزەكتى ماسەلە – زاماناۋي ينفراقۇرىلىم سالۋ. ەگەر وسى مىندەتتى ويداعىداي ورىنداساق, ەلىمىزدىڭ كۋرورتتارى جەر جۇزىنە تانىلىپ, قازاقستاننىڭ بەتكە ۇستار ۇلتتىق برەندى بولماق», دەدى مەملەكەت باسشىسى.
