فوتو: اقوردا
«تسيفرلىق قۇراداردى پايدالانا وتىرىپ جەر قويناۋىنىڭ زاماناۋي كارتاسىن جاسايتىن ۋاقىت كەلدى. مۇنداي قادام كەن ورىندارىنىڭ الەۋەتىن جاڭا ساپالىق تۇرعىدان باعالاۋعا مۇمكىندىك بەرەدى. بۇل جۇمىسقا دا حالىقارالىق ساراپشىلاردى تارتۋعا بولادى. ارينە, عىلىمي نەگىزى بولماسا بارلاۋ جۇمىسىن ويداعىداي جۇرگىزۋ مۇمكىن ەمەس», دەدى قاسىم-جومارت توقاەۆ.
مەملەكەت باسشىسى گەولوگيالىق بارلاۋ جانە جەر قويناۋىن يگەرۋ سالاسىنداعى رەفورمالاردىڭ زاڭ جۇزىندەگى جانە ءىس جۇزىندەگى راسىمدەرىن جىل سوڭىنا دەيىن اياقتاۋدى تاپسىردى.
«كەلەسى جىلدىڭ ورتاسىنا دەيىن وزىق حالىقارالىق ستاندارتتارعا ساي سەرتيفيكاتى بار زەرتحانا اشۋ كەرەك. ونى ۇلتتىق گەولوگيالىق قىزمەتتىڭ بازاسىندا قۇرعان ءجون. جەر قويناۋىنا قاتىستى مالىمەتتىڭ ءبارىن, ەڭ الدىمەن, جاساندى ينتەللەكت تەحنولوگياسىن ەنگىزۋ ارقىلى جۇيەلەپ, تسيفرلاندىرۋ قاجەت», دەدى پرەزيدەنت.
