مينيسترلىكتىڭ مالىمەتىنشە, استانا, بىشكەك جانە تاشكەنت 2026 جىلعا دەيىنگى سۋ-ەنەرگەتيكالىق بالانس بويىنشا كەلىسىمگە كەلگەن. 2025 جىلدىڭ 7 قىركۇيەگىندە شولپان-اتا قالاسىندا وتكەن كەزدەسۋدە ەنەرگەتيكا ءمينيسترى ەرلان اقكەنجەنوۆ قىرعىزستان جانە وزبەكستان وكىلدەرىمەن بىرقاتار حاتتامالارعا قول قويعان.
كەلىسىمدەر شەڭبەرىندە ءۇش نەگىزگى باعىت قاراستىرىلعان. توقتاعۇل سۋ قويماسىنان سۋ جىبەرۋ ءتارتىبى رەتتەلىپ, ەلىمىزدىڭ وڭتۇستىگى سۋارمالى سۋمەن قامتاماسىز ەتىلەدى. سونداي-اق قازاقستان مەن وزبەكستان قىرعىزستانعا ەلەكتر ەنەرگياسىن جەتكىزەدى, بۇل ءۇشىن رەسەي ەنەرگياسى قازاقستاننىڭ جۇيەلەرى ارقىلى ترانزيتتەلەدى. ءۇشىنشى كەلىسىم بويىنشا وزبەكستان 2026 جىلدىڭ ناۋرىزىنان جەلتوقسانىنا دەيىن قازاقستانعا شامامەن 900 ميلليون كۆت-ساعات ەلەكتر ەنەرگياسىن جەتكىزەدى. بۇل كەزەڭدە ەلدىڭ وڭتۇستىگىندەگى ەلەكتر ستانتسيالارى جاڭعىرتىلادى.
ەنەرگەتيكا ءمينيسترى ەرلان اقكەنجەنوۆ كەلىسىمدەردىڭ ماڭىزدىلىعىن اتاپ ءوتتى.
«قول قويىلعان حاتتامالار – كورسەتكىشتەرى, مەرزىمى مەن باعالارى كورسەتىلگەن ناقتى جۇمىس قۇجاتى. ءبىز جەتكىزۋدىڭ تەحنيكالىق شارتتارىن ناقتىلاپ, وزەكتى ماسەلەلەردى شەشتىك. قازاقستان ءوز مىندەتتەمەلەرىن تولىق ورىندايدى جانە سەرىكتەستەر تاراپىنان دا وسىنداي ۇستانىمدى كۇتەدى», دەدى مينيستر.
مينيسترلىك دەرەگىنشە, 2024 جىلى قازاقستاندا ەلەكتر ەنەرگياسىن تۇتىنۋ 4,3 پايىزعا ارتقان. قازىرگى تاڭدا ەل ەلەكتر ەنەرگياسىنىڭ نەگىزگى بولىگىن رەسەيدەن يمپورتتايدى.
