بۇعان دەيىن (1998 جىلدىڭ 20 قاڭتارىنان باستاپ) مەرەكە 22 قىركۇيەكتە تويلانىپ كەلگەن. ال 2017 جىلعى «قازاقستان رەسپۋبليكاسىندا مەرەكە كۇندەر تىزبەسىن بەكىتۋ تۋرالى» قاۋلىسىنا سايكەس, اتاۋلى كۇن 5 قىركۇيەككە اۋىستىرىلدى. مەرەكەنىڭ جاڭادان بەلگىلەنۋ سەبەبى – «ۇلتتىڭ ساقتالۋىنا دا, جوعالۋىنا دا سەبەپ بولاتىن نارسەنىڭ قۋاتتىسى – ءتىل» دەپ ۇلاعاتتى ءسوز قالدىرعان, قازاق حالقىنىڭ تاعدىرى مەن ءتىلى ءۇشىن كۇرەسكەن الاش ارىسى, ۇلت ۇستازى احمەت بايتۇرسىن ۇلىنىڭ تۋعان كۇنىمەن بايلانىستى. بۇگىن بارشا قازاقستاندىق قازاق ءالىپبيىنىڭ نەگىزىن سالعان عالىمنىڭ تۋعان كۇنىندە تىلدەر مەرەكەسىن اتاپ وتەدى.
قازاقستان – كوپۇلتتى مەملەكەت. قازىرگى تاڭدا ەلىمىزدە 130-دان استام ۇلت پەن ۇلىس وكىلدەرى بەيبىت ءومىر ءسۇرىپ, ەڭبەك ەتۋدە. ولار جۇزدەن استام ءتىلدى قولدانادى. مەملەكەتتىك ءتىل – قازاق ءتىلى, سونداي-اق ورىس ءتىلى رەسمي تۇردە قولدانىلادى. ءاربىر ەتنوستىڭ انا ءتىلىن, مادەنيەتى مەن ءداستۇرىن دامىتۋىنا جاعداي جاسالعان.
تىلدەر كۇنى – حالىقتار اراسىنداعى دوستىق پەن بىرلىكتى دارىپتەيتىن, ەلدىڭ باستى قۇندىلىقتارىنىڭ ءبىرى – مەملەكەتتىك ءتىلدىڭ مارتەبەسىن ارتتىرۋعا باعىتتالعان مەرەكە. بۇل كۇننىڭ باستى ماقساتى – قازاقستانداعى ءاربىر ازاماتتىڭ انا ءتىلىن قۇرمەتتەۋگە, مەملەكەتتىك ءتىلدى دامىتۋعا, مادەنيەتارالىق تۇسىنىستىك پەن سىيلاستىقتى نىعايتۋعا شاقىرۋ.
قازاقستان حالقى تىلدەرى كۇنى – ەل بىرلىگىنىڭ, دوستىق پەن ىنتىماقتاستىقتىڭ جارقىن كورىنىسى.
