سۋرەتتەردى تۇسىرگەن – اۆتور
مەملەكەت باسشىسى 2025 جىلدى جۇمىسشى ماماندىقتارى جىلى دەپ جاريالاعانى ءمالىم. بۇل باستاما – ەڭبەك ادامىنا دەگەن قۇرمەتتىڭ ناقتى كورىنىسى. وسى ورايدا ءبىز الماتى وبلىسىنىڭ قىزمەت كورسەتۋ جانە تاماقتاندىرۋ سالاسىنداعى يننوۆاتسيالىق تەحنولوگيالار كوللەدجىنە ارنايى ات باسىن بۇرىپ, وقۋ ورنىنىڭ تىنىس-تىرشىلىگىمەن تانىسىپ قايتتىق. مۇنداعى شاكىرتتەر مەن شەبەرلەردىڭ ەڭبەك الەمىنە كوڭىل سۇيسىنەدى.
1978 جىلدان بەرى ەلىمىزگە قاجەتتى جۇمىسشى كادرلاردى ۇزدىكسىز دايارلاۋمەن اينالىساتىن تاجىريبەلى وقۋ ورنى شاشتاراز, تاماقتاندىرۋدى ۇيىمداستىرۋ, تىگىن ءوندىرىسى, كيىمدەردى ۇلگىلەۋ, ءسان جانە ديزاين, تۋريزم, قوناقۇي سەرۆيسى سەكىلدى التى باعىت بويىنشا زاماناۋي ستاندارتتارعا ساي ءبىلىم بەرىپ كەلەدى.
كوللەدج ديرەكتورى باقىتگۇل كىشىباەۆانىڭ ايتۋىنشا, كەيىنگى جىلداردىڭ بەدەرىندە جاستاردىڭ كاسىپتىك ماماندىقتارعا قىزىعۋشىلىعى ارتا تۇسكەن. بۇل – قۋانتارلىق ءۇردىس. مەملەكەت تاراپىنان بەرىلەتىن ء«بىلىم بەرۋ گرانتتارى», «جاستار تاجىريبەسى», «العاشقى جۇمىس ورنى» سىندى باعدارلامالار تالاپكەرلەردىڭ جىگەرىنە سەرپىن بەرگەن.
«بۇگىندە كوللەدجدە 960 شاكىرت ءبىلىم الادى. ولاردىڭ بارلىعى مەملەكەت ەسەبىنەن تەگىن گرانتتارمەن قامتىلعان. ولارعا كۇنىنە ءبىر ۋاقىت ىستىق تاماق بەرىلەدى, جاتاقحانا دا قاراستىرىلعان. تەحنيكالىق جانە كاسىپتىك ءبىلىم بەرۋ – تەك ديپلوم الۋ ەمەس, ناقتى كاسىپ يەسى اتانۋدىڭ جولى. شەبەرلىگىمەن ەلگە قىزمەت ەتىپ, ادال ەڭبەگىمەن تابىس تاباتىن جاستاردىڭ قاتارى ارتقان سايىن, قوعام دا جاڭارىپ, ۇلتتىق ەكونوميكانىڭ ىرگەتاسى بەكي تۇسپەك. وندىرىستىك ورىندارمەن تىعىز قارىم-قاتىناس ورناتىپ كەلەمىز. بۇل ءوز كەزەگىندە تۇلەكتەرىمىزدىڭ ەڭبەك نارىعىندا باسەكەگە قابىلەتتى, ءارى سۇرانىسقا يە مامان رەتىندە قالىپتاسۋىنا جول اشادى. شەتەلدىك كاسىپورىندارمەن اراداعى ىنتىماقتاستىق – حالىقارالىق تاجىريبە الماسۋعا مۇمكىندىك تۋدىرىپ وتىر. كاسىپتىك ءبىلىمدى دامىتۋ ارقىلى ءبىز تەك جۇمىسسىزدىقتى ازايتپايمىز, سونىمەن قاتار ەل ەكونوميكاسىنىڭ ناقتى سەكتورىن بىلىكتى ماماندارمەن قامتيمىز», دەيدى باقىتگۇل كىشىباەۆا.
كوللەدج مۇعالىمدەرىنىڭ ايتۋىنشا, ستۋدەنتتەردىڭ كوبى وقۋ بىتىرمەي جاتىپ-اق تۇراقتى جۇمىس تابادى. ويتكەنى قازىرگى تاڭدا نارىقتا بىلىكتى جۇمىسشى تاپشى. ال شەبەرلىگى شىڭدالعان, كاسىبىن سۇيەتىن جاستارعا قاشان دا جول اشىق.
كوللەدج حالىقارالىق ىنتىماقتاستىقتى بەلسەندى دامىتىپ كەلەدى. وقۋ ورنى بىرنەشە شەتەلدىك ءبىلىم ۇيىمدارىمەن جانە كاسىپورىندارمەن ىنتىماقتاستىق تۋرالى مەموراندۋمعا قول جەتكىزگەن. كوللەدج شاكىرتتەرى كۇنى بۇگىن تۇركيا, بىرىككەن اراب امىرلىگى, فرانتسيا سەكىلدى دامىعان ەلدەردىڭ ۇزدىك قوناقۇيلەرى مەن مەيرامحانالارىندا باس اسپاز سەكىلدى جاۋاپتى قىزمەتتەردى ابىرويمەن اتقارىپ ءجۇر. جوعارىدا ايتىلعانداي, ەلىمىزدە دە مۇنداي ماماندىق يەلەرى جوعارى جالاقىعا يە. كوللەدج ۇستازدارى ەلىمىزدەگى ۇزدىك مەيرامحانالاردا اسپاز بولىپ ەڭبەك ەتەتىن شاكىرتتەرىنىڭ الدى ايىنا 1 ملن تەڭگەگە دەيىن جالاقى الاتىنىن ايتادى.
ء«بىز مەكتەپتەرگە ءتۇرلى كەزدەسۋلەرگە بارامىز. سول سەكىلدى تۇلەكتەردى كوللەدج قابىرعاسىنا شاقىرىپ كاسىپتىك ماماندىقتاردىڭ ارتىقشىلىعى تۋرالى ءدارىس وتكىزەمىز, ىشتەگى تسەحتارمەن تانىستىرامىز. كەيىنگى جىلدارى مەكتەپ بىتىرۋشىلەردىڭ جۇمىسشى ماماندىقتارعا قىزىعۋشىلىعى ارتقانى بايقالادى. ماسەلەن بيىل بىزگە 550 بالا وقۋعا ءتۇستى. ستۋدەنتتەرىمىز پراكتيكا مەن تەوريانى قاتار مەڭگەرىپ, ناعىز بىلىكتى مامانعا اينالادى. مەگاپوليستەگى ءىرى جۇمىس بەرۋشى ۇيىمدارمەن تىعىز بايلانىس ورناتا وتىرىپ, شاكىرتتەرىمىزدىڭ تۇراقتى جۇمىسقا ورنالاسۋىنا مۇمكىندىك تۋدىرامىز», دەيدى ارنايى ءپان وقىتۋشىسى جازيرا الماسباەۆا.
كوپتەگەن مەملەكەتتە مۇنداي وقۋ ورىندارىندا ءبىلىم الىپ جۇرگەن شاكىرتتەر وزدەرى جاساپ شىققان ونىمدەرىن ساتۋ ارقىلى قىرۋار پايدا تابادى. وكىنىشتىسى, بىزدە مۇنداي مۇمكىندىك قاراستىرىلماعان. ەگەر وسى ماسەلە زاڭمەن رەتتەلسە, ءبىلىم ورداسى ءوزىن قارجىلاندىرۋعا جول اشار ەدى. شەتەلدىك تاجىريبەدەگى وسى تەتىك ەسكەرىلسە دەيدى ماماندار.
الماتى
