كورمە – فيلوسوفيا, ونەر جانە ءداستۇرلى جاپون قولونەرىنىڭ تۇيىسكەن تۇسى. الەكس سوربون تۋىندىلارىندا ارارە مەن ماكي-ە سەكىلدى كونە زەرگەرلىك تەحنيكالاردى قولدانا وتىرىپ, زاماناۋي تاسىلدەرمەن ۇندەستىك تابادى. بۇل – كونەنى قۇرمەتتەپ, جاڭانى تانىعان سۋرەتكەردىڭ شىعارماشىلىق مانەرى.
الەكس سوربون – حالىقارالىق دەڭگەيدە مويىندالعان اۆتور. ونىڭ تۋىندىلارى ترەتياكوۆ گالەرەياسى سياقتى جەتەكشى ارت-الاڭداردا ۇسىنىلعان. 2017 جىلى ماسكەۋ حالىقارالىق ونەر كورمەسىنىڭ جەڭىمپازى اتانعان شەبەر بۇگىنگى تاڭدا كونە شەبەرلىك پەن زاماناۋي بەينەلەۋ ءتاسىلىن ۇشتاستىرىپ, جاڭا ەستەتيكالىق كەڭىستىك قالىپتاستىرىپ ءجۇر.
كورمەنىڭ اشىلۋ سالتاناتىندا مۋزەي ديرەكتورىنىڭ مۋزەيلىك مەنەدجمەنت جانە ماركەتينگ جونىندەگى ورىنباسارى ارايلى بالاەۆا اۆتوردى ۇجىم اتىنان قۇتتىقتاپ, سوربون ەڭبەكتەرىن «مادەنيەتتەر اراسىنداعى جارقىن ديالوگتىڭ ايعاعى» رەتىندە اتاپ ءوتتى.
جيىن بارىسىندا قوعام, مادەنيەت جانە ونەر قايراتكەرلەرى دە جىلى لەبىزدەرىن ءبىلدىرىپ, كورمەنىڭ يدەيالىق قۋاتىنا جوعارى باعا بەردى.
كورمەگە سۋرەتشىنىڭ تاڭداۋلى 50-گە جۋىق تۋىندىسى قويىلعان. ول 2025 جىلعى 24 قىركۇيەككە دەيىن جالعاسادى.
