«چيكاگو – ەڭ قورقىنىشتى جانە ەڭ قاۋىپتى قالا. يللينويس شتاتىنىڭ گۋبەرناتورى دجەي پريتتسكەرگە شۇعىل كومەك قاجەت, بىراق ول ازىرگە مۇنى بىلمەيدى», دەپ اتاپ ءوتتى ترامپ.
پرەزيدەنتتىڭ ايتۋىنشا, سوڭعى دەمالىس كۇندەرى چيكاگودا كەمىندە 54 ادام وق جاراقاتىن الىپ, 8 ادام قازا تاپقان. ول جاعدايدىڭ جەدەل ارالاسۋدى تالاپ ەتەتىنىن ايتىپ, قالانى قاۋىپسىز ەتەمىن دەپ ۋادە بەردى.
«مەن قىلمىس ماسەلەسىن تەز شەشەمىن. ۆاشينگتوندا قالاي ىستەسەم, چيكاگو دا سولاي قايتادان قاۋىپسىز بولادى», دەدى ترامپ.
ايتا كەتەيىك, 12 تامىزدا پەنتاگون اقش ۇلتتىق گۆاردياسىنىڭ 800 اسكەري قىزمەتكەرىن ۆاشينگتونعا جىبەردى. 21 تامىزدا ترامپ گۆارديا ساربازدارىمەن بىرگە ەل استاناسىنىڭ كوشەلەرىنە شىعىپ, قىلمىسپەن كۇرەس جۇمىستارىن باقىلاعان. پرەزيدەنت پوليتسيا مەن اسكەري قىزمەتكەرلەردىڭ ەڭبەگىن جوعارى باعالاپ, ولاردىڭ ارقاسىندا ەلدەگى قۇقىقبۇزۋشىلىق دەڭگەيى ايتارلىقتاي تومەندەگەنىن ايتتى.
ونىڭ دەرەگىنشە, ۇلتتىق گۆارديا ەنگىزىلگەننەن كەيىن ۆاشينگتوندا ءبىر اپتا ىشىندە بىردە-ءبىر كىسى ءولتىرۋ فاكتىسى تىركەلمەگەن, ال قىلمىس دەڭگەيى 87%-عا تومەندەگەن.
