«مۇگەدەكتىگى بار ادامدارعا ومىرلىك ماڭىزى بار تەحنيكالىق قۇرالدار كونترافاكتىلى, قولدانىستا بولعان, توزىعى جەتكەن كۇيدە ۇسىنىلادى. ال جاڭا ءارى ساپالى ءونىم الۋ مۇمكىندىگى جوقتىڭ قاسى. پورتال بىرتە-بىرتە «بازارعا» اينالدى. بۇل جۇيە ازاماتتارعا ەمەس, دەلدالدارعا قىزمەت ەتىپ وتىر», دەدى دەپۋتات.
كەنجەعۇل سەيتجان ناقتى مىسال رەتىندە اناتولي ميگايدىڭ جاعدايىن كەلتىردى. ول الەۋمەتتىك پورتال ارقىلى قىمبات وقۋ قۇرىلعىسىن العانىمەن, تاۋار جالعان ءارى بۇرىن پايدالانىلعان بولىپ شىققان. جەتكىزۋشىنى پورتالدان الىپ تاستاۋعا عانا شارا قولدانىلعانىمەن, كىنالىلەر جازالانباعان, ال مۇگەدەكتىگى بار ازاماتتىڭ قۇقىعى قورعالماعان.
سونىمەن قاتار, دەپۋتات سانيتارلىق-گيگيەنالىق قۇرالداردى جەتكىزۋ ىسىندە دە كوپتەگەن زاڭبۇزۋشىلىق بار ەكەنىن اتاپ ءوتتى. ونىڭ ايتۋىنشا, مەملەكەت پورتال ارقىلى پامپەرستەردى تەگىن تاراتقان ساتتەن باستاپ, ولاردى قايتا ساتاتىن حابارلاندىرۋلار OLX سەكىلدى پلاتفورمالاردا كوبەيىپ كەتكەن.
«قالىپتاسقان جۇيە كىمنىڭ مۇددەسى ءۇشىن جاسالدى؟ مۇمكىندىگى شەكتەۋلى جانداردىڭ مۇددەسىنە ساي كەلمەيتىنى انىق! نەلىكتەن ەرەكشە قاجەتتىلىكتەرى بار ازاماتتار وسى پورتالدا تاۋارلار مەن قىزمەتتەرگە تاپسىرىس بەرۋى كەرەك, ەگەر ەلىمىزدە مۇمكىندىگى شەكتەۋلى جاندارعا ارنالعان تاۋارلاردى شىعاراتىن بىردە-ءبىر ءوندىرۋشى بولماسا, تەك دەلدال ساتۋشىلار بار بولسا, كاسىبي دايارلىعى مەن ماتەريالدىق-تەحنيكالىق بازاسى تولىق بولماعان جاعدايدا دا كەز كەلگەن ادام قىزمەت كورسەتۋشى بولا الادى. نەلىكتەن مەملەكەت پورتالعا جۇكتەلگەن فۋنكتسيالاردى ورىنداماسا, ونى دامىتۋعا جانە قولداۋعا اقشا جۇمساۋى كەرەك؟ نەلىكتەن ساپاسىز تاۋارلار مەن قىزمەتتەرگە قاراجات ءبولۋ كەرەك؟» دەدى دەپۋتات.
بۇل رەتتە حالىق پارتياسىنىڭ فراكتسياسى كەلەسىدەي ۇسىنىستار جاسادى:
- ءار وڭىردە مۇگەدەكتىگى بار ازاماتتارعا ارنالعان تاۋارلار مەن قىزمەتتەردىڭ كورمە پاۆيلوندارىن اشۋ;
- گيگيەنالىق قۇرالداردى تەك ارنايى ورتالىقتار ارقىلى جەتكىزۋ;
- بىرقاتار الەۋمەتتىك جەڭىلدىكتەردى مونەتيزاتسيالاۋ نەمەسە ۆاۋچەرلىك جۇيەگە كوشىرۋ;
- الەۋمەتتىك قىزمەت كورسەتۋ جۇيەسىنە اۋديت جۇرگىزىپ, سىبايلاس جەمقورلىق سحەمالارىن انىقتاۋ, جاۋاپكەرشىلىكتى كۇشەيتۋ.
«قازىرگى جۇيە بيۋدجەت ەسەبىنەن ۇيىمداستىرىلعان لوتەرەياعا اينالدى: جولىڭ بولسا – ساپالىسىن الاسىڭ, بولماسا امال جوق. بۇل ادىلەتسىزدىككە نۇكتە قويۋ كەرەك», دەپ تۇيىندەدى كەنجەعۇل سەيتجان.
