نۇرسۇلتان حامزا ۇلى – باتىس قازاقستان وبلىسى, تاسقالا اۋدانى, اقتاۋ اۋىلىنىن تۋماسى. قاراپايىم اۋىل بالاسى ەرتە جاستان تارتىپكە داعدىلانىپ, ەڭبەكپەن ەسەيدى. ورال قالاسىنداعى № 4 جالپى ءبىلىم بەرەتىن مەكتەپتى ءتامامداپ, جوعارى ءبىلىم الۋ ءۇشىن قازاقستان يننوۆاتسيالىق جانە تەلەكوممۋنيكاتسيالىق جۇيەلەر ۋنيۆەرسيتەتىنە ءتۇستى. اكەسى مەن اناسى نۇرسۇلتاندى ادالدىققا, وتانسۇيگىشتىككە باۋلىدى.
ءجاسوسپىرىم كەزىنەن سپورتقا دەن قويىپ دزيۋدو كۇرەسىمەن اينالىسا باستادى, سپورت ونى ءتارتىپ پەن شىدامدىلىققا باۋلىپ, باتىلدىق پەن جەڭىسكە دەگەن جىگەرىن جانىدى. دزيۋدو كۇرەسىنەن قالالىق, وبلىستىق بىرىنشىلىكتەردە ولجا سالىپ توپ جاردى. كەيىنىرەك نۇرسۇلتاننىڭ قويان-قولتىق ۇرىسىنا قىزىعۋشىلىعى ويانىپ, شۇعىلدانىپ كورۋگە بەت بۇردى. بۇل شەشىمى ونىڭ بولاشاق جاۋىنگەرلىك ومىرىنە ايتارلىقتاي اسەر ەتتى.
مەرزىمدى اسكەري قىزمەتىن قاراعاندى قالاسىنداعى ۇلتتىق ۇلاننىڭ 6505 اسكەري بولىمىندە اتقارىپ, «ەفرەيتور» اسكەري اتاعىمەن ورالدى. اسكەري ءومىر ونى ءتارتىپ پەن جاۋاپكەرشىلىككە باۋلىدى. 2019 جىلى قازاقستان قارۋلى كۇشتەرى شەكارا كىزمەتىنىڭ 2029 اسكەري بولىمىنە كەلىسىمشارت نەگىزىندە قابىلداندى. لاۋازىمدىق مىندەتتەرىن ۇلكەن جاۋاپكەرشىلىكپەن اتقارىپ, تاجىريبەسىن شىڭداي ءتۇستى.
ارادا ەكى جىل ەتكەندە ارناۋلى ماقساتتاعى باسقارماعا اۋىستى. اسكەري جاتتىعۋلار مەن ارنايى دايىندىقتاردا ۇزدىك ناتيجە كورسەتتى. تەك دەنە دايىندىعىمەن عانا ەمەس, تاكتيكالىك ويلاۋ قابىلەتىمەن دە وزگەلەردەن دارالاندى. تىندىرىمدى ەڭبەگى جەمىسسىز بولعان جوق. تالانتتى سپورتشى 2024 جىلى العاشقى وفيتسەرلىك شەن «لەيتەنانت» اسكەري اتاعىن الدى. بۇل وفيتسەرگە زور جاۋاپكەرشىلىك جۇكتەدى. اسكەري قىزمەتپەن قاتار, سپورتتاعى جەتىستىكتەرىمەن دە تانىلدى. قويان-قولتىق ۇرىستان ورال مەن الماتى قالالارىنىڭ, وبلىستىق, رەسپۋبليكالىق تۋرنيرلەردە جەڭىسكە جەتتى. قازاقستان كۋبوگى مەن ۇقك شەكارا قىزمەتى ديرەكتورىنىڭ كۋبوگىن جەڭىپ الدى.
سونىمەن قاتار, ارناۋلى ماقساتتاعى باسقارما مەن 6505 اسكەري ءبولىمىنىڭ چەمپيونى اتاندى. وتان الدىنداعى مىندەتىن ابىرويمەن اتقارىپ جۇرگەن نۇرسۇلتان - ەل قورعانى بولۋدىڭ جارقىن ۇلگىسى. ونىڭ اسكەري قىزمەتتەگى جەتىستىكتەرى, سپورتتاعى جەڭىستەرى جانە ءومىر سىنىنداعى تاباندىلىعى جاستارعا ونەگە. ەرلىك - ەلگە قالتقىسىز قىزمەت ەتۋدەن باستالادى. نۇرسۇلتان مۇراتوۆ وسى جولدا ادال ەڭبەك ەتىپ كەلەدى.
