«Amanat» پارتياسىنىڭ «حالىقپەن بىرگە!» سايلاۋالدى باعدارلاماسى اياسىندا بوي كوتەرگەن نىسان اتا زاڭنىڭ 30 جىلدىعى مەرەكەسى قارساڭىندا پايدالانۋعا بەرىلدى. قۇرىلىسىنا مەملەكەتكە قايتارىلعان زاڭسىز اكتيۆتەردەن 263 ملن تەڭگە بولىنگەن جاڭا نىساننىڭ اشىلۋىنا تۇرعىندار تايلى-تاياعى قالماي جيىلدى.
اۋدان اكىمى قايىرجان جاقسىمبەتوۆ جالپى اۋماعى 70 سوتىق جەرگە سالىنعان 264 شارشى مەتردى قۇرايتىن جاڭا عيمارات ءبىر مەزەتتە 40 ادامعا دەيىن قابىلداۋعا مۇمكىندىك بەرەتىندىگىن اتاپ ءوتتى.
«فەلدشەرلىك-اكۋشەرلىك پۋنكت – اۋىل تۇرعىندارى ءۇشىن قولجەتىمدى ءارى ساپالى مەديتسينالىق كومەكتىڭ كەپىلى. عيمارات زاماناۋي جابدىقتارمەن تولىق قامتىلعان. مۇندا العاشقى قابىلداۋ, جۇكتى ايەلدەرگە ارنالعان ارنايى كابينەت, ەگۋ, پروتسەدۋرالىق بولمەلەر قاراستىرىلعان. اۋىز سۋ قۇبىرى, كارىز جۇيەلەرى تارتىلعان. الداعى ۋاقىتتا اۋداندا وسىنداي تاعى ەكى مەديتسينالىق پۋنكت اشۋ جوسپارلانىپ وتىر», – دەدى اۋدان باسشىسى.
«Amanat» پارتياسىنىڭ وكىلدەرى جوبانى اۋىلداعى دەنساۋلىق ساقتاۋ ساپاسىن ارتىرۋعا باعىتتالعان ماڭىزدى قادام دەپ باعالاپ وتىر. ويتكەنى ەندى تۇرعىندار دارىگەرگە قارالۋ ءۇشىن اۋدان ورتالىعىنا سابىلمايدى.
«تالداۋ تاپسىرۋ ءۇشىن ەندى اۋدان ورتالىعىنا بارۋدىڭ قاجەتى جوق. ءتىپتى قاجەت بولعان جاعدايدا قالاداعى اۋرۋحانالارعا جولداما بەرىلەدى. بۇل – پارتيانىڭ اۋىلداردا مەديتسينالىق كومەكتى جاقىنداتۋ باعىتىندا جۇرگىزىپ كەلە جاتقان جۇيەلى جۇمىسىنىڭ ناتيجەسى», – دەدى «Amanat» پارتياسى ىلە اۋداندىق فيليالىنىڭ توراعاسى الماسبەك ساتىباەۆ.
جوبانىڭ تاعى ءبىر ەرەكشەلىگى – ونىڭ قارجىلاندىرۋ كوزى. جاڭا مەديتسينالىق پۋنكتتىڭ قۇرىلىسىنا مەملەكەتكە قايتارىلعان زاڭسىز اكتيۆتەردەن بولىنگەن قاراجات جۇمسالدى. ىلە اۋدانىنىڭ پروكۋرورى باۋىرجان تولەندينوۆتىڭ ايتۋىنشا, مۇنداي باستاما – زاڭ ۇستەمدىگى مەن الەۋمەتتىك ادىلەتتىلىكتىڭ ناقتى كورىنىسى.
«وڭىردە زاڭسىز شىعارىلعان اكتيۆتەردى مەملەكەتكە قايتارۋ باعىتىندا جۇيەلى جۇمىس جۇرگىزىلىپ جاتىر. سول قاراجات ەسەبىنەن حالىققا قاجەتتى الەۋمەتتىك نىساندار سالىنباقشى. بۇگىن قولدانىسقا بەرىلگەن مەديتسينالىق پۋنكت – سونىڭ ناقتى ايعاعى. قازىردە وبلىستا وسىنداي 22 نىساننىڭ قۇرىلىسى ءجۇرىپ جاتىر», دەدى ول.
ايتا كەتەيىك, بيىل الماتى وبلىسىندا «Amanat» پارتياسىنىڭ سايلاۋالدى باعدارلاماسى اياسىندا 15 دارىگەرلىك امبۋلاتوريا, 12 فەلدشەرلىك-اكۋشەرلىك پۋنكت, 11 مەديتسينالىق پۋنكت سالۋ جوسپارلانعان.
سونىمەن قاتار اۋىلدارعا جاس مامانداردى تارتۋ ءۇشىن دە ناقتى ءىس-شارالار قولعا الىنعان. پارتيانىڭ باستاماسىمەن اسا تاپشى ماماندىق يەلەرىنە 8,5 ملن تەڭگە كولەمىندە ءبىر رەتتىك تولەم قاراستىرىلعان. تەك شارت بويىنشا دارىگەرلەر كەمىندە بەس جىل اۋىلدا قىزمەت ەتۋگە مىندەتتى.
الماتى وبلىسى
