جالپى اۋدانى 14 545 شارشى مەتردى قۇرايتىن ءبىلىم مەكەمەسى 900 ورىنعا ەسەپتەلگەن. قازىرگى تاڭدا مۇندا 900 وقۋشى ءبىلىم الۋدا. ونىڭ ىشىندە 125 بالا 1-سىنىپ تابالدىرىعىن العاش رەت اتتادى. بۇل – بالقاش قالاسىنداعى ءبىلىم بەرۋ سالاسىنداعى ەلەۋلى جاڭالىقتاردىڭ ءبىرى.
سالتاناتتى اشىلۋ راسىمىنە قاراعاندى وبلىسىنىڭ اكىمى ەرماعانبەت بولەكپاەۆ ارنايى قاتىسىپ, ۇستازدار مەن وقۋشىلاردى جاڭا وقۋ جىلىنىڭ باستالۋىمەن قۇتتىقتادى.
مەكتەپتىڭ باستى ارتىقشىلىعى – ونىڭ تولىق زاماناۋي تەحنيكالارمەن جابدىقتالۋىندا. 36 وقۋ كابينەتى, سونىڭ ىشىندە ينتەراكتيۆتى سىنىپتار, مۋلتيمەديالىق قۇرالدار, وزىق STEM زەرتحانالارى, روبوتوتەحنيكا كابينەتتەرى وقۋشىلارعا جاڭاشا ءبىلىم الۋعا مۇمكىندىك بەرەدى. وقۋشىلار ەندى تەك ءداستۇرلى ەمەس, ەلەكتروندىق رەسۋرستارمەن دە جۇمىس ىستەي الادى.
ءبىلىم بەرۋ مەكەمەسى تەك مەملەكەتتىك تىلدە وقىتىلاتىن بولادى. بۇل – ەلىمىزدىڭ مەملەكەتتىك ءبىلىم بەرۋ ساياساتىنىڭ باستى قاعيداتتارىنىڭ ءبىرى. سونىمەن قاتار, مەكتەپتە ەرەكشە ءبىلىم بەرۋ قاجەتتىلىكتەرى بار بالالارعا ارنالعان ينكليۋزيۆتى ورتا قاراستىرىلعان.
«كەلەشەك مەكتەپتەرى» جوباسى اياسىندا بوي كوتەرگەن جاڭا مەكتەپ بالقاش قالاسىنداعى وقۋشى ورىندارىنىڭ تاپشىلىعى ماسەلەسىن شەشىپ, ءوڭىردىڭ ءبىلىم بەرۋ ينفراقۇرىلىمىن دامىتۋعا ءوز ۇلەسىن قوسپاق.
