فوتو: اشىق دەرەككوز
الەۋمەتتىك زەرتتەۋ ناتيجەلەرى ازاماتتاردىڭ پرەزيدەنت ينستيتۋتىنا دەگەن سەنىمى مىقتى ەكەنىن كورسەتكەن. قاتىسۋشىلاردىڭ 82,4%-ى مەملەكەت باسشىسى قاسىم-جومارت توقاەۆقا قولداۋ بىلدىرگەن.
جاس ەرەكشەلىگى بويىنشا ەڭ جوعارى سەنىم دەڭگەيىن 18–29 جاس ارالىعىنداعى رەسپوندەنتتەر كورسەتتى – 90,3%. ودان كەيىنگى كورسەتكىشتەر: 30–45 جاس ارالىعىندا – 82,4%, 46–60 جاستا – 78,6%, ال 61 جاستان اسقاندار اراسىندا – 77,8%.
اۋىل تۇرعىندارىنىڭ سەنىمى قالا حالقىنا قاراعاندا ءسال جوعارى – تيىسىنشە 84,9% جانە 80,9%. زەرتتەۋ تابىس دەڭگەيى مەن جۇمىسپەن قامتىلۋ كورسەتكىشتەرىنە قاراماستان, ازاماتتاردىڭ سەنىم دەڭگەيى بىركەلكى ەكەنىن ايقىندادى.
كاسىپتىك سالا بويىنشا ەڭ جوعارى قولداۋدى قۇقىق قورعاۋ ورگاندارىنىڭ قىزمەتكەرلەرى بىلدىرگەن – 96,9%. سونداي-اق ءبىلىم بەرۋ سالاسىنىڭ وكىلدەرى (89,6%), مەملەكەتتىك قىزمەتشىلەر (87,1%), دەنساۋلىق ساقتاۋ ماماندارى (84,5%), اۋىل شارۋاشىلىعى قىزمەتكەرلەرى (86,2%), عىلىم (85,7%) مەن مادەنيەت جانە ونەر سالاسىنىڭ ماماندارى (85,9%) ايتارلىقتاي قولداۋ كورسەتكەن.
ساۋالناما ناتيجەسى مەملەكەت باسشىسىنا دەگەن سەنىمنىڭ تۇراقتى ءارى جوعارى دەڭگەيدە ەكەنىن دالەلدەدى. بۇل ءوز كەزەگىندە جۇرگىزىلىپ جاتقان مەملەكەتتىك ساياساتتىڭ قوعام ءۇشىن تيىمدىلىگىن كورسەتىپ وتىر.
