پرەزيدەنتتىڭ ايتۋىنشا, بۇگىندە ەلىمىزدە ستراتەگيالىق ماڭىزى بار بىرنەشە جوبا جۇزەگە اسىرىلىپ جاتىر.
«بۇل ىسكە قىتايدىڭ ءىرى كومپانيالارى اتسالىسىپ وتىر. مىسالى, Fujian Hengwang Investment كومپانياسىنىڭ جامبىل وبلىسىندا مەتاللۋرگيا زاۋىتىن سالۋ جوباسىن اتاپ وتۋگە بولادى. زاۋىت جىلىنا ءۇش ميلليون توننا بولات وندىرۋگە مۇمكىندىك بەرمەك. ال Jiaxin International كومپانياسى الماتى وبلىسىنداعى بۇعىتى كەنىشىندە ۆولفرام كەنىن وڭدەۋ جوباسىن ىسكە قوستى. قۇرىلىس يندۋسترياسىندا قىتايلىق كاسىپكەرلەرمەن تابىستى بايلانىس ورناتىلدى. اتاپ ايتقاندا, China Glass كومپانياسى قازاقستان ءۇشىن تەڭدەسى جوق شىنى زاۋىتىنىڭ جوباسىن جۇزەگە اسىردى. جاقىندا الماتى قالاسىندا اۆتوكولىك وندىرەتىن مۋلتيبرەندتى زاۋىت ىسكە قوسىلادى. زاۋىت جىلىنا 120 مىڭ كولىك شىعارادى. سونىڭ ىشىندە GWM (Great Wall Motor), Chery جانە Changan كولىكتەرى بار. سونىمەن قاتار الماتىدا ەلەكتروبۋس شىعاراتىن BYD كومپانياسىنىڭ زاۋىتى ىسكە قوسىلماق. بۇل جوبالار قازاقستاننىڭ ەكونوميكاسىن ارتاراپتاندىرۋعا جول اشادى. سونداي-اق ەلىمىزدىڭ ەكسپورتتىق قۋاتىن ارتتىرۋعا مول مۇمكىندىك بەرەدى. جالپى, وسىنداي مىسالدار كوپ, ولاردىڭ بارلىعىن اتاپ وتۋگە ۇزاق ۋاقىت كەرەك بولادى», دەدى قاسىم-جومارت توقاەۆ.
مەملەكەت باسشىسى اۋىل شارۋاشىلىعى سالاسىنداعى ىنتىماقتاستىققا دا توقتالىپ, قىتايلىق كاسىپكەرلەردى ورگانيكالىق جانە جوعارى ساپالى ءونىم وندىرۋگە بەلسەنە قاتىسۋعا شاقىردى.
«قازاقستان ەگىستىك كولەمى بويىنشا الەمدە التىنشى ورىندا تۇر. سونداي-اق بيداي ەكسپورتى بويىنشا ەڭ ءىرى 10 ەلدىڭ قاتارىنا كىرەدى. ءبىز جىل سايىن شەتەلگە ون ميلليون توننادان استام بيداي جانە ەكى ميلليون تونناعا جۋىق ۇن جەتكىزەمىز. قىتاي نارىعى ەلىمىز ءۇشىن وتە ماڭىزدى. قازاقستان جەرگىلىكتى نارىققا جىلىنا 2 ميلليون تونناعا دەيىن استىق ەكسپورتتاي الادى. اۋىل شارۋاشىلىعى ونىمدەرىن ەكسپورتتاۋمەن قاتار, وڭدەۋ ونەركاسىبىن بىرلەسە دامىتۋ ءبىز ءۇشىن ەرەكشە ماڭىزدى. بۇل رەتتە, Dalian Group كومپانياسىنىڭ اقمولا وبلىسىندا بيدايدى تەرەڭ وڭدەيتىن كاسىپورىن قۇرۋ باستاماسىن تولىق قولدايمىز. Fufeng Group كومپانياسىنىڭ جامبىل وبلىسىنداعى جۇگەرى وڭدەۋ جوباسىن قۇپتايمىز. زاۋىت ونىمدەرى قىتاي مەن ەۋروپاعا ەكسپورتقا جىبەرىلەتىن بولادى. ءبىز قىتايلىق كاسىپكەرلەردى ورگانيكالىق جانە جوعارى ساپالى مال شارۋاشىلىعى ونىمدەرىن شىعارۋ جۇمىسىنا بەلسەنە قاتىسۋعا شاقىرامىز», دەدى مەملەكەت باسشىسى.
