«بۇگىندە وبلىستا 160-تان استام مەكتەپ جۇمىس ىستەيدى. سوڭعى جىلدارى حالىق سانىنىڭ قارقىندى وسۋىنە بايلانىستى جاڭا مەكتەپتەر سالۋ باستى مىندەتتەردىڭ ءبىرى بولىپ وتىر. بيىلدىڭ وزىندە 6 جاڭا مەكتەپ پايدالانۋعا بەرىلدى. 2026 جىلعا دەيىن تاعى 12 مەكتەپتىڭ قۇرىلىسىن اياقتاۋ جوسپارلانعان», – دەدى امانتاي قۇمباەۆ.
ونىڭ ايتۋىنشا, جاڭا وقۋ جىلىنا دايىندىق بارىسىندا بارلىق مەكتەپتەر وقۋلىقتارمەن تولىق قامتاماسىز ەتىلدى. مەكتەپتەردىڭ ماتەريالدىق-تەحنيكالىق بازاسىن نىعايتۋ ءۇشىن وبلىستىق بيۋدجەتتەن قوسىمشا قارجى ءبولىندى. ينتەراكتيۆتى تاقتالار, كومپيۋتەرلىك سىنىپتار جانە پاندىك كابينەتتەر جاڭارتىلىپ جاتىر.
«مۇعالىم تاپشىلىعى ماسەلەسى بار, اسىرەسە ماتەماتيكا, فيزيكا جانە ينفورماتيكا پاندەرىندە. بيىلدىڭ وزىندە وبلىسقا 450 جاس مامان كەلدى, ونىڭ ىشىندە 80-گە جۋىعى – اۋىلدىق مەكتەپتەرگە. جاس پەداگوگتەرگە تۇرعىن ءۇي جالداۋ بويىنشا جاردەماقى جانە كوتەرمەاقى قاراستىرىلعان», – دەدى ول.
امانتاي قۇمباەۆ ەرەكشە قاجەتتىلىكتەرى بار بالالارعا ارنالعان مەكتەپتەر مەن سىنىپتاردىڭ كوبەيىپ جاتقانىن ايتتى.
«وبلىستا ينكليۋزيۆتى ءبىلىم بەرۋمەن قامتۋ 75%-عا جەتتى. بۇل باعىتتا ارنايى پەداگوگتەر دايارلاۋ ىسىنە ءمان بەرىپ وتىرمىز. سونداي-اق, 3-6 جاس ارالىعىنداعى بالالاردى بالاباقشامەن قامتۋ دەڭگەيى 99%-دى قۇراپ وتىر», – دەدى ول.
ماڭعىستاۋدا “كەلەشەك مەكتەبى” ۇلتتىق جوباسى اياسىندا جاڭا ۇلگىدەگى ءبىلىم وشاقتارى بوي كوتەرىپ جاتىر. سونىمەن قاتار وقۋشىلاردىڭ فۋنكتسيونالدىق ساۋاتتىلىعىن ارتتىرۋ, اعىلشىن ءتىلىن تەرەڭدەتىپ وقىتۋ, تسيفرلىق داعدىلاردى دامىتۋ باعىتىندا پيلوتتىق جوبالار ىسكە اسۋدا».
«باستى ماقساتىمىز – بالالارعا ساپالى ءبىلىم مەن زاماناۋي جاعداي جاساۋ. بۇل باعىتتاعى جۇمىستار وبلىس اكىمىنىڭ باقىلاۋىندا. ءبىز ۇستازدارمەن, اتا-انالارمەن جانە قوعاممەن تىعىز بايلانىستا جۇمىس ىستەپ, ورتاق ماقساتقا بىرگە جەتەمىز», – دەپ قورىتىندىلادى امانتاي كۋمباەۆ.
