وبلىستىق ءبىلىم باسقارماسىنىڭ بەرگەن مالىمەتىنشە, قازىر وڭىردە 304 مەكتەپ جۇمىس ىستەيدى, وندا 102 مىڭنان استام بالا ءبىلىم الادى. ال بيىلعى وقۋ جىلىندا 1-سىنىپقا 10 155 وقۋشى بارادى, ولاردىڭ 7 146-سى قازاق سىنىپتارىنا, 3 009-ى ورىس سىنىپتارىنا قابىلدانادى. قازىر قابىلداۋ جۇمىستارى 95 پايىزدان استامى ورىندالعان.
جاڭا وقۋ جىلىندا بارلىق مەكتەپ وقۋ پروتسەسىن وقۋ-اعارتۋ مينيسترلىگىنىڭ ادىستەمەلىك نۇسقاۋ حاتتارىنا سايكەس باستايدى. وقۋ ۇزاقتىعى 1-سىنىپتاردا 33 اپتا, ال 2-11 سىنىپتاردا 34 اپتا بولىپ بەكىتىلگەن. ءبىلىم ساپاسىن ارتتىرۋ ماقساتىندا «كەلەشەك مەكتەپتەرى» جانە «اۋىل مەكتەبى – ساپا الاڭى» جوبالارى ىسكە اسىپ جاتىر.
وقۋلىقپەن قامتۋ ءۇشىن بيىل 12 باسپامەن شارت جاسالىپ, 133 مىڭنان استام كىتاپ ساتىپ الىندى. قازىرگى تاڭدا ولار اۋداندىق ءبىلىم بولىمدەرىنە جەتكىزىلۋدە. الەۋمەتتىك قولداۋ شارالارى شەڭبەرىندە 54 مىڭنان استام وقۋشى تەگىن ىستىق تاماقپەن قامتاماسىز ەتىلەدى.
121 ەلدى مەكەننەن 3 مىڭنان استام وقۋشى مەكتەپكە ارنايى اۆتوبۋستارمەن تاسىمالدانادى. ينتەرنەتكە قوسىلۋ تولىق قامتاماسىز ەتىلىپ, اۋىل مەكتەپتەرى ءۇشىن Starlink جۇيەسى پايدالانىلۋدا.
جاڭا وقۋ جىلىندا تاربيەلىك جۇمىستار دا كۇشەيتىلەدى. «ادال ازامات» باعدارلاماسى اياسىندا وقۋشىلاردىڭ پاتريوتتىق جانە ازاماتتىق قۇندىلىقتارىن قالىپتاستىرۋعا باعىتتالعان جوبالار جۇزەگە اسىرىلادى. سونداي-اق ساباق ۇدەرىسىنە جاساندى ينتەللەكت ەلەمەنتتەرى ەنگىزىلە باستايدى. قىركۇيەك ايىنان باستاپ بارلىق مەكتەپتە «جەكە قاۋىپسىزدىك ساباقتارى» قايتا ەنگىزىلەدى.
اباي وبلىسى
