ەكواكتسيا ورتالىق الاڭنان باستالىپ, قاتىسۋشىلاردى جاڭاوزەن قالاسىنىڭ اكىمى جانسەيىت قاينارباەۆ قۇتتىقتاپ, قالا تازالىعىنا ۇلەس قوسۋعا شاقىردى. اكىم ءوزى دە قولعاپ كيىپ, تۇرعىندارمەن بىرگە تازالىق جۇمىستارىنا بەلسەنە اتسالىستى.
شاراعا ماڭعىستاۋ وبلىستىق ەكولوگيا دەپارتامەنتىنىڭ باسشىسى ارمات جۇسىپقاليەۆ, Zangar Event قوعامدىق قورىنىڭ باسشىسى نۇرجان مۇحاممەدوۆ, سونداي-اق ەلىمىزگە تانىمال ەكو-بلوگەر دۋلات نابيەۆ ارنايى كەلىپ, حالىقپەن بىرگە ەڭبەك ەتتى. ولار ەكولوگيالىق مادەنيەتتى دامىتۋ مەن تۇرمىستىق قالدىقتاردى دۇرىس سۇرىپتاۋ جونىندە وي ءبولىستى.
ەكواكتسياعا قالاداعى وندىرىستىك كاسىپورىندار, مەملەكەتتىك جانە كوممۋنالدىق مەكەمەلەر, اۋىلدار, مەكتەپتەر مەن بالاباقشالار, دەنساۋلىق ساقتاۋ ۇيىمدارى, جاستار ۇيىمدارى مەن ەرىكتىلەر تۇگەلگە جۋىق قاتىستى. قاتىسۋشىلارعا الدىن الا بەلگىلەنگەن اۋماقتار ءبولىنىپ, قوقىس جيناۋ, سانيتارلىق تازالاۋ جانە كوگالداندىرۋ جۇمىستارى جۇرگىزىلدى.
شارا بارىسىندا 40-قا جۋىق تەحنيكا جۇمىلدىرىلىپ, 300 تونناداي قوقىس شىعارىلدى.
بۇل اۋقىمدى ەكواكتسيا جاڭاوزەن تۇرعىندارىنىڭ اۋىزبىرشىلىگىن ايقىن كورسەتىپ, قالانىڭ ەكولوگيالىق دامۋىنا جاڭا سەرپىن بەردى.
ەكواكتسيانى ۇيىمداستىرۋعا Zangar Event قوعامدىق قورى اتسالىستى.
ەكواكتسيانى ءتۇسىرۋ ءۇشىن رەسپۋبليكالىق تەلەارنالاردىڭ تىلشىلەرى كەلدى.
