افريكالىق سۇر توتىقۇس الەكس 31 جىل ءومىر ءسۇرىپ, عىلىم تاريحىنا ويلاۋ قابىلەتىمەن ەندى. زەرتتەۋشىلەردىڭ ايتۋىنشا, ول 100-دەن استام ءسوزدى ۇيرەنىپ قانا قويماي, تۇستەردى, پىشىندەردى, سانداردى اجىراتىپ, كەڭىستىك ۇعىمدارىن مەڭگەرگەن. ادەتتە توتىقۇستار ادامنىڭ ءسوزىن قايتالايدى دەپ ويلايمىز. ال الەكس ءۇشىن سوزدەر – تەك دىبىس ەمەس, ناقتى ماعىناسى بار ۇعىمعا اينالدى.
مىسالى, عالىمدار وعان ءتۇرلى ءتۇستى زاتتاردى كورسەتكەندە, الەكس دۇرىس ءتۇستى اتاي العان. نەمەسە ۇستەل ۇستىندە ءۇشبۇرىش پەن شارشى تۇرسا, ول ەكەۋىن سالىستىرىپ, ايىرماشىلىعىن اجىراتا العان. ياعني ونىڭ جاۋاپتارى كەزدەيسوق ەمەس.
الەكس عالىمداردىڭ سۇراعىنا عانا جاۋاپ بەرىپ قويماي, ءوزى دە سۇراق قويعان. بىردە ول زەرتتەۋشىسىنەن: «مەنىڭ ءتۇسىم قانداي؟», دەپ سۇراپتى. بۇل – قۇس اتاۋلىنىڭ العاش رەت سۇراق قويعان تاريحي جاعداي ەدى. عالىم وعان: «سەن – سۇر ءتۇستىسىڭ» دەپ جاۋاپ بەرگەن. قىزىعى, الەكس بۇل جاۋاپتى ەستە ساقتاپ قالعان جانە كەيىن دە قولدانعان.
بۇل وقيعا عىلىم الەمىندە ۇلكەن پىكىرتالاس تۋدىردى. ويتكەنى سۇراق قويۋ قابىلەتى ادامنىڭ ويلاۋ جۇيەسىن جانۋارلاردان بولەكتەپ تۇرعان باستى ەرەكشەلىك سانالىپ كەلگەن ەدى. الەكس سول شەكارانى بۇزدى. عالىمدار جانۋارلاردىڭ كوگنيتيۆتىك قابىلەتىن قايتا قاراۋعا ءماجبۇر بولدى.
زەرتتەۋشىلەردىڭ ايتۋىنشا, الەكس تەك سوزدەردى جاتتاپ الماعان, ولاردى ماعىنالىق دەڭگەيدە تۇسىنگەن. ونىڭ قويعان سۇراعى – ءوزىن تانۋعا, اينالانى سانالى تۇردە تۇسىنۋگە دەگەن ۇمتىلىستىڭ بەلگىسى.
