تابيعاتتا فلامينگولار وتە ۇلكەن توپ بولىپ ءومىر سۇرەدى. مىڭداعان قۇستىڭ ءبىر جەرگە جينالۋى – ولار ءۇشىن قاۋىپسىزدىك پەن سەنىمدىلىكتىڭ كەپىلى. ۇلكەن توپتىڭ ىشىندە جۇرگەن قۇس ءوزىن قورعاۋلى سەزىنەدى جانە بۇل سەزىم ولاردىڭ جۇپتاسۋىنا تىكەلەي اسەر ەتەدى.
الايدا زووپاركتەگى جاعداي مۇلدەم بولەك. شەكتەۋلى كەڭىستىكتە ۇستالعان قۇستاردىڭ سانى ادەتتە از بولادى. مۇنداي كەزدە فلامينگولاردىڭ تابيعي تۇيسىگى ىسكە قوسىلىپ, ولاردى ۇرەي بيلەيدى. قۇستىڭ ساناسىندا «توپ تىم از بولسا, دەمەك قاۋىپ بار» دەگەن سيگنال پايدا بولادى. ناتيجەسىندە ولار جۇپتاسۋدان باس تارتىپ, كوبەيمەي قويادى.
مىنە, وسى ماسەلەگە قاتىستى كەيبىر زووپاركتەر قۇستار مەكەندەيتىن الاڭنىڭ ىشىنە ۇلكەن اينالار ورناتادى. سوندا فلامينگولار اينالاعا قاراعاندا وزدەرىنىڭ بەينەسىن كورەدى. بىراق ولار ايناداعى بەينەنى ء«وزىم» دەپ ەمەس, جاڭا قۇس دەپ قابىلدايدى. وسىلايشا, توپ بىردەن بىرنەشە ەسە كوبەيىپ كەتكەندەي اسەر بەرەدى. قۇستار ءوزىن قاۋىپسىز ورتادا سەزىنەدى دە, ۇرپاق وربىتۋگە بەيىمدەلە باستايدى.
عالىمدار مۇنداي تاجىريبەنىڭ جەمىستى ەكەنىن دالەلدەدى: اينالار ورناتىلعان الاڭدا فلامينگولار ۇيا سالا باستايدى, جۇمىرتقا باسادى جانە تابيعي ورتاداعىداي تارتىپكە كوشەدى.
بۇل ءتاسىلدىڭ قوسىمشا نۇسقالارى دا بار. مىسالى, كەيبىر جەردە قاعازدان جاسالعان فلامينگو بەينەلەرى قويىلادى. جاساندى ۇيالار جاسالىپ, ءتىپتى جۇمىرتقا مۇسىندەرى ورنالاستىرىلادى.
