سۋرەت: atr.kz
وبلىس اكىمى سەرىك شاپكەنوۆتىڭ مالىمەتىنە سۇيەنسەك, رەنوۆاتسيا باعدارلاماسى اياسىندا 9 مەكتەپتە كۇردەلى جوندەۋ ءجۇرىپ جاتىر. ونىڭ ىشىندە 5 مەكتەپتەگى جۇمىس 1 قىركۇيەككە دەيىن, ال 3 ءبىلىم ورداسىنداعى جوندەۋ جىل سوڭىنا تامان اياقتالادى. بىراق ءبىر مەكتەپتى جوندەۋ الداعى جىلى دا جالعاسادى.
«جاڭادان ءۇش «كەلەشەك مەكتەپتەرى» اشىلدى. وسى كەزگە دەيىن 298 پەداگوگ بىلىكتىلىكتى ارتتىرۋ كۋرسىنان ءوتتى. وڭىردەگى 25 مەكتەپ مودەرنيزاتسيادان وتكىزىلىپ, حيميا, فيزيكا, بيولوگيا, روبوتتەحنيكا, STEM جانە باسقا پاندەر ءۇشىن قوسىمشا موديفيكاتسيالىق ۇلگىدەگى 130 كابينەت جابدىعى ساتىپ الىندى. 364 ءبىلىم بەرۋ مەكەمەسى بەينەباقىلاۋ كامەراسىمەن, تۋرنيكەتپەن, ليتسەنزيالانعان كۇزەت جانە دابىل تۇيمەسىمەن جابدىقتالدى», دەيدى سەرىك شاپكەنوۆ.
قازىر وبلىستا 20 مەكتەپتىڭ قۇرىلىسى ءجۇرىپ جاتىر. بيىل 15 مەكتەپ پايدالانۋعا بەرىلەتىنى جوسپارلانىپ وتىر. بۇل ءبىلىم وردالارىندا 13 200 ورىن بار.
مۇنايلى شاھاردا 68 مەكتەپ بار. قالالىق ءبىلىم ءبولىمىنىڭ باسشىسى ايناگۇل دۇيسەكەنوۆانىڭ مالىمەتىنە قاراعاندا, شاھار مەن وعان ىرگەلەس ورنالاسقان ەلدى مەكەندەردەگى 16 مەكتەپتى جاڭعىرتۋ جۇمىسى 2022–2023 وقۋ جىلىندا باستالعان. سونىڭ ىشىندە №44 مەكتەپ-گيمنازياسى, ب.مومىش ۇلى اتىنداعى №25, ف.وڭعارسىنوۆا, م.وتاراليەۆ, م.وتەمىس ۇلى اتىنداعى جانە ەركىنقالا اۋىلدىق وكرۋگىندەگى ورتا مەكتەپتىڭ سىنىپ بولمەلەرى جاڭعىرتىلىپتى.
«مودەرنيزاتسيالاۋداعى باستى ماقسات – اۋىل مەكتەپتەرىندەگى پاندىك كابينەتتەردى زاماناۋي قۇرال-جابدىقتارمەن قامتۋ, الەۋمەتتىك ماڭىزى بار نىسانداردى جاڭارتۋ. ءبىلىم وردالارىنىڭ كىتاپحاناسى, پاندىك جانە كومپيۋتەرلىك سىنىپتارى, سپورت زالدارى جاڭارتىلىپ, پايدالانۋعا بەرىلدى», دەدى ا.دۇيسەكەنوۆا.
يندەر اۋداندىق ءبىلىم ءبولىمىنىڭ باسشىسى ورىنتاي دىلمۇقاشەۆانىڭ دەرەگىنە سۇيەنسەك, وسى كەزگە دەيىن 15 مەكتەپتە, 11 بالاباقشا مەن 3 قوسىمشا ءبىلىم بەرەتىن نىساندا جوندەۋ جۇمىسى اياقتالعان. ال م.سيرانوۆ اتىنداعى ورتا مەكتەپتە كۇردەلى جوندەۋ جۇمىستارى باستالىپتى.
«قازىر 30 مەكتەپ جاڭا وقۋ جىلىنا تولىق دايىن تۇر. بيىل اۋدانداعى ءبىلىم بەرۋ مەكەمەلەرىندەگى جىلۋ قازاندىقتارىن اۋىستىرۋ قاجەتتىلىگى تۋىنداعان جوق», دەيدى و.دىلمۇقاشەۆا.
ال جىلىوي اۋداندىق ءبىلىم ءبولىمى باسشىسىنىڭ مىندەتىن اتقارۋشى گۇلجانسارا تاڭاتاروۆانىڭ دەرەگىنشە, مۇندا جالپى ورتا ءبىلىم بەرەتىن 20 مەكتەپ, 24 بالاباقشا, مەكتەپتەن تىس 4 مەكەمە, №2 پەداگوگيكالىق-پسيحولوگيالىق تۇزەتۋ كابينەتى جۇمىس ىستەيدى.
«جاڭا وقۋ جىلىندا 825 سىنىپتا 18 816 وقۋشى ءبىلىم الاتىنى جوسپارلانىپ وتىر. شاعىن ورتالىقتا 200, ال 58 مەكتەپالدى دايارلىق سىنىبىندا 1 265 بالا تاربيەلەنەدى. 2025–2026 وقۋ جىلىندا 1-سىنىپقا 1763 وقۋشى قابىلداندى», دەيدى گ. تاڭاتاروۆا.
بۇل اۋداندا ەرەكشە ءبىلىم بەرۋدى قاجەت ەتەتىن 300-گە جۋىق وقۋشى تىركەلگەن. ولارعا قولداۋ كورسەتۋ ماقساتىندا 7 مەكتەپتە ارنايى ينكليۋزيۆتى ءبىلىم بەرۋ كابينەتى اشىلعان. بيىل «Samruk-Kazyna Trust» كورپوراتيۆتىك قورىنىڭ دەمەۋشىلىگىمەن №7, №8, №16, №18 جانە №21 ورتا مەكتەپتەرى كپي كابينەتىمەن جابدىقتاۋ كوزدەلىپ وتىر.
رەسەيمەن شەكاراداعى قۇرمانعازى اۋدانىنىڭ وقۋشىلارى 33 مەكتەپتە ءبىلىم الادى. اۋداندىق ءبىلىم ءبولىمىنىڭ باسشىسى ەدىل باياروۆتىڭ ايتۋىنشا, ونىڭ ىشىندە 27 ورتا, 3 نەگىزگى, 3 باستاۋىش ءبىلىم ورداسى بار. بۇدان بولەك, 5 قوسىمشا ءبىلىم بەرۋ مەكەمەسى, №5 پسيحولوگيالىق-پەداگوگيكالىق تۇزەۋ كابينەتى جۇمىس ىستەيدى.
«اۋداندا ءۇش اۋىسىمدى جانە اپاتتى جاعدايداعى مەكتەپتەر جوق. جالپى ورتا ءبىلىم بەرەتىن 33 مەكتەپتىڭ 7-ەۋى ءبىر اۋىسىمدا, 26-سى ەكى اۋىسىمدا جۇمىس ىستەيدى. الايدا وقۋشى ورنىنا تاپشىلىق بار. وسى ماسەلەنى شەشۋ ماقساتىندا «كەلەشەك مەكتەپتەرى» ۇلتتىق جوباسى اياسىندا قۇرمانعازى جانە اقكول اۋىلىندا 600 ورىندىق 2 مەكتەپتىڭ قۇرىلىسى ءجۇرىپ جاتىر. بۇل نىسانداردىڭ قۇرىلىسى جىل سوڭىنا دەيىن اياقتالادى», دەيدى ەدىل باياروۆ.
ءبىلىم وردالارىن قىسقى ماۋسىمعا دايىنداۋ ماقساتىندا 20 ەلەكتر گەنەراتورى ساتىپ الىنعان. ەكى مەكتەپكە اۆتونومدى ءمودۋلدى قازاندىق ورناتىلىلىپ جاتىر.
«بيىل 7 مەكتەپتە 28 وقۋ كابينەتى (بيولوگيا, حيميا, STEM, ءااد, ەڭبەك, ينكليۋزيۆ, گەوگرافيا, ماتەماتيكا, قازاق ءتىلى, باستاۋىش, پسيحولوگ) ورناتۋ تولىق اياقتالدى. ەندى ءبىر ءبىلىم ورداسىنداعى جۇمىستى قىركۇيەككە دەيىن اياقتاۋ كوزدەلدى. اۋدانداعى 16 مەكتەپتىڭ ماتەريالدىق-تەحنيكالىق بازاسىن نىعايتۋ ءۇشىن 1 425 پارتا, 283 شكاف, 96 تاقتا ساتىپ الىندى», دەيدى ە.باياروۆ.
اتىراۋ وبلىسى
