ونىڭ اشىلۋىندا وبلىس اكىمى نۇرلىبەك نالىباەۆ اۋىل تۇرعىندارىن يگى باستامانىڭ ىسكە اسۋىمەن قۇتتىقتادى.
«بۇعان دەيىنگى سالىنعان مەكتەپ عيماراتىنىڭ ساپاسى سىن كوتەرمەي, اپاتتى جاعدايدا دەپ تانىلعاندىقتان, اۋىل بالالارى ۋاقىتشا اكىمدىك عيماراتىندا ءبىلىم الىپ كەلدى. وسى جاعدايدى ەسكەرىپ, وتكەن جىلى دەمەۋشىلىك ەسەبىنەن مەكتەپ عيماراتىن قايتا سالۋدى قولعا العان بولاتىنبىز.
وڭىرىمىزدە ءاربىر بالانىڭ شىعارماشىلىقپەن, سپورتپەن اينالىسۋىنا مەملەكەت تاراپىنان بارلىق مۇمكىندىك جاسالىپ وتىر. 2022 جىلدان بەرى وڭىرىمىزدە جاڭادان 15 مادەنيەت نىسانى بوي كوتەرىپ, ەل يگىلىگىنە بەرىلدى. اسسامبلەيانىڭ 30 جىلدىعى اياسىندا «قازاتومونەركاسىپ» ۇلتتىق اتوم كومپانياسىنىڭ» قولداۋىمەن دوستىق ءۇيىنىڭ جاڭا عيماراتى بوي كوتەرىپ كەلەدى. نىسان الداعى قاراشا ايىندا پايدالانۋعا بەرىلەدى. كەيىنگى ءۇش جىلدا 20 سپورت كەشەنى ىسكە قوسىلدى. بيىل تاعى 6 سپورت كەشەنى كەلۋشىلەرگە قىزمەتىن باستايدى. بيىل «قازاقستان حالقىنا» قورىنىڭ قولداۋىمەن شيەلى, جالاعاش اۋداندارىندا جاڭا سپورت كەشەندەرى تابىستالدى. قوردىڭ دەمەۋشىلىگىمەن مۇمكىندىگى شەكتەۋلى جاندارعا ارنالعان دەنە شىنىقتىرۋ-ساۋىقتىرۋ كەشەنى سالىنىپ جاتىر.
جاڭا وقۋ جىلىندا شاكىرتتەرگە تابىس, ۇستازدارعا شىعارماشىلىق شابىت, اتا-انالارعا قۋانىش تىلەيمىن!» دەدى وبلىس اكىمى.
جيىندا ءوڭىردىڭ الەۋمەتتىك-ەكونوميكالىق دامۋىنا ۇلەس قوسقان ازاماتتار قىزىلوردا وبلىسىنىڭ قۇرمەت گراموتاسىمەن, وبلىس اكىمىنىڭ العىس حاتىمەن ماراپاتتالدى.
وبلىستا بىلىمگە بولىنەتىن قارجى كولەمى جىل ساناپ ارتىپ كەلەدى. بيىل سالا بيۋدجەتى 346 ملرد 800 ملن تەڭگەگە جەتتى. قايتارىلعان اكتيۆتەر ەسەبىنەن 8 ملرد 200 ملن تەڭگەگە 5 مەكتەپتىڭ قۇرىلىسى قارجىلاندىرىلادى.
قوسىمشا ءبىلىم جۇيەسىن دامىتۋ ماقساتىندا ءۇش جىلدا 4 «وقۋشىلار ءۇيى» مەن 2 «ونەر مەكتەبى» سالىنىپ, جاس ۇرپاقتىڭ جان-جاقتى بولىپ وسۋىنە جاعداي جاسالدى. وتكەن جىلى «قازمۇنايگاز» ۇلتتىق كومپانياسىنىڭ دەمەۋشىلىگىمەن زاماناۋي «وقۋشىلار سارايى» اشىلدى. بالالار مەن جاسوسپىرىمدەرگە ارنالعان «سىر جۇلدىزدارى» شىعارماشىلىق-يننوۆاتسيالىق اكادەمياسى جىل ورتاسىندا پايدالانۋعا بەرىلدى. ال جاڭا وقۋ جىلى قارساڭىندا شيەلى اۋدانىندا «وقۋشىلار ءۇيى» مەن «ونەر مەكتەبى» سالتاناتتى تۇردە ەل يگىلىگىنە تابىستالدى.
قازىر قايتا جاڭعىرتىلىپ جاتقان پرەزيدەنت ساياباعىنان جىلدىڭ ءتورت مەزگىلىندە جۇمىس ىستەيتىن 300 ورىندىق تىنىعۋ لاگەرى, بوتانيكالىق ءبىلىم ورتالىعى بوي كوتەرىپ جاتىر.
ارالدا اۋدان ورتالىعىنان كەيىن تۇرعىندارىنىڭ سانى كوپ ەلدى مەكەننىڭ ءبىرى – سەكسەۋىل كەنتى. ءتورت مەكتەبى بار ۇلكەن كەنتتە تاعى ءبىر ءبىلىم وشاعى ەسىگىن ايقارا اشتى. ءۇش ءجۇز ورىندىق «كەلەشەك مەكتەبىنىڭ» اشىلۋ راسىمىنە پارلامەنت سەناتى مەن ءماجىلىسى دەپۋتاتتارى ناۋرىزباي بايقاداموۆ, رۋسلان رۇستەموۆ, مۇرات ابەنوۆ, مۇرات ەرگەشباەۆ, «قازاقستان حالقىنا» قوعامدىق قورىنىڭ باسقارما توراعاسى ءلاززات شىڭعىسباەۆا مەن زيالى قاۋىم وكىلدەرى قاتىستى.
وبلىس اكىمى تۇرعىنداردى جاڭا مەكتەپتىڭ اشىلۋىمەن قۇتتىقتاپ, ءبىلىم سالاسىنداعى جەتىستىكتەرگە توقتالدى.
وڭىردە 2023 جىلدان بەرى وبلىستىق بيۋدجەت ەسەبىنەن 5 ملرد 700 ملن تەڭگەگە 9 مەكتەپ جانىنان 2 900 ورىندىق قوسىمشا عيمارات سالىنىپتى. وسىنىڭ ارقاسىندا ۇشاۋىسىمدىق مەكتەپتەر ماسەلەسى تۇبەگەيلى شەشىمىن تاۋىپ وتىر. بيىل وبلىستىق بيۋدجەتتەن 2 ملرد 400 ملن تەڭگە ءبولىنىپ, 9 مەكتەپ قايتا جاڭعىرتۋدان ءوتتى. كەيىنگى ءۇش جىلدا 15 مەكتەپ عيماراتىنا كۇردەلى جوندەۋ جۇرگىزىلىپ, اپاتتى جاعدايداعى 7 مەكتەپتىڭ ماسەلەسى تولىق شەشىمىن تاپتى.
وڭىردە ءبىلىم سالاسىن دامىتۋعا ءتۇرلى قورلار دا ۇلەس قوسىپ كەلەدى. سونىڭ ءبىر دالەلى – قىزىلوردا قالاسىنان ء«بىلىمدى قولداۋ قورى» ارقىلى 8 ملرد 400 ملن تەڭگەگە سالىنعان دارىندى بالالارعا ارنالعان فيزيكا-ماتەماتيكا باعىتىنداعى مەكتەپ-ينتەرنات. مۇندا وقۋ ءۇشىن ەلىمىزدىڭ 17 وڭىرىنەن 1 445 وقۋشى ءوتىنىش ءبىلدىرىپ, جوعارى كورسەتكىشتەرگە قول جەتكىزگەن 200 بالا قابىلداندى. وسى قور ەسەبىنەن ارال اۋدانىنداعى مەرگەنساي ەلدى مەكەنىندە 2 ملرد 333 ملن تەڭگەگە 150 ورىندىق زاماناۋي مەكتەپ قۇرىلىسى ءجۇرىپ جاتىر.
وڭىرىمىزدەگى اپاتتى دەپ تانىلعان 3 ءبىلىم ورداسىن رەسپۋبليكالىق بيۋدجەت ەسەبىنەن جاڭادان سالۋ جوسپارلانىپ وتىر. وبلىستا وتكەن جىلى 31 ملرد 800 ملن تەڭگەگە 13 ءبىلىم ۇيىمى جاڭادان اشىلدى.
جيىندا «قازاقستان حالقىنا» قوعامدىق قورىنىڭ باسقارما توراعاسى ءلاززات شىڭعىسباەۆا ءسوز سويلەپ, ءوڭىرىمىزدىڭ الەۋمەتتىك-ەكونوميكالىق دامۋىنا ۇلەس قوسقان ازاماتتار ماراپاتتالدى.
قىزىلوردا وبلىسى,
ارال اۋدانى
