ءىس-شاراعا قالا اكىمدىگى وكىلدەرى, قالالىق ءماسليحات دەپۋتاتتارى, جوعارى وقۋ ورىندارىنىڭ رەكتورلارى مەن گرانت يەگەرلەرى قاتىستى. گرانت تابىستاۋ جىل سايىنعى داستۇرگە اينالىپ, ەلوردالىق جاستارعا ساپالى بىلىمگە قول جەتكىزۋگە جول اشىپ كەلەدى. بيىلعى ءىس-شارا اياسىندا بىرقاتار جوعارى وقۋ ورىندارى مەن كوللەدجدەر ءوز گرانتتارىن ۇسىنعان. اتاپ ايتقاندا, تۇران-استانا ۋنيۆەرسيتەتى – 8 گرانت, ساكەن سەيفۋللين اتىنداعى قازاق اگروتەحنيكالىق زەرتتەۋ ۋنيۆەرسيتەتى – 1 گرانت, «سينەرگيا» ۋنيۆەرسيتەتى – 4 گرانت, استانا حالىقارالىق ۋنيۆەرسيتەتى – 3 گرانت, ماعجان جۇماباي اتىنداعى جوعارى كوللەدج 5 گرانت بولگەن.
سالتاناتتى جيىن بارىسىندا ءسوز العان استانا قالالىق ءماسليحاتى توراعاسى تابيعات زەينۇلقابدەن ۇلى ەلوردا جاستارىنىڭ الەۋەتىن ارتتىرۋدىڭ ماڭىزدىلىعىن اتاپ ءوتتى. ول ءبىلىم گرانتتارىنىڭ تەك ماتەريالدىق قولداۋ ەمەس, سونىمەن قاتار جاستاردىڭ ومىرلىك ماقساتىنا جەتۋگە بەرىلگەن سەنىم مەن مۇمكىندىك ەكەنىن جەتكىزدى.
«بۇگىن ءبىز داستۇرگە اينالعان ماڭىزدى ءىستى جالعاستىرىپ وتىرمىز. بيىل ءتۇرلى ۋنيۆەرسيتەتتەر تاراپىنان 21 گرانت ۇسىنىلىپ وتىر. وعان جەكە جوعارى وقۋ ورىندارى مەن مەتسەناتتار ۇلكەن قولداۋ ءبىلدىردى. اسىرەسە الەۋمەتتىك تۇرعىدان وسال ساناتتاعى جاستارعا, كوپبالالى وتباسىلاردىڭ بالالارىنا جانە قالا ومىرىنە بەلسەندى ارالاسقان ەرىكتىلەرگە باسىمدىق بەرىلدى. بۇل ءداستۇر كەيىنگى ءتورت-بەس جىل كولەمىندە تۇراقتى تۇردە جالعاسىپ كەلەدى. بيىلعى گرانتتارعا استانا حالىقارالىق ۋنيۆەرسيتەتى, ساكەن سەيفۋللين اتىنداعى قازاق اگروتەحنيكالىق زەرتتەۋ ۋنيۆەرسيتەتى, ماعجان جۇماباي اتىنداعى جوعارى كوللەدج بەن «سينەرگيا» جەكەمەنشىك جوعارى وقۋ ورنى اتسالىستى. گرانت يەگەرلەرى وزدەرى قالاعان ماماندىق بويىنشا ءبىلىم الا الادى. دەگەنمەن بۇگىندە تەحنيكالىق جانە جۇمىسشى ماماندىقتارىنا سۇرانىس جوعارى. سوندىقتان جاستاردىڭ وسى باعىتتاردى تاڭداپ, ەل دامۋىنا قاجەتتى ينجەنەرلەر مەن كاسىبي ماماندار بولىپ شىعاتىنىنا سەنىم ارتامىز. ءبىزدىڭ باستى تىلەگىمىز – جاستاردىڭ بىلىمگە قۇشتار بولىپ, بەرىلگەن مۇمكىندىكتى تولىق پايدالانىپ, ەلگە پايداسىن تيگىزۋى. بۇل – ولاردىڭ ارمانىن جۇزەگە اسىرۋعا بەرىلگەن مۇمكىندىك. ءبىز جاستارعا سەنەمىز», دەدى ول.
استانادا وتكەن ءبىلىم گرانتتارىن تابىستاۋ راسىمىندە استانا حالىقارالىق ۋنيۆەرسيتەتىنىڭ ۆيتسە-پرەزيدەنتى قايرات ابدراحمانوۆ وقۋ ورنىنىڭ جەتىستىكتەرى مەن ستراتەگيالىق باعىتتارى تۋرالى ايتتى.
ء«بىز نەبارى جەتى جىل بۇرىن قۇرىلعان جاس ۋنيۆەرسيتەت بولساق تا, بۇگىندە ەلوردانىڭ ەڭ ءىرى پەداگوگيكالىق كادرلار دايارلايتىن وقۋ ورىندارىنىڭ بىرىنە اينالدىق. بيىل مىڭعا جۋىق باكالاۆر تۇلەكتەرىن ۇشىرىپ, ولاردىڭ باسىم بولىگى ەلوردانىڭ مەكتەپتەرىندە ەڭبەك جولىن باستادى. ۋنيۆەرسيتەتىمىزدىڭ دامۋ قارقىنى استانانىڭ جالپى دامۋىمەن تىكەلەي بايلانىستى. حالىقارالىق باعىتقا باسىمدىق بەرىپ وتىرمىز. شەتەلدىك ۋنيۆەرسيتەتتەردىڭ فيليالدارى اشىلدى, ورتا ازيادان تالانتتى جاستاردى ماگيستراتۋراعا تارتۋ ءۇشىن گرانتتار ءبولۋدى باستادىق. بۇل – ەلىمىزدى وڭىردەگى جوعارى ءبىلىم ورتالىعىنا اينالدىرۋعا باعىتتالعان ناقتى قادام. سونىمەن قاتار ءبىز مەملەكەت باسشىسى قاسىم-جومارت توقاەۆتىڭ ايماقتىق دەڭگەيدە جوعارى ءبىلىمدى دامىتۋ جونىندەگى تاپسىرمالارىن جۇزەگە اسىرىپ كەلەمىز. ءبىزدىڭ ماقساتىمىز – ەلوردامەن بىرگە دامىپ, جاستارعا ساپالى ءبىلىم بەرىپ قانا قويماي, ولاردىڭ حالىقارالىق دەڭگەيدە ءبىلىم الۋىنا جول اشۋ», دەدى ق.ابدراحمانوۆ.
گرانت يەگەرلەرى تالپىنىسىنىڭ ارقاسىندا بيىك ماقساتتارعا ۇمتىلىپ جۇرگەن جاستار. ولاردىڭ اراسىندا قوعامدىق ىستەردە بەلسەندى ەرىكتىلەر دە بار. جاستاردىڭ ورتاق ارمانى – ساپالى ءبىلىم الىپ, ەل دامۋىنا قىزمەت ەتۋ.
ساكەن سەيفۋللين اتىنداعى قازاق اگروتەحنيكالىق زەرتتەۋ ۋنيۆەرسيتەتىنىڭ گرانتىن يەلەنگەن بالاۋسا ماديارقىزى قۋانىشىن جاسىرمادى. «بۇل گرانت – مەن ءۇشىن ۇلكەن مۇمكىندىك ءارى جاڭا ومىرگە باستار جول. ارمانىم – جاقسى مامان بولىپ, ەلىمنىڭ دامۋىنا ۇلەس قوسۋ. بۇگىن قولىما تيگەن سەرتيفيكات تەك قۇجات قانا ەمەس, مەنىڭ بولاشاعىما اشىلعان ەسىك دەپ بىلەمىن. بىزگە سەنىم ارتقان جانداردىڭ ءۇمىتىن اقتاۋعا تىرىسامىز», دەدى ول.
سالتاناتتى ءراسىم سوڭىندا گرانت يەگەرلەرىنە سەرتيفيكاتتار تابىستالىپ, ولاردىڭ اتا-انالارى مەن ۇستازدارىنا دا العىس ايتىلدى. جاس بۋىننىڭ قۋانىشتى ءساتىن بولىسكەن قاۋىم جاڭا وقۋ جىلى قارساڭىندا ەلوردادا وسىنداي يگى ءىس-شارانىڭ وتكىزىلۋىن جاستارعا جاسالعان ۇلكەن قولداۋ رەتىندە باعالادى.
