بۇل ءىس اتىراۋ قالاسىنداعى №2 سوتتا قارالدى. بلوگەر س. قىلمىستىق كودەكستىڭ 190-بابىنىڭ 3-بولىگىنىڭ 1), 3), 4)-تارماعىمەن ايىپتالعان.
«بلوگەر جابىرلەنۋشىلەردىڭ اقشاسىن الاياقتىق جولمەن جىمقىرۋ ءۇشىن ءوزىنىڭ Instagram پاراقشاسىندا قايىرىمدىلىققا اقشا جينايتىنى, ءار ءتۇرلى تاۋاردىڭ ۇتىسىن ويناتاتىنى تۋرالى جالعان جارناما جاريالاعان. 49 جابىرلەنۋشى بلوگەرگە سەنىپ, لوتەرەياعا قاتىسۋ ءۇشىن ايىپتالۋشىنىڭ بانك شوتىنا اقشالارىن اۋدارعان. ايىپتالۋشى جابىرلەنۋشىلەردىڭ 13 ملن تەڭگەدەن استام اقشاسىن يەمدەنىپ, ءوز قاجەتىنە جۇمساعان. ونىڭ كىناسى ءوزىنىڭ جاۋابىمەن, جابىرلەنۋشىلەردىڭ, كۋالەردىڭ ايعاقتارىمەن, ىسكە تىركەلگەن بەينەجازبالارمەن, حات-حابارلاردىڭ سكرينشوتتارىمەن, بانك ەسەپشوتتارىنداعى ۇزىندىلەرمەن دالەلدەندى», دەپ حابارلادى اتالعان سوتتان.
پروكۋرور ايىپتالۋشىعا راقىمشىلىق جاساۋ اكتىسىنىڭ نەگىزىندە 3 جىل 1 اي 10 كۇنگە باس بوستاندىعىنان ايىرۋ جازاسىن تاعايىنداۋدى ۇسىندى. ال ايىپتالۋشى كىناسىن ءىشىنارا مويىنداپ, وزىنە باس بوستاندىعىنان ايىرۋمەن بايلانىستى ەمەس جازا تاعايىنداۋدى سۇرادى.
«سوت ۇكىمىمەن ايىپتالۋشى كىنالى دەپ تانىلدى. وعان 5 جىل مەرزىمگە قوعامدىق قىزمەتپەن اينالىسۋ, ونىڭ ىشىندە بۇقارالىق اقپارات قۇرالدارىن جانە تەلەكوممۋنيكاتسيا جەلىلەرىن پايدالانۋ قۇقىعىنان, 4 جىل 8 ايعا باس بوستاندىعىنان ايىرۋ جازاسى تاعايىندالدى. راقىمشىلىق جاساۋ اكتىسىنىڭ نەگىزىندە تاعايىندالعان جازا 1/3 بولىگىنە قىسقارتىلىپ, تۇپكىلىكتى 3 جىل 1 اي 10 كۇنگە باس بوستاندىعىنان ايىرۋ جازاسى تاعايىندالدى. جابىرلەنۋشىلەردىڭ تالاپ ارىزدارى تولىق قاناعاتتاندىرىلدى», دەپ ءمالىم ەتتى №2 سوتتان.
سوت ۇكىمى زاڭدى كۇشىنە ەنگەن جوق.
