فوتو: اقوردا
وسى ماقساتتا ەلىمىزدە ماڭىزدى رەفورمالار جۇزەگە اسىرىلىپ, ەڭ الدىمەن كونستيتۋتسيالىق سوت قۇرىلدى.
«ەلىمىزدەگى زاڭ ۇستەمدىگىن قامتاماسىز ەتەتىن اسا ماڭىزدى ينستيتۋت – كونستيتۋتسيالىق سوت قۇرىلدى. ەندى ازاماتتار قانداي دا ءبىر زاڭ ءوز قۇقىعى مەن بوستاندىعىنا نۇقسان كەلتىرەدى دەپ ساناسا, كونستيتۋتسيالىق سوتقا جۇگىنە الادى. ەكى جارىم جىل ىشىندە بۇل ورگاننىڭ قاراۋىنا 11 مىڭنان استام ءوتىنىش كەلىپ ءتۇستى», دەدى پرەزيدەنت.
ونىڭ ايتۋىنشا, كونستيتۋتسياعا قايشى كەلەتىن كوپتەگەن نورمالار قۇقىقتىق جۇيەدەن الىنىپ تاستالدى. بۇدان بىلاي كونستيتۋتسيالىق سوتتىڭ شەشىمدەرى ءادىل زاڭنامالىق تاجىريبەنىڭ نەگىزىنە اينالادى.
سونىمەن قاتار اكىمشىلىك راسىمدىك-پروتسەستىك كودەكستىڭ ەنگىزىلۋى ازاماتتار مەن مەملەكەتتىڭ جاريا-قۇقىقتىق قاتىناستارىن رەتتەۋدە تۇبەگەيلى وزگەرىستەرگە جول اشتى. «بۇگىندە ازاماتتار مەن كاسىپكەرلەردىڭ مەملەكەتتىك ورگاندارعا قارسى ىستەردە 60 پايىزعا دەيىن جەڭىسكە جەتۋى – وسى رەفورمالاردىڭ ناقتى ناتيجەسى», دەدى مەملەكەت باسشىسى.
«جۇرگىزىلگەن رەفورمالار سوت جۇيەسىنە سەنىمدى ايتارلىقتاي ارتتىردى. سۋديالاردى ىرىكتەۋ جانە تاعايىنداۋ ۇدەرىسىن ءادىل ءارى اشىق ەتىپ, ولاردىڭ تاۋەلسىزدىگىن كۇشەيتتى. سوت اكىمشىلىگى جەتىلدىرىلىپ, سوت ءىسىن جۇرگىزۋدى تسيفرلاندىرۋ باستالدى. بۇرىن ازاماتتار ىسكە قاتىستى شاعىمدانۋ مۇمكىندىگى جوقتىعىنا ءجيى ارىزداناتىن. سوندىقتان كاسساتسيالىق سوتتاردى قۇرۋ جانە بيىلعى 1 شىلدەدەن باستاپ «جاپپاي» كاسساتسيا قاعيداتىن ەنگىزۋ قازاقستاننىڭ سوت جۇيەسىن جاڭعىرتۋداعى ماڭىزدى قادامداردىڭ ءبىرى بولدى. كونستيتۋتسيالىق رەفورما ناتيجەسىندە پروكۋراتۋرا ورگاندارىنىڭ قاداعالاۋشىلىق قۇزىرەتى كۇشەيتىلدى. ادام قۇقىقتارى جونىندەگى ۋاكىل كونستيتۋتسيالىق مارتەبەگە يە بولدى. ەلىمىزدىڭ بارلىق ايماعىندا وكىلدىكتەرى اشىلدى. ەندى ۋاكىلدىڭ تاۋەلسىزدىگى مەن يممۋنيتەتىنە اتا زاڭ كەپىلدىك بەرەدى. بۇدان بولەك, ومبۋدسمەن باس پروكۋرور سياقتى كونستيتۋتسيالىق سوتقا جۇگىنۋ قۇقىعىنا يە بولدى», دەدى پرەزيدەنت.
