فوتو: اقوردا
مەملەكەت باسشىسىنىڭ ايتۋىنشا, «رەسپۋبليكالىق رەفەرەندۋم تۋرالى» زاڭ قابىلدانعانىنا شيرەك عاسىر وتسە دە, ەلدە ۇزاق ۋاقىت بويى بۇكىلحالىقتىق داۋىس بەرۋ وتپەگەن. دەگەنمەن قوعامدا حالىقتىڭ وزەكتى ماسەلەلەر بويىنشا پىكىر بىلدىرۋگە سۇرانىسى ايقىن بولدى.
«رەفەرەندۋم وتكىزۋ تۋرالى باستاماعا بارشا حالىق ءبىراۋىزدان قولداۋ كورسەتتى. جۇرتىمىز كونستيتۋتسياعا ەنگىزىلگەن تۇزەتۋلەردى زور قۇلشىنىسپەن جاقتاپ, داۋىس بەردى. مەملەكەتتىك بيلىكتىڭ بىردەن-ءبىر باستاۋى – حالىق» دەگەن كونستيتۋتسيا بابى ناقتى جۇزەگە اسىرىلدى. بۇل قوعامىمىزداعى ساياسي ۇردىسكە زور سەرپىن بەردى. ەندى ەلىمىزدەگى بارلىق ماڭىزدى شەشىمدەردى ءبىر ەل بولىپ تالقىلاپ, بىرگە قابىلدايتىن بولدىق. بىلتىر اتوم ەلەكتر ستانساسىن سالۋعا قاتىستى وتكەن رەفەرەندۋم – سونىڭ ايقىن دالەلى», دەدى پرەزيدەنت.
ق.توقاەۆتىڭ ايتۋىنشا, بۇدان بىلاي ەلدەگى بارلىق ماڭىزدى شەشىمدەر بۇكىل حالىق بولىپ تالقىلانىپ, بىرگە قابىلدانادى. بۇعان مىسال رەتىندە ول اتوم ەلەكتر ستانساسىن سالۋ جونىندەگى وتكەن جىلعى رەفەرەندۋمدى كەلتىردى.
سونىمەن قاتار مەملەكەت باسشىسى 2022 جىلعى رەفورمانىڭ اۋقىمىنا توقتالدى. ونىڭ ايتۋىنشا, ول قازاقستاننىڭ كونستيتۋتسيالىق قۇرىلىمى تاريحىنداعى ەڭ مازمۇندى وزگەرىستەردىڭ ءبىرى بولدى.
«سول كەزەڭدەگى كۇردەلى ساياسي جاعداي مۇنداي رەفورمانى قولعا الۋعا تۇرتكى بولدى. رەفەرەندۋم بارىسىندا كونستيتۋتسياعا تۇزەتۋلەر ەنگىزۋمەن قاتار, جاڭا نەگىزگى زاڭ قابىلداۋ تۋرالى دا ۇسىنىستار ايتىلدى. دەگەنمەن ءبىز 1995 جىلعى كونستيتۋتسيانى رەفورمالاۋمەن شەكتەلىپ, ونىڭ نەگىزگى ءمانىن ساقتاۋدى ءجون كوردىك. بۇل شەشىم ەل بىرلىگىن, تۇراقتىلىقتى, حالىقتىڭ تىنىش ءارى بەرەكەلى ءومىرىن قامتاماسىز ەتۋگە باعىتتالدى», دەدى توقاەۆ.
پرەزيدەنتتىڭ ايتۋىنشا, بۇل شەشىمنىڭ ارقاسىندا قازاقستان بۇگىن كونستيتۋتسيانىڭ 30 جىلدىق مەرەيتويىن اتاپ ءوتىپ وتىر. جاڭا ساياسي جاعدايعا سايكەس كەلمەيتىن باپتار رەفەرەندۋم ارقىلى الىنىپ تاستالدى.
«ناقتى رەفورمانىڭ ناتيجەسىندە كونستيتۋتسيا باپتارىنىڭ ۇشتەن ءبىرى جاڭارتىلدى. بۇل – وزگەرىستەردىڭ اۋقىمىن كورسەتەدى. ادىلدىك, اشىقتىق, ەسەپتىلىك, جاۋاپكەرشىلىك قاعيداتتارى اتا زاڭدا كورىنىس تاپتى. ازاماتتاردىڭ كونستيتۋتسياعا دەگەن سەنىمى نىعايدى. رەفەرەندۋم وتكىزۋدەگى باستى ماقساتىمىز دا وسى بولاتىن», دەپ تۇيىندەدى مەملەكەت باسشىسى.
