فوتو: ءسىم
كەزدەسۋ بارىسىندا ەمومالي راحمون ەكى ەل اراسىنداعى قارىم-قاتىناستاردىڭ سوڭعى جىلدارى جوعارى دەڭگەيگە جەتكەنىن اتاپ ءوتىپ, قازاقستانمەن جان-جاقتى ىنتىماقتاستىقتى تەرەڭدەتۋدىڭ, ستراتەگيالىق سەرىكتەستىك پەن وداقتاستىقتى ودان ءارى نىعايتۋدىڭ ماڭىزىن ەرەكشە اتاپ ءوتتى. سونداي-اق ول قازاقستان پرەزيدەنتىنىڭ وڭىرلىك ىقپالداستىقتى كۇشەيتۋگە باعىتتالعان باستامالارىن جوعارى باعالاپ, قولدايتىنىن جەتكىزدى.
ءوز كەزەگىندە مۇرات نۇرتىلەۋ تاجىكستان كوشباسشىسىنا قازاقستان پرەزيدەنتى قاسىم-جومارت توقاەۆتىڭ سالەمىن جانە ىزگى تىلەكتەرىن تابىستاپ, مەملەكەتتەر اراسىنداعى جوعارى دەڭگەيدەگى كەلىسىمدەردىڭ جۇزەگە اسىرىلۋ بارىسىن باياندادى.
اڭگىمە بارىسىندا تاراپتار ورتالىق ازياداعى بىرلىك پەن ىنتىماقتاستىقتى نىعايتۋعا ەرەكشە نازار اۋداردى. كورشىلەس ەلدەرمەن تەڭگەرىمدى ءارى بولجامدى قارىم-قاتىناستاردى دامىتۋ – وڭىرلىك تۇراقتىلىق پەن ورتاق مۇددەلەردىڭ كەپىلى ەكەنى اتاپ ءوتىلدى.
كەزدەسۋدىڭ ماڭىزدى ناتيجەلەرىنىڭ ءبىرى رەتىندە پرەزيدەنت ەمومالي راحمون ءححى عاسىردا ورتالىق ازيانى دامىتۋعا باعىتتالعان دوستىق, تاتۋ كورشىلىك جانە ىنتىماقتاستىق تۋرالى شارتقا قول قويدى. بۇل تاريحي قۇجات وڭىرلىك سەرىكتەستىكتى جاڭا دەڭگەيگە كوتەرىپ, تۇراقتى دامۋ ءۇشىن جاڭا كەزەڭنىڭ باستالعانىن ايقىندايدى.
شارتتىڭ جۇزەگە اسىرىلۋى ءوزارا ءتيىمدى ءارى جان-جاقتى ارىپتەستىكتىڭ دامۋىنا تىڭ سەرپىن بەرەدى دەپ كۇتىلەدى.
