ءوڭىر بيلىگى جەرگىلىكتى بيۋدجەت ەسەبىنەن جوعارى جانە جوعارى وقۋ ورنىنان كەيىنگى ءبىلىمدى مامانداردى دايارلاۋعا ارنالعان گرانتتاردى جىل سايىن ءبولىپ وتىر.
2019–2024 جىلدار ارالىعىندا رەزيدەنتۋراعا بارلىعى 157 گرانت قاراستىرىلدى. ال 2025–2026 وقۋ جىلىنا ەڭبەك نارىعىنىڭ قاجەتتىلىگىن ەسكەرە وتىرىپ, تاعى 31 گرانت ءبولىندى. قازىرگى تاڭدا 62 دارىگەر رەزيدەنتۋرانى ءتامامداپ, وڭىرلىك مەديتسينالىق مەكەمەلەردە كەمىندە 5 جىل ەڭبەك ەتۋ مىندەتتەمەسىمەن جۇمىسقا ورنالاستى. سونىمەن بىرگە 84 جاس مامان رەزيدەنتۋرادا وقىپ جاتىر, 11 رەزيدەنت الەۋمەتتىك دەمالىستا.
مەديتسينا قىزمەتكەرلەرىن تۇراقتى جۇمىس ىستەۋگە ىنتالاندىرۋ ءۇشىن الەۋمەتتىك قولداۋ شارالارى ىسكە اسىرىلۋدا. بيىل 41 مامانعا تۇرعىن ءۇي ساتىپ الۋ نەمەسە سالۋ ءۇشىن 367,3 ملن تەڭگەگە دەيىن بيۋدجەتتىك نەسيە بەرۋ , 129 مامانعا جالپى سوماسى 47,6 ملن تەڭگە كولەمىندە كوتەرمە جاردەماقى تولەۋ ءۇشىن قارجى ءبولىندى.
ءبىرشاما ۋاقىت بۇرىن وبلىستىق ءماسليحاتتىڭ شەشىمىمەن بىرجولعى الەۋمەتتىك قولداۋ مولشەرى جاڭارتىلدى. ماسەلەن, اۋىلدىق ەلدى مەكەندەرگە, كەنتتەرگە, مونوقالالارعا جانە اۋداندىق ماڭىزى بار قالالارعا ءجىتى تاپشى ماماندارعا – 8,5 ملن تەڭگە, وسى وڭىرلەرگە بارعان وزگە ماماندارعا – 1,2 ملن تەڭگە, تاراز قالاسىنا كەلگەن ماماندارعا – 800 مىڭ تەڭگە كولەمىندە قارجىلاي قولداۋ كورسەتۋ قاراستىرىلدى.
بۇدان بولەك, بىرقاتار اۋداندا كوممۋنالدىق قىزمەت, وتىن, سۋ جانە كومىر شىعىندارىن وتەۋ ءۇشىن 5 اەك كولەمىندە كومەك كورسەتىلەدى. ناقتىراق ايتساق, تالاس اۋدانىندا جاس مامانداردى تۇرعىن ۇيمەن قامتاماسىز ەتۋ جوسپاردا بار. قورداي اۋدانىندا ءبىرىنشى جۇمىس جىلىندا جالدامالى پاتەر اقىسى وتەلەدى.
مەملەكەتتىك قولداۋ مەن جەرگىلىكتى باستامالاردىڭ ءوزارا ۇيلەسۋى جامبىل وبلىسىندا مەديتسينالىق كادر تاپشىلىعىن جۇيەلى شەشۋگە مۇمكىندىك بەرىپ وتىر. بۇل شارالار ءوڭىر تۇرعىندارىن ساپالى مەديتسينالىق قىزمەتپەن قامتۋعا جول اشادى.
جامبىل وبلىسى
