سۋرەتتى تۇسىرگەن – ەرلان ومار, «EQ»
ءىس-شارا اياسىندا العاشقى ءسوزدى العان «قازاق گازەتتەرى» سەرىكتەستىگى باس ديرەكتورىنىڭ ورىنباسارى قامبار احمەت جيىنعا قاتىسۋشىلارعا بۇل ءىس-شارانىڭ ماڭىزىن ءتۇسىندىرىپ, ەلىمىزدەگى بىرنەشە ىرگەلى باسىلىمنىڭ باسىن قوسىپ وتىرعان ۇجىم مەن كونستيتۋتسيالىق سوت اراسىندا مەموراندۋمعا قول قويىلعانىن, مۇنداي ارىپتەستىك بايلانىس باس رەداكتورلار كلۋبىنىڭ پرەزيدەنتى, پارلامەنت سەناتىنىڭ دەپۋتاتى بيبىگۇل جەكسەنبايدىڭ باستاماسىمەن جۇزەگە اسقانىن, بۇگىنگى جيىن كونستيتۋتسيالىق سوتتىڭ قىزمەتى جونىندە كەڭىرەك اقپارات الۋعا مۇمكىندىك تۋعىزاتىنىن جەتكىزدى.
باس رەداكتورلار كلۋبىنىڭ اتقارۋشى ديرەكتورى بيبىگۇل قۇلامان كونستيتۋتسيالىق سوت پەن باس رەداكتورلار كلۋبى اراسىنداعى بايلانىستىڭ ناتيجەسىندە جۋرناليستەرگە قاجەتتى ترەنينگتەردى ءار ۇجىمعا بارىپ وتكىزۋگە قول جەتكىزىلگەنىن مالىمدەدى.
«بۇعان دەيىن كوپ جاعدايدا جۋرناليستەر ترەنينگكە وزدەرى بارىپ جاتاتىن. دەسە دە, جۇمىس بارىسى قاربالاس بولعاندىقتان, تىلشىلەرىمىزدىڭ بارلىعىن بىردەن ترەنينگكە جىبەرە المايتىنبىز. ارينە, تىلشىلەردىڭ ءبىلىمىن جەتىلدىرۋ – بارىمىزگە ورتاق مىندەت. سوندىقتان دا ءبىز ءوز اياعىمىزبەن كەلىپ, جۋرناليستەرمەن جيىن وتكىزۋدى قولعا الىپ جاتىرمىز», دەدى ب.قۇلامان.
ال كونستيتۋتسيالىق سوت اپپاراتى وتىنىشتەردى باستاپقى قاراۋ ءبولىمىنىڭ باسشىسى سالتانات نۇرىمبەتوۆا 2022 جىلى ەلىمىزدە كونستيتۋتسيالىق رەفورما جاسالىپ, كونستيتۋتسيالىق سوت قۇرىلعانىن, 2023 جىلدىڭ قاڭتار ايىنان بەرى كونستيتۋتسيالىق باقىلاۋ ورگانى كونستيتۋتسياعا سايكەس ەمەس قانداي نورمالاردى انىقتاعانىن, قازىر كونستيتۋتسيالىق سوتقا بيلىك وكىلدەرى عانا ەمەس, قاراپايىم ازاماتتار دا وتىنىشپەن قايىرىلا الاتىنىن, تىلشىلەردىڭ كونستيتۋتسيالىق سوت تۋرالى جازاردا قانداي ماسەلەلەرگە ءمان بەرۋ كەرەكتىگىن ءتۇسىندىردى.
ء«بىزدىڭ باستى ماقساتىمىز – اتا زاڭىمىزدىڭ, ياعني كونستيتۋتسيانىڭ ۇستەمدىگىن قامتاماسىز ەتۋ. ياعني ەلىمىزدەگى بۇكىل زاڭدار, وزگە دە نورماتيۆتىك اكتىلەر كونستيتۋتسياعا سايكەس كەلۋى جانە وعان قايشى بولماۋعا ءتيىس. سوندىقتان دا وسى باعىتتاعى جۇمىستاردى بۇقاراعا ناسيحاتتاۋ – بارىمىزگە ورتاق ءىس», دەدى سالتانات مۇسابەكقىزى.
كونستيتۋتسيالىق سوت تالداۋشىسى نازگۇل تۇياقباي كونستيتۋتسيالىق سوتقا تۇسكەن وتىنىمدەردىڭ قالاي قارالاتىنىن, بۇل ورگانعا قاراپايىم ازاماتتار قانداي نەگىزدە جۇگىنە الاتىنىن جۋرناليستەرگە اڭگىمەلەپ بەردى.
