ورتاعاسىرلىق مۇسىلمان-مىسىر تاريحشىلارىنىڭ جازباسىندا ء«ان-ناسىر بين قالاۋىن» اتىمەن تانىمال بۇل تۇلعانىڭ يسلام وركەنيەتى ءۇشىن سىڭىرگەن ەڭبەگى ەرەن. شىعىستانۋشى ءھام ارابتانۋشى قايرات ساكي, 2006 جىلى جارىق كورگەن «قىپشاق ماملۇكتەرى» اتتى كىتابىندا: «قالاۋىن سۇلتان 1228–1230 جىلدارى دۇنيەگە كەلگەن. شامامەن اتاقتى بايبارىس سۇلتاننان 5–6 جاس كىشى» دەي وتىرىپ, ورتاعاسىرلىق تاريحشى ءال-ءاينيدىڭ (1361–1451) جازباسىندا ايتىلعان «قالاۋىن سۇلتاننىڭ ۇلتى تازا قىپشاق بەرىش تايپاسىنان» دەگەن دەرەكتى العا تارتادى.
ول سياقتى ماملۇكتانۋشى – عالىم سول زامان وقىمىستىسى بايبارىس اد-داۋادار دەگەن شەجىرەشى جازىپ قالدىرعان «زۋبداتۋ ال-فيكرا في تاريحي ال-ھيدجرا» («ھيدجرا تاريحى جونىندەگى ويدىڭ قايماعى») اتتى كولەمدى ەڭبەكتە: «قالاۋىننىڭ تەگى تازا قىپشاق بەلگىلى بەرىش ۇعلى تايپاسىنان» دەيدى.
قاي جاعىنان الساق تا قالاۋىن سۇلتان قىپشاق دالاسىنىڭ ۇلانى ەكەنى انىق. ويتكەنى اتاقتى تاريحشى يبن ءابدۋزاھيردىڭ جازباسىندا, قالاۋىن سۇلتاننىڭ ارابشا وتە از بىلەدى, سويتە تۇرا تۇركى-قىپشاق تىلىندە اسا شەشەن سويلەيدى دەگەن دەرەك بار.
بۇل تۇلعا بيلىك قۇرعان زاماندا اتاقتى بايبارىس سۇلتاننىڭ كرەسشىلەرمەن جاساسقان 10 جىلدىق بەيبىتشىلىك ءبىتىمى اياقتالعاندىقتان, ەجەلگى جاۋلىق قايتادان ورىستەيدى. سول سەبەپتى, 1281 جىلى جورىق باستاعان قالاۋىن يستيپتاردىڭ وردەنى ورنالاسقان مارقاب قالاسىن باسىپ الادى. وسى ەكپىنمەن ىلگەرىلەگەن ماملۇك اسكەرلەرى كرەسشىلەردىڭ باستى وردالارى لاتاكيا جانە تريپولي شاھارلارىن باعىندىرادى. وسىلاي ءوز يەلىگىن كەڭەيتكەن سۇلتان ەجەلگى جۇرتى دەشتى قىپشاق دالاسىنداعى التىن وردا ۇلىسىمەن بايلانىس ورناتادى.
