فوتو: ۇكىمەتتىڭ ءباسپاسوز قىزمەتى
وتىرىستا تاۋ-كەن ءوندىرۋ جانە مەتاللۋرگيا كاسىپورىندارىنىڭ باسشىلارى, سالالىق قاۋىمداستىقتار وكىلدەرى قاتىستى.
«اتامەكەن» ۇكپ تورالقا توراعاسى رايىمبەك باتالوۆ, «قازاقمىس» كورپوراتسياسىنىڭ باسقارما توراعاسى نۇراحمەت نۇريەۆ, KazFerroGroup ديرەكتورى حوندامير يۋلداشەۆ, Golden Compass Jambyl باسقارۋشى ديرەكتورى ايبار ءداۋىتوۆ, Aurora Minerals Group كومپانيالار توبىنىڭ قۇرىلتايشىسى سايد سۇلتانوۆ ءوز ۇسىنىستارىن ايتىپ, ءسوز سويلەدى.
پرەمەر-مينيستر بيىل تاۋ-كەن مەتاللۋرگيا كەشەنىندە (تمك) مىڭداعان جۇمىس ورىنىن قۇرۋعا مۇمكىندىك بەرەتىن جانە ەكونوميكانى ارتاراپتاندىرۋعا ىقپال ەتەتىن 28 ينۆەستيتسيالىق جوبا جۇزەگە اسىرىلىپ جاتقانىن اتاپ ءوتتى.
«پرەزيدەنت الدىمىزعا ءوندىرىس كولەمىن ساقتاپ قانا قويماي, ساپالى ءوسۋدى قامتاماسىز ەتۋ, ۇزاقمەرزىمدى ينۆەستيتسيالار تارتۋ سياقتى ستراتەگيالىق مىندەت قويىپ وتىر.ء بىز «شيكىزات ءوندىرۋ جانە ەكسپورتتاۋ» مودەلىنەن «ەل ىشىندە قايتا وڭدەۋ جانە قوسىمشا قۇن قۇرۋعا» كوشەمىز. ۇكىمەت ەل ىشىندە قايتا وڭدەۋدى ىنتالاندىرۋ, جاڭا وندىرىستەردى قولداۋ, مەتاللۋرگيالىق كلاستەرلەردى دامىتۋ ءىسىن جالعاستىرادى», دەدى ولجاس بەكتەنوۆ.
تالقىلاۋ بارىسىندا قاتىسۋشىلار ينۆەستورلار ءۇشىن زاڭنامانى جانە جاعدايلاردى جەتىلدىرۋ ماسەلەلەرىن كوتەردى. «اتامەكەن» ۇكپ تورالقا توراعاسى رايىمبەك باتالوۆ تاۋ-كەن مەتاللۋرگيا كەشەنى وكىلدەرى تاراپىنان بيزنەس جانە ساراپشىلارمەن بىرلەسىپ, بىرىڭعاي سالالىق دامۋ قۇجاتىن ازىرلەۋ, تاريف ساياساتىن سينحرونداۋ جانە جەر قويناۋى تۋرالى كودەكسكە تۇزەتۋلەر ەنگىزۋ جۇمىستارىن اياقتاۋ جونىندەگى ۇسىنىسىن ايتتى.
گەولوگيالىق بارلاۋ كومپانيالارى توبىنىڭ قۇرىلتايشىسى سايد سۇلتانوۆ تۇراقتى سالىق رەجيمىن قامتاماسىز ەتۋ, رويالتي جۇيەسىن الەمدىك تاجىريبەگە بەيىمدەۋ, سونداي-اق گەولوگيالىق بارلاۋ قىزمەتىن كورسەتەتىن كومپانيالارعا سالىق سالۋدى جەڭىلدەتۋ تۋرالى پىكىر ءبىلدىردى.
جاڭا كەن ورىندارىن ىزدەۋدە شەشۋشى ءرول اتقاراتىن شاعىن جانە كىشى كومپانيالاردى قولداۋ قاجەتتىگى تالقىلاندى. تاۋ-كەن ءوندىرۋشى كومپانيانىڭ باسشىسى ايبار ءداۋىتوۆ كىشى كومپانيالاردىڭ تۇسىنىگى مەن مارتەبەسىن زاڭنامادا بەكىتۋ جانە شاعىن جەر قويناۋىن پايدالانۋشىلار ءۇشىن پايدالى قازبالاردى ءوندىرۋ سالىعىنىڭ (پقوس) سارالانعان مولشەرلەمەلەرىن ەنگىزۋدى ۇسىندى.
فەرروقورىتپا زاۋىتىنىڭ ديرەكتورى حوندامير يۋلداشەۆ جيىنعا قاتىسۋشىلاردىڭ نازارىن ەلەكتر ەنەرگياسى مەن كولىك قىزمەتىنە ارنالعان تاريفتەرگە اۋداردى.
سونىمەن قاتار تەمىرجول تاريفتەرى مەن لوكوموتيۆ تارتۋ قىزمەتى ماسەلەلەرى قوزعالدى. «قازاقمىس» كورپوراتسياسى باسقارما توراعاسى نۇراحمەت نۇريەۆ لوكوموتيۆ تارتۋ قىزمەتتەرىنە تاريفتەردى مەملەكەتتىك رەتتەۋدى ساقتاۋ كەرەكتىگىن ايتتى.
ۇلتتىق ەكونوميكا ءبىرىنشى ۆيتسە-ءمينيسترى ازامات ءامرين توزىعى جەتكەن ينفراقۇرىلىمدى جاڭعىرتۋ ءۇشىن ەلەكتر ەنەرگياسى مەن تاسىمالداۋ تاريفتەرىن ىرىقتاندىرۋ قاجەت ەكەنىن اتاپ ءوتتى.
سونداي-اق سو2 قالدىقتارىن ازايتۋ جونىندەگى قازاقستان قابىلداعان حالىقارالىق مىندەتتەمەلەر شەڭبەرىندە ەكولوگيالىق جاۋاپكەرشىلىك جانە كومىرتەگى ءىزى ماسەلەلەرىنە ەرەكشە نازار اۋدارىلدى.
ەكولوگيا جانە تابيعي رەسۋرستار ءمينيسترى ەرلان نىسانباەۆ تمك كاسىپورىندارى بۇگىندە بارلىعى بىردەي ساقتاي بەرمەيتىن ەكولوگيالىق ستاندارتتاردى ەسكەرۋى ءتيىس ەكەنىن اتاپ ءوتتى. ونىڭ ايتۋىنشا, بىرقاتار كاسىپورىن كومىرتەگى ءىزى مەن ەنەرگيا تۇتىنۋدى ازايتۋ جوبالارىن جۇزەگە اسىرا وتىرىپ, تازا تەحنولوگيالارعا كوشۋدى باستادى, ال مەملەكەت ءوز كەزەگىندە ەكولوگيالىق شەشىمدەرگە ينۆەستيتسيا سالاتىن كومپانيالارعا قولداۋ كورسەتۋگە دايىن.
سونداي-اق وتىرىسقا قاتىسۋشىلار نارىق سۇرانىستارىن ەسكەرە وتىرىپ, عىلىمي-زەرتتەۋ جانە تاجىريبەلىك-كونسترۋكتورلىق جۇمىستاردى (عزتكج) ىنتالاندىرۋ تەتىكتەرىن ودان ءارى جاڭارتۋ ماسەلەسىن تالقىلادى.
بۇگىندە سالانى جالعاسىپ جاتقان تسيفرلاندىرۋ كونتەكسىنە وراي پرەمەر-مينيستر تسيفرلىق شەشىمدەر, جاساندى ينتەللەكت ەنگىزۋدى جەدەلدەتۋ قاجەتتىگىن اتاپ ءوتتى.
بۇدان باسقا, جەر قويناۋىن پايدالانۋشىلاردىڭ ساتىپ الۋ ۇردىستەرىنىڭ اشىقتىعىنا باقىلاۋدى كۇشەيتۋگە جانە وتاندىق وندىرۋشىلەرمەن كووپەراتسيانى دامىتۋعا باسا نازار اۋدارىلدى. وسى ماقساتتا 1 شىلدەدەن باستاپ تاۋارلاردى, جۇمىستار مەن قىزمەتتەردى ساتىپ الۋعا ارنالعان مەملەكەتتىك پلاتفورمانىڭ جاڭعىرتىلعان نۇسقاسى ىسكە قوسىلدى, بۇل جەرگىلىكتى قامتۋ ۇلەسىن ارتتىرۋعا مۇمكىندىك بەرەدى.
تالقىلاۋ قورىتىندىسىن سايكەس, ولجاس بەكتەنوۆ سالانى دامىتۋ تەرەڭ وڭدەۋگە, تەحنولوگيالاردى ەنگىزۋگە, ەكولوگيالىق جاۋاپكەرشىلىككە نەگىزدەلۋى كەرەكتىگىن اتاپ ءوتتى. بۇل شيكىزات مودەلىنەن الشاقتاپ, ەلدە تولىق وندىرىستىك تسيكلدى كاسىپورىندار قۇرۋعا مۇمكىندىك بەرەدى. ءوز تاراپىنان ۇكىمەت بيزنەستى دامىتۋ ءۇشىن قولداۋ جانە جاعداي جاساۋ جونىندەگى جۇمىستاردى جالعاستىرا بەرمەك.
پرەمەر-مينيستر ايتىلعان بارلىق ۇسىنىس تمك قىزمەتىنىڭ تەتىكتەرىن جەتىلدىرۋ جونىندەگى الداعى جۇمىستا ەسكەرىلەتىنىن اتاپ ءوتتى.
