قىزىقتى ويىن تۇرىندە وتكەن تاربيە ساباعى بارىسىندا جەرگىلىكتى پوليتسيا قىزمەتى باسقارماسىنىڭ اعا ينسپەكتورى ولەسيا بابيچ كىشكەنتاي بوبەكتەرگە جول بەلگىلەرىنىڭ ماعىناسىن, جولدى قالاي دۇرىس كەسىپ ءوتۋ كەرەگىن, جول ورتاسىنداعى الا سىزىق نە ءۇشىن قاجەت ەكەنىن ءتۇسىندىردى.
پاترۋلدىك پوليتسيا ينسپەكتورى بۇلدىرشىندەرگە جول ءتارتىبىن رەتتەۋشىنىڭ يشارا قيمىلىن كورسەتىپ, ءار قيمىلدىڭ نەنى مەڭزەيتىنىن ايتىپ بەردى. ارتىنشا ءتارتىپ ساقشىسىنىڭ قيمىلىن بالالار دا قايتالاپ, ونىڭ نە ماعىنا بەرەتىنىن ءبىر-بىرىنەن سۇراپ, جاۋاپ الىپ جاتتى.
قوستاناي وبلىسى پد جەرگىلىكتى پوليتسيا قىزمەتى باسقارماسىنىڭ اعا ينسپەكتورى ولەسيا ءبابيچتىڭ ايتۋىنشا, بالالاردى قاۋىپسىزدىك ەرەجەلەرىنە ۇيرەتۋ – پوليتسيا جۇمىسىنىڭ اسا ماڭىزدى ءبىر سالاسى.
«بالانىڭ مىنەز-قۇلقى مەكتەپكە دەيىنگى جاستا قالىپتاسادى. سوندىقتان بالا جولدا ءوزىن قالاي ۇستاۋ كەرەگىن جاستايىنان ءبىلۋى كەرەك. ء بىز جولدى قالاي كەسىپ ءوتۋ كەرەگىن عانا ۇيرەتپەيمىز, سونىمەن قاتار بالالاردى كوشەدە مۇقيات بولۋعا, ءوزىنىڭ دە, وزگەنىڭ دە قاۋىپسىزدىگىن ويلاۋعا جانە جول ەرەجەلەرىن ساقتاۋعا ۇيرەتەمىز», دەيدى ولەسيا بابيچ.
№16 بالاباقشانىڭ ديرەكتورى گالينا تراۆكينا دا مەكتەپكە دەيىنگى تاربيە مەكەمەسىندە جول قاۋىپسىزدىگى ەرەجەلەرىن ۇيرەتۋ, بالانىڭ ءجۇرىس-تۇرىس داعدىسىن قالىپتاستىرۋعا كۇندەلىكتى كوڭىل ءبولىنىپ وتىراتىنىن اتاپ ءوتتى.
«بىزدە جول ەرەجەلەرىنە ارنالعان ارنايى ينتەراكتيۆتى بۇرىشتار بار. ءار توپتا وزدەرىنىڭ ستەندتەرى, جول بەلگىلەرىنىڭ ماكەتتەرى, جاياۋ جۇرگىنشى وتكەلدەرى مەن ويىنشىق كولىكتەر قويىلعان. مۇنىڭ ءبارى بالالارعا ويىن ارقىلى جولدا ءوزىن قالاي ۇستاۋدى ۇيرەتەدى. ال پوليتسەيلەرمەن وتكەن بۇگىنگى كەزدەسۋ وقۋ-تاربيە ۇدەرىسىن ودان دا قىزىقتى ەتە تۇسەدى», دەيدى بالاباقشا باسشىسى.
قوستاناي وبلىسى
