ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە بيىلعى سەگىز ايدا كەلگەن قانداستاردىڭ 44,2%-ى وزبەكستاننان, 43,2% -ى قىتايدان, 5%-ى تۇرىكمەنستاننان, 2,7% -ى موڭعوليادان, 2,4%-ى رەسەيدەن كەلسە, وزگە مەملەكەتتەردەن اتامەكەنگە قونىس اۋدارعانداردىڭ ۇلەسى – 2,5%.
ولاردىڭ اراسىندا ەڭبەككە قابىلەتتى جاستاعى ەتنيكالىق قونىس اۋدارۋشىلار سانى – 59,1%, ال ەڭبەككە قابىلەتتى جاسقا تولماعانداردىڭ ۇلەسى 31,8% بولسا, زەينەتكەرلەر 9,1%.
ەڭبەككە قابىلەتتى جاستاعى قانداستاردىڭ ىشىنەن ءبىلىم دەڭگەيىمەن سارالاعاندا 15,7%-ى جوعارى ءبىلىمدى, 28,1%-ى كاسىبي ورتا ءبىلىمدى, 53,5%-ى جالپى ورتا ءبىلىمدى, ال ورالعانداردىڭ 2,7%-ى ءبىلىم الماعان.
قونىس اۋدارعان ەتنيكالىق قازاقتار ءار وڭىرىنە قونىستاندى قونىستاندى.
قانداستار نەگىزىنەن ەڭبەك كۇشى تاپشى وڭىرلەر: اقمولا, اباي, قوستاناي, پاۆلودار, اتىراۋ, باتىس, شىعىس جانە سولتۇستىك قازاقستان وبلىستارىنا كوشىپ باردى.
قونىستاندىرۋ وڭىرلەرىندە بيىلعا ارنالعان قانداستاردى قابىلداۋ كۆوتاسى 2 309 ادامعا جەتتى. 2025 جىلعى 1 تامىزداعى جاعداي بويىنشا قونىستاندىرۋ وڭىرلەرىنە 1 286 قانداس قونىس اۋداردى.
جوعارىدا اتالعان وڭىرلەردە قونىستانعان قانداستارعا كوشىپ كەلۋى ءۇشىن سۋبسيديا تۇرىندە مەملەكەتتىك قولداۋ كورسەتىلەدى. اتاپ ايتقاندا ءبىر مەزگىلدە وتاعاسىنا جانە وتباسىنىڭ ءاربىر مۇشەسىنە 70 اەك (275,2 مىڭ تەڭگە) مولشەرىندە قارجىلاي قولداۋ كورسەتىلەدى. ودان سىرت تۇرعىن ءۇي جالداۋعا جانە كوممۋنالدىق قىزمەتتەرگە اقى تولەۋگە – ءبىر جىل بويى 15-تەن 30 اەك (59 مىڭ-118 مىڭ تەڭگەگە دەيىن) بەرىلەدى.
جىل باسىنان بەرى 563 قانداسقا ءتۇرلى قولداۋ شارالارى كورسەتىلىپ, ولاردىڭ اراسىنان 221 ادام تۇراقتى جۇمىسقا ورنالاستىرىلدى.
سونىمەن قاتار ەرىكتى قونىس اۋدارۋدىڭ تيىمدىلىگىن ارتتىرۋ ماقساتىندا ازاماتتاردى سولتۇستىك وڭىرلەرگە قونىس اۋدارۋعا قاتىساتىن جۇمىس بەرۋشىلەردى قولداۋ باعىتىندا دا بىرقاتار ينستيتۋتسيونالدىق شارالار قابىلداندى. تۇرعىن ءۇي ساتىپ الۋ, سالۋ ءۇشىن نەمەسە يپوتەكالىق تۇرعىن ءۇي قارىزدارى سانالاتىن باستاپقى جارنانىڭ ءبىر بولىگىن جابۋعا دا قولداۋ كورسەتىلەدى. ەكونوميكالىق ۇتقىرلىق سەرتيفيكاتى تۇرعىن ءۇي قۇنىنىڭ 50%-ى نەمەسە ءبىر وتباسىنا 4,56 ملن تەڭگە مولشەرىندە بىرجولعى وتەۋسىز ءارى قايتارىمسىز نەگىزدە بەرىلەدى.
