فوتو: ەڭبەك جانە حالىقتى الەۋمەتتىك قورعاۋ مينيسترلىگى
امج الۋعا قۇقىلى ازاماتتاردىڭ 17 ساناتى قر زاڭناماسىمەن بەلگىلەنگەن. ولاردىڭ قاتارىندا ەكىنشى دۇنيەجۇزىلىك سوعىسىنىڭ ارداگەرلەرى مەن باسقا مەملەكەتتەردىڭ اۋماعىندا وتكەن اسكەري ءىس-قيمىلدارعا قاتىسقان ارداگەرلەر, اتالعان سوعىستىڭ ارداگەرلەرىنە تەڭەستىرىلگەن ازاماتتار جانە قازا تاپقان جاۋىنگەرلەردىڭ ايەلدەرى مەن مەرت بولعان اسكەري قىزمەتكەرلەردىڭ وتباسى مۇشەلەرى, «حالىق قاھارمانى», «قازاقستاننىڭ ەڭبەك ەرى» اتاقتارىنا يە بولعاندار, تىل ەڭبەككەرلەرى, چەرنوبىل اتوم ەلەكتر ستانتسياسىنداعى اپاتتىڭ سالدارىن جويۋعا قاتىسقاندار, ساياسي رەپرەسسيالاردىڭ قۇرباندارى, مۇگەدەكتىگى بار ادامدار نەمەسە زەينەتكەرلەر, قر الدىنداعى ەرەكشە ەڭبەگى ءۇشىن زەينەتاقى تاعايىندالعاندار جانە باسقا دا ازاماتتار.
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە جاردەماقى مولشەرى الۋشىنىڭ ساناتىنا بايلانىستى جانە 2,13-تەن 138,63 ايلىق ەسەپتىك كورسەتكىشكە ء(ارى قاراي – اەك) دەيىن وزگەرەدى. ارنايى مەملەكەتتىك جاردەماقى مولشەرى جىل سايىن اەك مولشەرىنىڭ ارتۋىنا بايلانىستى, رەسپۋبليكالىق بيۋدجەت تۋرالى زاڭدا بەلگىلەنگەن ءتارتىپ بويىنشا كوتەرىلىپ وتىرادى.
قر-ندا تۇراقتى تۇراتىن شەتەلدىكتەر مەن ازاماتتىعى جوق تۇلعالار دا قر ازاماتتارىمەن تەڭ دارەجەدە ارنايى مەملەكەتتىك جاردەماقى الۋعا قۇقىلى. امج تاعايىنداۋ ءۇشىن ءوتىنىشتى eGov.kz پورتالى ارقىلى نەمەسە حالىققا قىزمەت كورسەتۋ ورتالىقتارىندا بەرۋ كەرەك.
ايتا كەتكەن ءجون, ەگەر ازامات بىرنەشە نەگىز بويىنشا امج الۋعا قۇقىلى بولسا, جاردەماقى تەك ولاردىڭ بىرەۋى بويىنشا, ءوز تاڭداۋى ەسكەرىلىپ تولەنەدى.
