ەكى كۇن بويى قالا تۇرعىندارى مەن قوناقتارى ۇلتتىق ءداستۇر مەن زاماناۋي ونەر ۇشتاسقان مازمۇندى باعدارلاماعا كۋا بولدى. فەستيۆال اياسىندا وتاندىق ديزاينەرلەردىڭ ءسان كورسەتىلىمى ۇيىمداستىرىلىپ, GlobalNomads, Adili, Urpaq سىندى برەندتەر ءوز كوللەكتسيالارىن كوپشىلىك نازارىنا ۇسىندى.
ۇلتتىق كينونى دارىپتەگەن اشىق اشپان استىنداعى «جاۋ جۇرەك مىڭ بالا» كينوكورسەتىلىمىندە بەلگىلى اكتەرلەر التىناي نوگەربەك پەن تىلەكتەس مەيراموۆ كورەرمەن مەن ونەردىڭ اراسىن جالعاعان رۋحاني كوپىرگە اينالدى. بۇعان قوسا, شەبەرلىك ايماقتارىندا كەلۋشىلەرگە ۇلتتىق داستۇرگە نەگىزدەلگەن شاش ءورۋ ونەرى مەن تابيعي ماتەريالداردان قولونەر بۇيىمدارىن ازىرلەۋدىڭ قىر-سىرى ۇيرەتىلدى.
«Nomad fest – ءداستۇر مەن زاماناۋي ونەردى توعىستىراتىن جاڭا مادەني الاڭ. ونىڭ باستى ماقساتى – ۇلتتىق قۇندىلىقتاردى دارىپتەپ قانا قويماي, جاستاردىڭ شىعارماشىلىق الەۋەتىن اشۋعا, ولاردى ونەر مەن مادەنيەتكە باۋلۋعا ىقپال ەتۋ», دەيدى ۇيىمداستىرۋشىلار.
