سوتتا قالالىق اكىمدىككە قاراستى «تۇرعىن ءۇي شىمكەنت» جشس-ءنىڭ بۇرىنعى باسشىسى ەرنار جيەمباي جەكە باس ارازدىعى سالدارىنان شىمكەنت قالاسى اكىمىنىڭ ورىنباسارى رۋسلان بەردەنوۆتى الكوگولدى ىشىمدىك ىشكەن ماساڭ كۇيدە قاساقانا ولتىرۋگە وقتالىپ, اڭشى مىلتىعىنان 5 رەت وق اتقانى ايتىلدى. سونداي-اق سوت تەرگەۋىندە سوتتالۋشىنىڭ وق دارىلەرى تاۋسىلۋىنا, جابىرلەنۋشىنىڭ وعان قارسىلىق كورسەتۋىنە جانە قاسىنداعى ادامدارى كومەككە كەلۋىنە بايلانىستى ە.جيەمباي قىلمىستىق نيەتىن سوڭىنا دەيىن جەتكىزە الماعانى انىقتالدى.
سوتتىڭ بۇلاي ۇكىم شىعارۋىنا سوتتالۋشىنىڭ ءوز قىلمىسىن مويىنداۋى, جابىرلەنۋشىنىڭ جانە كۋاگەرلەردىڭ جاۋاپتارى, زاتتاي ايعاقتار, بەينەجازبالار مەن سوت ساراپتامالارىنىڭ قورىتىندىلارى دالەل بولىپ تابىلادى.
سۋديا سوتتالۋشىنىڭ ءوز كىناسىن ءىشىنارا مويىندايتىندىعى, وعان شىن جۇرەكتەن وكىنەتىندىگى, بۇرىن سوتتى بولماعاندىعى, اسىراۋىندا 2 جاس بالاسى بارى جەڭىلدەتەتىن ءجايت رەتىندە جازا تاعايىنداعاندا ەسكەرىلگەنىن اتاپ ءوتتى. كەرىسىنشە الكوگولدى ءىشىمدى ءىشىپ ماساڭ كۇيىندە قىلمىس جاساعانى جازانى اۋىرلاتاتىن سەبەپ بولدى.
سوت ە.جيەمبايعا 9 جىل مەرزىمدى قىلمىستىق اتقارۋ جۇيەسىنىڭ ورتاشا قاۋىپسىزدىك مەكەمەسىندە وتەۋدى بەلگىلەدى. ۇكىم ءالى زاڭدى كۇشىنە ەنگەن جوق. وعان دەيىن سوتتالۋشى شىمكەنت قالالىق قىلمىستىق ىستەر جونىندەگى اپپەلياتسيالىق سوت القاسىنا شاعىم تۇسىرۋگە قۇقىلى. سونداي-اق ول جابىرلەنۋشىگە كەلتىرگەن شىعىنداردى تولىق وتەيتىن بولادى.
سوتتا ە.جيەمباي ۇكىممەن كەلىسپەيتىنىن مالىمدەدى. ول قىلمىستى ءولتىرۋ ماقساتىندا جاساماعانىن ايتتى. تەك قاساقانا دەنساۋلىعىنا اۋىر زيان كەلتىرۋ ءۇشىن جاسادىم دەدى. سوندىقتان قىلمىستىق كودەكستىڭ 106-بابىمەن جازا تاعايىندالعانىن كۇتىپتى. سوتتالۋشى ءوز سوزىندە مۇنداي قادامعا رۋسلان بەردەنوۆتىڭ دورەكى مىنەزى مەن كورسەتكەن جامان قىلىعى ءۇشىن بارعانىن جاسىرمادى. ە.جيەمبايدىڭ ايتۋىنشا ر.بەردەنوۆ كومەكشىسىنە دورەكى سويلەگەنى ءۇشىن ونى سوتتاتامىن دەپ قوقان-لوقى كورسەتكەن. جەكە كابينەتىنە شاقىرىپ الىپ, شاشىڭ ءتۇسىپ قالعان, كيىمىڭ ناشار دەگەن سەكىلدى نامىسقا تيەتىن سوزدەر ايتقان.
ە.جيەمبايدىڭ اكەسى جيەمباي پىراليەۆ تە اپپەلياتسيالىق شاعىم ءتۇسىرۋ جونىندە اقىلداساتىنىن مالىمدەدى. سوتتالۋشىنىڭ اكەسى ر.بەردەنوۆتىڭ ءوز لاۋازىمىن پايدالانۋدا شەكتەن شىعىپ, بالاسىنىڭ ابدەن نامىسىنا ءتيىپ, وسىنداي ارەكەت جاساۋىنا يتەرمەلەگىنىن باياندادى. ە.جيەمبايدىڭ ايەلىنە ر.بەردەنوۆتىڭ الەۋمەتتىك جەلىدە لايك باسىپ اشىق قىرىنداعانى راس پا دەگەن ساۋالعا اكەسى «بۇل ماسەلە قۇپيا كۇيىندە قالسىن, بالام دا كوپ نارسەنى ايتا الماي ءبارى ىشىندە كەتتى. وتباسىنىڭ ابىرويى ءبىز ءۇشىن بارىنەن بيىك. بىراق كەلىنىم ادال» دەپ جاۋاپ بەردى. سونداي-اق ج.پىراليەۆ سوت تەرگەۋىندە ءبىراز دالەلدەمەلەر ەسكەرىلمەگەنىن مالىمدەدى.
«تەرگەۋ بىرجاقتى ءوتتى. وعان ءبىز قاتىسا المادىق. ءبىزدىڭ ايتۋىمىزبەن جابىرلەنۋشىنىڭ كوستيۋمى 45 كۇندە تابىلدى. ر.بەردەنوۆ كوپتەگەن جاراقات الدى دەلىنگەن. الايدا دەنەسىنەن 3-اق بىتىرا وعى الىنعان. مەنىڭ بالام ونىڭ باسىما قارۋ تاقاماعان. ول سوت-ساراپتاما ورتالىعىنىڭ قورىتىندىسىندا دا, بەينەجازبادا دا جوق. ەرنار قالالىق چەمپيوناتتاردا كەزىندە جۇلدە العان بوكسەر. قارۋمەن اتۋدى دا ۇيرەنگەن. ەگەر شىن مانىندە نيەتىندە ءولتىرۋ بولسا ول سول ويىن ىسكە اسىرار ەدى. بىراق ونىڭ ماقساتى دەنەسىنە جاراقات سالۋ عانا بولدى. سوندىقتان قىلمىستىق كودەكستىڭ 106 بابى بويىنشا ۇكىم شىعۋ كەرەك ەدى. ر.بەردەنوۆ «ماعان اتىلعان وق بۇكىل مەملەكەتتىك ورگاندا ىستەيتىن ازاماتتارعا اتىلعانمەن بىردەي» دەپ بۇل ءىستى ساياسيلاندىرعىسى كەلەدى. ولاي ويلاۋدىڭ كەرەگى جوق. بۇل جەردە تەك جەكە باس ارازدىعى جاتىر. ال ر.بەردەنوۆ سول ارقىلى قوعامنىڭ كوڭىلىن اۋلاعىسى كەپ تۇر» دەدى ج.پىراليەۆ.
ءوز كەزەگىندە سوت وتىرىستارىندا جابىرلەنۋشى ر.بەردەنوۆ ە.جيەمبايدىڭ بارلىق ايىپتاۋلارىن جوققا شىعارعان ەدى. ونىڭ ايتۋىنشا ول ە.جيەمبايدىڭ جەكە ومىرىنە ەشقاشان ارالاسقان ەمەس. ايەلىن ءتىپتى تانىمايتىنىن دا مالىمدەدى. ر.بەردەنوۆ بايانداعانداي ە.جيەمبايعا ايتىلعان سىن تەك جۇمىس ماسەلەسىنە قاتىستى بولعان. ويتكەنى ونىڭ پىكىرىنشە «تۇرعىن ءۇي شىمكەنت» سەرىكتەستىگى شىن مانىندە ءوز قىزمەتىندە كوپتەگەن كەمشىلىكتەر مەن ساپاسىزدىققا جول بەرگەن. سونداي-اق ر.بەردەنوۆ ءوز سوزىندە لاۋازىمدى قىزمەتكەرلەر كابينەتىندە تىڭداۋ قۇرىلعىلارى بولاتىنىن, ءار ءسوز جازىلاتىنىن سوندىقتان ەتيكاعا جاتپايتىن اڭگىمەلەر ايتپاۋ كەرەگىن بىلەتىنىن اتاپ وتكەن ەدى.
شىمكەنت
