فوتو: سۋ رەسۋرستارى جانە يرريگاتسيا مينيسترلىگى
2023 جىلى باسسەين ينسپەكتسيالارى سۋ زاڭناماسىنىڭ تالاپتارىن ساقتاۋ بويىنشا 105 تەكسەرىس جۇرگىزىپ, ناتيجەسىندە 208 زاڭبۇزۋشىلىق انىقتالدى. ولاردى جويۋ ءۇشىن 81 ۇيعارىم بەرىلىپ, جالپى سوماسى 21,4 ملن تەڭگەگە 149 اكىمشىلىك ايىپپۇل سالىنعان.
2024 جىلى باسسەين ينسپەكتسيالارى 439 تەكسەرىس جۇرگىزىپ, 1 855 زاڭبۇزۋشىلىقتى انىقتاعان, ولار بويىنشا 429 ۇيعارىم بەرىلدى. تەكسەرىستەردىڭ قورىتىندىسى بويىنشا جالپى سوماسى 48,4 ملن تەڭگەگە 582 اكىمشىلىك ايىپپۇل سالىندى.
ال 2025 جىلدىڭ باسىنان بەرى 82 تەكسەرىس جۇرگىزىلىپ, 141 زاڭبۇزۋشىلىق تىركەلىپ, سول بويىنشا 69 ۇيعارىم بەرىلىپ, جالپى سوماسى 24 ملن تەڭگەگە 254 ايىپپۇل سالىنىپ وتىر.
سالا ءمينيسترى نۇرجان نۇرجىگىتوۆتىڭ ايتۋىنشا بىلتىر ۆەدومستۆونىڭ سۋ رەسۋرستارىن رەتتەۋ, قورعاۋ جانە پايدالانۋ جونىندەگى كوميتەتى قۇرىلدى. ونىڭ نەگىزگى مىندەتى – سۋدى زاڭسىز پايدالانۋ مەن سۋ ەسەبىن بۇرمالاۋعا قارسى كۇرەس جۇرگىزۋ, سونداي-اق سۋ نىساندارىنداعى زاڭسىز ارەكەتتەردىڭ جولىن كەسۋ.
«جۇكتەلگەن مىندەتتەردىڭ ساپالى ورىندالۋىن قامتاماسىز ەتۋ ءۇشىن قىزمەتكەرلەر سانىن ارتتىرۋ, اۋماقتىق بولىمشەلەر جەلىسىن كەڭەيتۋ جانە باسسەين ينسپەكتسيالارىن تەحنيكالىق جاعىنان جابدىقتاۋ بويىنشا شارالار قابىلداندى. بۇدان بولەك, ينسپەكتسيالارعا باقىلاۋ جۇرگىزۋ قۇزىرەتى بەرىلدى, سوعان سايكەس ولار جەدەل ارەكەت ەتۋ شارالارىن قولدانا الادى», دەدى ن.نۇرجىگىتوۆ.
مينيسترلىكتىڭ مالىمەتىنشە سۋدىڭ «كولەڭكەلى نارىعىمەن» كۇرەسۋ ءۇشىن مينيسترلىك قابىلداعان شارالاردىڭ ىشىندە سۋ سالاسىنداعى زاڭبۇزۋشىلىقتار ءۇشىن جازانى قاتاڭداتۋ دا قاراستىرىلعان. وعان قوسا, بيىل 10 ماۋسىمنان باستاپ سۋارۋ سۋىن پايدالانۋ ەرەجەلەرى كۇشىنە ەندى. بۇل ەرەجەلەرگە سايكەس, كەلىسىمشارتسىز سۋ تۇتىنعانى جانە داقىل ءتۇرىن سۋ جەتكىزۋشىمەن كەلىسپەي وزگەرتكەنى ءۇشىن اكىمشىلىك جاۋاپكەرشىلىك قاراستىرىلعان.
سونداي-اق قۇقىقبۇزۋشىلىقتاردىڭ الدىن الۋ ماقساتىندا ءتۇسىندىرۋ جۇمىستارى دا جۇرگىزىلىپ جاتىر. بيىل باسسەين ينسپەكتسيالارى 1 861 شارۋاشىلىق سۋبەكتىسىن قامتىعان 125 ءتۇسىندىرۋ ءىس-شاراسىن وتكىزدى. سونىڭ ناتيجەسىندە سۋ پايدالانۋشىلار ارنايى رۇقسات قۇجاتتارىن بەلسەندى تۇردە راسىمدەي باستادى. وسىلايشا جىل باسىنان بەرى 445 رۇقسات قۇجاتى بەرىلگەن.
