بولىمشە مەڭگەرۋشىسى ارنات بايزاقوۆتىڭ ايتۋىنشا, ارتروسكوپيا كىشىگىرىم تىلىكتەر ارقىلى زاقىمى از شاعىن وتا جاساۋعا مۇمكىندىك بەرەدى. وسىنداي وزىق تەحنولوگيانىڭ ارقاسىندا بۋىننىڭ ب ۇلىنگەن بولىكتەرىن بارىنشا زاقىمداماي قالپىنا كەلتىرۋگە بولادى. ءارى مۇنداي ادىسپەن جاسالعان وتادان كەيىن ناۋقاستىڭ دا دەنساۋلىعى قالپىنا تەز كەلەدى.
ال وتا جاساتقان ناۋقاسقا كەلسەك, 19 جاستاعى پاتسيەنت ءبىر جارىم جىل بۇرىن قۇلاپ, يىعىن جاراقاتتاپ العان. ءداستۇرلى ەم-دومنان ناتيجە بولماعان, بىراق جاس جىگىت ورتوحيرۋرگتەردىڭ كومەگىنە جۇگىنۋگە اسىقپاعاندىقتان, جىگىتتىڭ يىعى وسى ۋاقىت ىشىندە 13 رەت شىعىپ ۇلگەرگەن.
«دياگنوستيكا بارىسىندا ناۋقاستىڭ يىعى شىعىپ, يىقتاعى سۇيەكتىڭ باسى سىنعانى, جاۋىرىن مەن بۋىن ەرنەۋى زاقىمدانعانى انىقتالدى. ادەتتە مۇنداي دياگنوز قويىلعان جاعدايدا وپەراتسيا اشىق ادىسپەن جاسالادى. بىراق سىرقاتتىڭ انامنەزىن, جاسىن, سپورتپەن شۇعىلداناتىنىن ەسكەرە وتىرىپ, شاعىن ءينۆازيۆتى تەحنيكانى قولدانۋ تۋرالى شەشىم قابىلداندى», دەيدى ارنات بايزاقوۆ.
حيرۋرگتەر بىردەن ەكى وپەراتسيا جاسادى. ءبىرىنشىسى: الدىڭعى ءسىڭىر ەرنەۋىن قالپىنا كەلتىرۋگە باعىتتالعان بانكارت وتاسى. ەكىنشىسى: يىق بۋىنىنىڭ ارتقى بولىگىن بەكىتۋگە ارنالعان رەمپليسساج دەپ اتالاتىن وپەراتسيا. وپەراتسيالار ءمامس قاراجاتى ەسەبىنەن جاسالدى. اۋرۋحانادان شىققان سوڭ پاتسيەنت 6 ايعا دەيىن رەابيليتاتسيادان ءوتۋى ءتيىس.
«بۇرىن مۇنداي وتالار ۇلكەن تىلىك ارقىلى, اشىق ادىسپەن جاسالاتىن. سالدارىنان اسقىنۋ قاۋپى ارتىپ, قالپىنا كەلتىرۋ مەرزىمى دە ۇزاراتىن, بۇل جولعى وپەراتسيانىڭ بىرەگەيلىگى دە وسىندا», دەيدى مامان.
قازىرگى زامانعى ارتروسكوپيا وتا بارىسىندا بولاتىن زاقىمدانۋ مەن ينفەكتسيانىڭ الدىن الۋعا, وڭالتۋ پروتسەسىن تەزدەتۋگە مۇمكىندىك بەرەدى. سەبەبى قولدانىلاتىن بەينەكامەرالار دالدىكتى ارتتىرادى, ال, وزدىگىنەن ىدىرايتىن بيويمپلانت ۋاقىت وتە كەلە سۇيەك تىنىمەن ارالاسىپ كەتەدى. ياعني, قايتا وتا جاساۋدى قاجەت ەتپەيدى.
«وتا كىشىگىرىم تەسىكتەر ارقىلى جاسالدى. بىراق ناتيجەسى اشىق وپەراتسيادان كەم ەمەس جانە مۇندا ناۋقاس ومىرىنە, دەنساۋلىعىنا تونەتىن قاۋىپ ەداۋىر ازايادى. زاماناۋي بەكىتكىشتەر مەن يمپلانتتار وتانىڭ قاۋىپسىزدىگى مەن تيىمدىلىگىن ارتتىرادى», دەيدى ارنات بايزاقوۆ.
