جاڭا ماماندىق – جارقىن مۇمكىندىك
كوپشىلىك فلوريستيكا دەسە تەك گۇل شوقتارىن جيناۋ دەپ ويلايدى. الايدا بۇل ماماندىق – شىعارماشىلىق پەن ەستەتيكانى, سەرۆيس پەن قولونەردى, تالعام مەن جاۋاپكەرشىلىكتى توعىستىرعان سالا. استاناداعى سەرۆيس جانە تۋريزم كوللەدجىندە وسى باعىتقا العاشقى ستۋدەنتتەر قابىلدانىپ, بىرقاتار جاس مامان ءبىلىم الىپ جاتىر. جاڭا وقۋ جىلىنان باستاپ ولاردىڭ قاتارىنا تاعى 25 تالاپكەر قوسىلماق. ايتا كەتەرلىگى, ونىڭ ىشىندە ەرەكشە ءبىلىم بەرۋدى قاجەت ەتەتىن ستۋدەنتتەر دە بار.
بولاشاق فلوريستەر ەكى جىل ون اي بويى تەك تەوريالىق ءبىلىم الىپ قانا قويماي, زاماناۋي زەرتحانالاردا تاجىريبە جيناقتايدى. وقۋ بارىسىندا بيولوگيا, ماتەماتيكا, قازاق جانە ورىس تىلدەرى پاندەرىنەن العان ءبىلىم باعالانىپ, قوسىمشا سۇحباتتاسۋ جۇرگىزىلەدى. كوللەدجدە ارنايى بىلىكتى وقىتۋشىلار ءدارىس بەرەدى, ال ستۋدەنتتەر تاجىريبەنى شەتەلدىك جانە وتاندىق سەرىكتەس كومپانيالاردا شىڭدايدى.
ەرەكشە ونەر يەسى
كوللەدج شاكىرتتەرىنە نيدەرلاندتىق «Flower Circus» كومپانياسى تۇراقتى تۇردە شەبەرلىك ساباقتارىن وتكىزىپ كەلەدى. بۇعان قوسا, وقۋ ورنى «Romantic», «قازفلور» ورتالىقتارىمەن جانە «استانا-زەلەنستروي», «جاسىل ايماق» كاسىپورىندارىمەن تىعىز بايلانىس ورناتقان. وسى وقۋ ورداسىنىڭ بيىلعى تۇلەگى ەرجان بالتاباي بۇگىندە «Romantic» گۇلدەر ورتالىعىندا ەڭبەك ەتىپ ءجۇر. جاس مامان ءوز ىسىنە سۇيىسپەنشىلىكپەن قارايدى:
«فلوريستيكا – تەك گۇلدەرمەن جۇمىس ەمەس, بۇل – اينالاعا ەموتسيا سىيلاپ, سۇلۋلىقتى جەتكىزۋ ونەرى. ءيا, مەن بۇل ماماندىقتى جۇمىس دەپ ەمەس, ونەر دەپ تۇسىنەمىن. تابيعات تاماشالارىن ۇيلەستىرە وتىرىپ, ادامدارعا قۋانىش سىيلاعىم كەلەدى», دەيدى ول.
حالىقارالىق دوداعا دايىندىق
قازىرگى تاڭدا ەرجان بالتاباي دانيادا وتەتىن حالىقارالىق «EuroSkills» جارىسىنا قىزۋ دايىندالاپ جاتىر. ءار كۇنىن ءتۇرلى تەحنيكانى مەڭگەرىپ, كۇردەلى كومپوزيتسيالار جاساۋعا ارنايدى. ول بايقاۋدىڭ رەسپۋبليكالىق كەزەڭىندە ەل مادەنيەتى مەن تاريحىن تانىتاتىن ەرەكشە جۇمىستارىمەن دارالاندى.
ماسەلەن, «جىبەك جولى», «بۋراباي», «قوزى كورپەش-بايان سۇلۋ» اتتى شىعارماشىلىق كومپوزيتسيالارى ادىلقازىلار تاراپىنان جوعارى باعالانىپ, جەڭىسكە جەتتى.
«فلوريستيكا شەبەرلىكتى عانا ەمەس, سونىمەن بىرگە ۇلكەن ىجداعاتتىلىق پەن بايقامپازدىقتى تالاپ ەتەدى. قازىر ەڭ باستىسى – شىعارماشىلىق ويلاۋ قابىلەتىمدى جەتىلدىرۋ, ويتكەنى حالىقارالىق دەڭگەيدەگى سايىس تەك تەحنيكامەن ەمەس, يدەيا تەرەڭدىگىمەن باعالانادى», دەيدى جاس فلوريست.
گۇل ادامنىڭ نيەتىن سەزەدى
ەرجان گۇل دۇكەنىنە كەلەتىن ادامداردىڭ بولمىس-ءبىتىمى مەن مىنەزى بىردەن اڭعارىلاتىنىن ايتادى. سوزىنشە, جاقىن ادامىن رياسىز قۋانتقىسى كەلەتىن ادامنىڭ تاپسىرىسى وتە تەز جينالادى ءارى جىلدام ۇيلەسە كەتەدى. كەيىن سول گۇلدىڭ عۇمىرى دا ۇزاق بولادى ەكەن.
«كەي كىسىلەردىڭ گۇلدەرى, كەرىسىنشە, جينالماي قويادى. ونداي جاندار گۇلدى قۋانتۋ ءۇشىن ەمەس, «بەرىپ قۇتىلۋ» ءۇشىن الادى. شەبەرلىك ماشىعىمىزدىڭ ناتيجەسىندە ول تاپسىرىستىڭ دى قيۋىن كەلىستىرىپ, ادەمى ەتىپ دايىنداپ بەرەمىز. بىراق ونداي نيەتپەن الىنعان گۇلدەر ۇزاق ساقتالمايدى. ءوز تاجىريبەمدە ءجيى كەزدەستىردىم», دەيدى فلوريست ەرجان.
گۇل – تابيعاتتىڭ نازىك ءتىلى. ال ونى ءبىزدىڭ تىلدە تۇسىندىرەتىن – ەرجان بالتاباي. ونىڭ تاباندىلىعى مەن تالانتى – وتاندىق فلوريستيكانىڭ بولاشاعى بار ەكەنىن ايقىندايدى. الەمدىك سايىستاردا جاس ماماندارىمىز قازاق جەرىنىڭ تابيعاتى مەن مادەنيەتىن پاش ەتسە, بۇل تەك ءبىر ماماندىقتىڭ عانا ەمەس, تۇتاس ەلدىڭ مەرەيى بولارى ءسوزسىز.
