ەندى قانداعى وتتەگىنىڭ دەڭگەيىن ولشەۋ جانە دەرەكتەردى وڭدەۋ تىكەلەي Apple Watch قۇرىلعىسىندا ەمەس, وعان قوسىلعان iPhone ارقىلى جۇزەگە اسادى. ناتيجەلەردى پايدالانۋشىلار «دەنساۋلىق» قوسىمشاسىنداعى «تىنىس الۋ» بولىمىنەن كورە الادى. وسىلايشا فۋنكتسيا ساعات ەكرانىندا تىكەلەي كورسەتىلمەيدى.
بۇل شەكتەۋ اقش-تىڭ حالىقارالىق ساۋدا جونىندەگى كوميسسياسى (ITC) ەنگىزگەن تىيىمعا بايلانىستى پايدا بولعان ەدى. بۇعان دەيىن Masimo كومپانياسى Apple-ءدى پۋلستىك وكسيمەتريا تەحنولوگياسىنا قاتىستى پاتەنتتەردى بۇزدى دەپ ايىپتاپ, سوتقا جۇگىنگەن. ITC بۇل تالاپتى نەگىزدى دەپ تانىپ, Apple ۋاقىتشا قانداعى وتتەگىن ولشەۋ فۋنكتسياسىن وشىرگەن بولاتىن.
قازىرگى ۋاقىتتا Apple سوت ءىسىن جالعاستىرىپ, تىيىمدى قايتا قاراۋدى تالاپ ەتۋدە. كومپانيا Masimo-نى دا قارسى تالاپپەن ايىپتاپ, ونىڭ Apple Watch فۋنكتسيالارىن ءوز قۇرىلعىلارىنا كوشىرۋگە تىرىسقانىن مالىمدەدى.
جاڭارتىلعان فۋنكتسيا جاڭا iPhone جانە Apple Watch ۇلگىلەرىنە باعدارلامالىق جاساقتامانىڭ سوڭعى نۇسقاسىن ورناتقاننان كەيىن قولجەتىمدى بولادى.
